ការនាំឱ្យមានចំណាកស្រុក៖ បទពិសោធន៍នៃភូមិមួយអំពីបំណុលគ្រឹះស្ថានមីក្រូហិរញ្ញវត្ថុ និងការចំណាកស្រុកឆ្លងដែន
ចេញផ្សាយ ខែឧសភា ឆ្នាំ២០២០ ទាញយករបាយការណ៍សង្ខេបជាភាសាខ្មែរ (PDF, 8.81 MBs) | |
ទាញយករបាយការណ៍សង្ខេបជាភាសាអង់គ្លេស (PDF, 8.57 MBs) | |
ស្តាប់សំឡេងជាភាសាខ្មែរ |
“ផលប្រយោជន៍បានពីគ្រឹះស្ថានមីក្រូហិរញ្ញវត្ថុមានតិច តែភ័យខ្លាចខ្លាំង”
នៅភាគពាយ័ព្យនៃប្រទេសកម្ពុជា ការកើតឡើងនៃបំណុលមីក្រូហិរញ្ញវត្ថុគ្រប់ទីកន្លែងគឺកំពុងជំរុញមនុស្សជាច្រើនគ្រួសារឱ្យចេញពីផ្ទះរបស់ពួកគាត់ទៅធ្វើការនៅក្នុងប្រទេសថៃ ។ នៅក្នុងរបាយការណ៍សង្ខេប “ការនាំឱ្យមានចំណាកស្រុក៖ បទពិសោធន៍នៃភូមិមួយអំពីបំណុលគ្រឹះស្ថានមីក្រូហិរញ្ញវត្ថុ និងការចំណាកស្រុកឆ្លងដែន” អង្គការលីកាដូផ្ដោតសំខាន់ទៅលើភូមិមួយនៅក្នុងខេត្តបន្ទាយមានជ័យ ដើម្បីស្វែងយល់ឱ្យបានស៊ីជម្រៅអំពីទំនាក់ទំនងរវាងបំណុលមីក្រូហិរញ្ញវត្ថុ និងការចំណាកស្រុកនៅតំបន់ព្រំដែនក្នុងប្រទេសកម្ពុជា ។ តាមរយៈការធ្វើបទសម្ភាសន៍ជាមួយសមាជិកគ្រួសារដែលស្នាក់នៅផ្ទះចំនួន៣០គ្រួសារ អ្នកស្រាវជ្រាវរបស់អង្គការលីកាដូ បានរកឃើញថា ការជាប់ជំពាក់បំណុលគ្រឹះស្ថានមីក្រូហិរញ្ញវត្ថុច្រើនលើសលុប គឺជាកត្តាចម្បងលើកទឹកចិត្ត នាំឱ្យមានការធ្វើចំណាកស្រុកចេញពីភូមិ ។
អ្នកនាង ណាលី ពីឡូក នាយិកាអង្គការលីកាដូ បានមានប្រសាសន៍ថា៖ “គ្រួសារជាច្រើនបានចាកចេញពីផ្ទះ និងប្រទេសកំណើតរបស់ពួកគាត់ ដើម្បីរកប្រាក់សងបំណុលគ្រឹះស្ថានមីក្រូហិរញ្ញវត្ថុ” ។ អ្នកនាងបានបន្តទៀតថា៖ “ពេលនេះ អតីតពលករចំណាកស្រុករាប់សែននាក់ មិនអាចធ្វើការនៅក្នុងប្រទេសថៃទៀតបានទេ ដោយសារបញ្ហាវីរុសកូវីដ១៩ ដូច្នេះអង្គការលីកាដូសង្ឃឹមថា រាជរដ្ឋាភិបាល និងគ្រឹះស្ថានមីក្រូហិរញ្ញវត្ថុ អាចជួយអ្នកខ្ចីប្រាក់ទាំងនេះដោយផ្អាកការសងបំណុល និងប្រគល់ប័ណ្ណកម្មសិទ្ធិដីធ្លីជូនម្ចាស់ទ្រព្យវិញ” ។
