កម្លាំងទាហានបាញ់ប្រហារចំបុរសម្នាក់ ក្នុងវិវាទដីធ្លីមួយនៅខេត្តកណ្ដាល
ចេញផ្សាយ ថ្ងៃទី៤ ខែមិថុនា ឆ្នាំ២០២១កាលពីថ្ងៃព្រហស្បតិ៍ ម្សិលមិញនេះ ទាហានមួយក្រុមបានបាញ់ប្រហារដោយគ្រាប់កាំភ្លើងទៅលើអ្នកតវ៉ាដីធ្លី នៅក្នុងខេត្តកណ្ដាល ដែលបណ្ដាលឱ្យត្រូវចំស្មាបុរសម្នាក់ អំឡុងពេលដែលកម្លាំងទាហាននៃកងយុទ្ធពលខេមរៈភូមិន្ទប្រមាណជា ១០០នាក់ ប្រឈមមុខជាមួយអ្នកភូមិ ពាក់ព័ន្ធនឹងវិវាទដីធ្លីមួយនៅក្នុងខេត្តកណ្ដាល ដែលមានចម្ងាយប្រហែល ៥គីឡូម៉ែត្រពីព្រំប្រទល់រាជធានីភ្នំពេញ ។ បុរសរងគ្រោះ កំពុងស្ថិតក្រោមការជួយសង្គ្រោះនៅក្នុងមន្ទីរពេទ្យនៅឡើយ ខណៈដែលប្រជាពលរដ្ឋក្នុងមូលដ្ឋានមួយចំនួន បានបន្តការតវ៉ា នាព្រឹកថ្ងៃសុក្រនេះ ។
ការបាញ់ប្រហារនេះ បានកើតឡើងនៅក្នុងឃុំទួលព្រេជ ស្រុកអង្គស្នួល ជាតំបន់ដែលមានទីតាំង និងមូលដ្ឋានទ័ពជាច្រើន និងជាតំបន់ដែលមានការអភិវឌ្ឍន៍ខ្លាំង នៅប៉ុន្មានឆ្នាំចុងក្រោយនេះ ។ អ្នកភូមិ បានឱ្យដឹងថា ទាហានទាំងនោះគឺមកពីសាលាហ្វឹកហ្វឺនទាហានត្មាតពង ដែលនៅជិតនោះ ។ វីដេអូនៃហេតុការណ៍នេះ បង្ហាញថា មានគ្រឿងចក្រមួយកំពុងជីកកាយដី ខណៈដែលប្រជាពលរដ្ឋនៅក្នុងមូលដ្ឋានព្យាយាមបញ្ឈប់សកម្មភាពនោះ ក៏ដូចជាបិទផ្លូវជាតិលេខ ៥១ ។ កម្លាំងទាហានដែលស្លៀកពាក់ឯកសណ្ឋាន ត្រូវបានមើលឃើញថា បានចាប់ផ្ដើមប្រើប្រាស់ហិង្សាលើប្រជាពលរដ្ឋមុន និងបានបាញ់កាំភ្លើងជាច្រើនគ្រាប់ ដោយប្រើប្រាស់កាំភ្លើងខ្លី និងកាំភ្លើងបាញ់រះទៅលើអាកាស និងទៅលើក្រុមប្រជាពលរដ្ឋ ដែលបណ្ដាលឱ្យត្រូវចំស្មាបុរសម្នាក់ ។
វិវាទដីធ្លីនេះ ពាក់ព័ន្ធនឹងទំហំដីជាង ១៥០ ហិកតា ដែលប្រជាពលរដ្ឋជាង ៣០០ គ្រួសារ ក្នុងភូមិយ៉ាងតិច ៧ បានធ្វើការដាំដុះជាច្រើនឆ្នាំមកហើយ ។ ទិន្នន័យផ្កាយរណប បង្ហាញថា ដីធ្លីជុំវិញតំបន់នៃការបាញ់ប្រហារ ត្រូវបានធ្វើការដាំដុះជាបន្តបន្ទាប់ យ៉ាងហោចណាស់ ចាប់តាំងពីឆ្នាំ២០០៨ មកម្ល៉េះ ដែលជារូបភាពផ្កាយរណបថ្មីជាងគេ នៅលើផែនទីហ្គូហ្គល (Google Earth) ។ ផែនទីដែលផលិតដោយរាជរដ្ឋាភិបាល ចេញផ្សាយចាប់តាំងពីឆ្នាំ២០០១ ក៏បានកំណត់តំបន់នេះជាដីស្រែចម្ការ ផងដែរ ។ កាលពីថ្ងៃព្រហស្បតិ៍ម្សិលមិញ អាជ្ញាធរខេត្តកណ្ដាល បានចេញលិខិតមួយ រៀបរាប់ថា ដីធ្លីទាំងនេះ ជាកម្មសិទ្ធិរបស់រដ្ឋ ទោះបីជាប្រជាពលរដ្ឋមួយចំនួន បានអះអាងថា ពួកគាត់បានធ្វើការដាំដុះលើដីនោះ តាំងពីឆ្នាំ១៩៧៩ មកម៉្លេះ ។
នៅប៉ុន្មានឆ្នាំចុងក្រោយនេះ មានការបាញ់ប្រហារដោយគ្រាប់កាំភ្លើងជាច្រើនទៅលើអ្នកតវ៉ាដីធ្លី ពីសំណាក់កងកម្លាំងចម្រុះ ក្នុងនោះមានកម្លាំងទាហាន ផងដែរ ។ កាលពីខែមករា ឆ្នាំ២០១៩ បុរសម្នាក់ ត្រូវបានបាញ់ដោយគ្រាប់កាំភ្លើង នៅក្នុងខេត្តព្រះសីហនុ ដែលបណ្ដាលឱ្យគាត់ ក្លាយជាជនពិការមិនអាចសូម្បីតែធ្វើចលនា បន្ទាប់ពីកម្លាំងចម្រុះបានប្រើប្រាស់ហិង្សាទៅលើអ្នកតវ៉ា និងបានបាញ់ប្រហារដោយគ្រាប់កាំភ្លើង អំឡុងពេលអនុវត្តដីការរបស់តុលាការកំពូល ជុំវិញវិវាទដីធ្លីមួយ នៅក្នុងខេត្តនេះ ។ កាលពីខែមីនា ឆ្នាំ២០១៨ មនុស្សចំនួនបីនាក់ បានត្រូវគ្រាប់កាំភ្លើងនៅក្នុងខេត្តក្រចេះ ផងដែរ បន្ទាប់ពីកម្លាំងចម្រុះ បានបាញ់ប្រហារដោយគ្រាប់កាំភ្លើងទៅលើប្រជាពលរដ្ឋប្រមាណជា ៣០០នាក់ ដែលកំពុងតវ៉ាប្រឆាំងនឹងការបណ្ដេញដោយហិង្សា ៕
Posted by បង ឈួន on Wednesday, June 2, 2021
MP3 format: ស្តាប់សំឡេងជាភាសាខ្មែរ
- ចំណងជើង & មូលបទ
- សិទ្ធិដីធ្លី