ការពិតដែលបំណុលមីក្រូហិរញ្ញវត្ថុនាំឱ្យមានចំណាកស្រុកនៅកម្ពុជា ត្រូវបានកត់សម្គាល់ជាច្រើនឆ្នាំមកហើយដោយអង្គការចំណាកស្រុកអន្តរជាតិ (IOM) និងអង្គការសហប្រជាជាតិស្តីពីគ្រឿងញៀន និងបទឧក្រិដ្ឋនៅកម្ពុជា (UNODC) ។ របាយការណ៍ “ការនាំឱ្យមានចំណាកស្រុក” នេះ នឹងបង្ហាញលម្អិតបន្ថែមទៀត អំពីតួនាទីរបស់បំណុលមីក្រូហិរញ្ញវត្ថុនៅកម្ពុជា ចំពោះការធ្វើចំណាកស្រុក ដែលជាញឹកញាប់ធ្វើឱ្យពលករជាច្រើនប្រឈមនឹងការកេងប្រវ័ញ្ច និងការរំលោភសិទ្ធិមនុស្សជាដើម ។
ភាគច្រើននៃសមាជិកគ្រួសារដែលបានផ្ដល់បទសម្ភាសន៍បានរៀបរាប់ថា ការលើកទឹកចិត្តចម្បងសម្រាប់សាច់ញាតិរបស់ពួកគាត់ក្នុងការចាកចេញពីប្រទេសកម្ពុជា គឺការរកប្រាក់ដើម្បីសងបំណុលគ្រឹះស្ថានមីក្រូហិរញ្ញវត្ថុ ។ មន្ត្រីឥណទានមួយចំនួនបានលើកទឹកចិត្ត ឬសូម្បីតែទាមទារឱ្យមានការធ្វើចំណាកស្រុក ជាលក្ខខណ្ឌដំបូង មុនពេលទទួលបានកម្ចីមីក្រូហិរញ្ញវត្ថុ ។ កម្ចីជាច្រើនត្រូវបានផ្ដល់ឱ្យទៅប្រជាពលរដ្ឋកម្ពុជាអ្នកខ្ចីប្រាក់ជារូបិយវត្ថុបាតរបស់ប្រទេសថៃ ហើយគ្រឹះស្ថានមីក្រូហិរញ្ញវត្ថុខ្លួនឯងទទួលបានការវិនិយោគពីភ្នាក់ងារអភិវឌ្ឍន៍របស់ប្រទេសនៅអឺរ៉ុបជារូបិយវត្ថុបាត ដែលជាសម្ពាធបន្ថែមទៀតលើអ្នកខ្ចីប្រាក់ ក្នុងការសងបំណុលរបស់ពួកគាត់ ។
ជារួម អ្នកផ្ដល់បទសម្ភាសន៍បានរៀបរាប់ពីអារម្មណ៍អវិជ្ជមានចំពោះបំណុលមីក្រូហិរញ្ញវត្ថុ ក៏ដូចជាអារម្មណ៍ច្របូកច្របល់ចំពោះការធ្វើចំណាកស្រុក ។ ភាគច្រើននៃអតិថិជនមីក្រូហិរញ្ញវត្ថុបានរៀបរាប់ថា មានអារម្មណ៍ភ័យខ្លាចចំពោះបំណុលមីក្រូហិរញ្ញវត្ថុ ដោយសារពួកគាត់ប្រើប្រាស់ដីធ្លីរបស់ពួកគាត់ធ្វើជាទ្រព្យធានា (បញ្ចាំ) ដើម្បីទទួលបានប្រាក់កម្ចី និងដោយសារពួកគាត់ព្រួយបារម្ភពីសុវត្ថិភាពសាច់ញាតិរបស់ពួកគាត់ជាពលករចំណាកស្រុក ដែលមានប្រាក់បៀវត្សត្រូវតម្រូវឱ្យបង់សងបំណុល ។ ភូមិនេះក៏ស្ទើរតែគ្មានមនុស្សពេញវ័យរស់នៅ គឺមានតែសមាជិកគ្រួសារចាស់ៗ និងក្មេងតូចៗតែប៉ុណ្ណោះ ។ ការបែកបាក់គ្រួសារគឺជាប្រភពនៃការព្រួយបារម្ភជាខ្លាំង សម្រាប់អ្នកផ្ដល់បទសម្ភាសន៍ ។
ពេលនេះ អតីតពលករចំណាកស្រុករាប់សែននាក់ មិនអាចធ្វើការនៅក្នុងប្រទេសថៃទៀតបានទេ ដោយសារបញ្ហាវីរុសកូវីដ១៩ ដូច្នេះអង្គការលីកាដូសង្ឃឹមថា រាជរដ្ឋាភិបាល និងគ្រឹះស្ថានមីក្រូហិរញ្ញវត្ថុ អាចជួយអ្នកខ្ចីប្រាក់ទាំងនេះដោយផ្អាកការសងបំណុល និងប្រគល់ប័ណ្ណកម្មសិទ្ធិដីធ្លីជូនម្ចាស់ទ្រព្យវិញ
ណាលី ពីឡូក នាយិកាអង្គការលីកាដូ
ចាប់តាំងពីការសិក្សាស្រាវជ្រាវត្រូវបានធ្វើឡើងក្នុងខែកញ្ញា ឆ្នាំ២០១៩ អ្នកចំណាកស្រុកជាង៨ម៉ឺននាក់បានចាកចេញពីប្រទេសថៃ ត្រឡប់មកប្រទេសកម្ពុជាវិញ ដោយសារការរីករាលដាលជាសកលនៃវីរុសកូវីដ១៩ ។ ការបាត់បង់ប្រាក់ចំណូលភ្លាមៗនេះ នាំឱ្យគ្រួសារទាំងនេះប្រឈមនឹងហានិភ័យនៃការរំលោភសិទ្ធិមនុស្សបន្ថែមទៀត ដោយសារបំណុលមីក្រូហិរញ្ញវត្ថុរបស់ពួកគាត់ ក្នុងនោះមានការបង្ខំឱ្យលក់ដីសងបំណុល ជាដើម ។ គ្រប់កម្មករសេដ្ឋកិច្ចទាំងក្នុង និងក្រៅប្រព័ន្ធ ក្នុងឧស្សាហកម្មផលិត សំណង់ កំសាន្ត មធ្យោបាយធ្វើដំណើរ និងទេសចរណ៍ ក្នុងប្រទេសកម្ពុជា កំពុងប្រឈមនឹងការបាត់បង់ការងារយ៉ាងធ្ងន់ធ្ងរ ខណៈដែលសេដ្ឋកិច្ចជាតិ មានការធ្លាក់ចុះ អំឡុងពេលមានវិបត្តិជាសកលមួយនេះ ។
អង្គការលីកាដូ សង្ឃឹមយ៉ាងមុតមាំថា គ្រឹះស្ថានមីក្រូហិរញ្ញវត្ថុ និងរាជរដ្ឋាភិបាល នឹងអាចធ្វើការជាមួយគ្នា ដើម្បីផ្អាកការសងបំណុលមីក្រូហិរញ្ញវត្ថុ និងសង្ឃឹមថាអ្នកវិនិយោគបរទេសរបស់គ្រឹះស្ថានទាំងនេះ នឹងអាចវាយតម្លៃឡើងវិញចំពោះការផ្ដល់ប្រាក់កម្ចីជារូបិយវត្ថុបាត ក៏ដូចជាធ្វើការស៊ើបអង្កេតឱ្យបានពេញលេញថាតើប្រាក់កម្ចីទាំងនេះបាននាំឱ្យមានការធ្វើចំណាកស្រុកខុសច្បាប់ ការជួយដូរមនុស្ស ឬការរំលោភសិទ្ធិមនុស្សផ្សេងទៀត ឬយ៉ាងណា ។
លោក អំ សំអាត នាយករងផ្នែកឃ្លាំមើលសិទ្ធិមនុស្សនៃអង្គការលីកាដូ បានមានប្រសាសន៍ថា៖ អ្នកចំណាកស្រុកដែលបានវិលត្រឡប់មកវិញ កំពុងត្រូវការជំនួយពីគ្រឹះស្ថានមីក្រូហិរញ្ញវត្ថុ និងរាជរដ្ឋាភិបាល” ។ លោកបានបន្តថា៖ “យើងសង្ឃឹមថា អ្នកខ្ចីប្រាក់ទាំងនេះនឹងអាចទទួលបានការសម្រាលបន្ទុក ខណៈដែលពួកគាត់កំពុងតស៊ូ កសាងជីវិត និងប្រាក់ចំណូលរបស់ពួកគាត់សារជាថ្មី” ៕
- ចំណងជើង & មូលបទ
- សិទ្ធិដីធ្លី គ្រឹះស្ថានមីក្រូហិរញ្ញវត្ថុ និងបញ្ហាបំណុល