សកម្មជនបរិស្ថាន៤នាក់ ត្រូវបានចោទប្រកាន់ក្នុងការធ្វើទុក្ខបុកម្នេញចុងក្រោយនេះ
ចេញផ្សាយ ថ្ងៃទី២០ ខែមិថុនា ឆ្នាំ២០២១នាថ្ងៃអាទិត្យនេះ សមាជិកចំនួន៤នាក់នៃក្រុមចលនាមាតាធម្មជាតិ រួមមានកញ្ញា ស៊ុន រដ្ឋា លោក លី ចាន់ដារ៉ាវុត លោក យីម លាងហ៊ី និងលោក Alejandro Gonzalez-Davidson ត្រូវបានចោទប្រកាន់ពី “បទរួមគំនិតក្បត់ និងបទប្រមាថចំពោះអង្គព្រះមហាក្សត្រ” តាមបញ្ញត្តិមាត្រា ៤៣៧ (ស្ទួន) និងមាត្រា ៤៥៣ នៃក្រមព្រហ្មទណ្ឌ ដែលមានទោសអតិបរមានីមួយៗរហូតដល់ ៥ឆ្នាំ និង១០ឆ្នាំ យោងតាមសារព័ត៌មានក្នុងស្រុកមួយ ។
កញ្ញា រដ្ឋា និងលោក ចាន់ដារ៉ាវុត ត្រូវបានចាប់ខ្លួនរួមគ្នាជាមួយសកម្មជនម្នាក់ទៀតគឺ លោក សិដ្ឋ ឈីវលីម៉េង នៅរាជធានីភ្នំពេញ ។ អ្នកទាំង៣ ត្រូវបានចាប់ខ្លួន នាព្រឹកថ្ងៃពុធ ដែលតាមមើលទៅអាចពាក់ព័ន្ធនឹងសកម្មភាពរបស់ពួកគេ ក្នុងការចងក្រងឯកសារលើការបង្ហូរទឹកស្អុយចូលទៅក្នុងបឹងទន្លេសាប នៅក្នុងខណ្ឌដូនពេញ រាជធានីភ្នំពេញ ។ ក្រោយមក លោក ឈីវលីម៉េង ត្រូវបានដោះលែងពីការឃុំឃាំងវិញ បន្ទាប់ពីត្រូវបានឃាត់ខ្លួនរយៈពេល ២៤ម៉ោង នៅនាយកដ្ឋានគ្រប់គ្រងសន្ដិសុខឯកជននៃក្រសួងមហាផ្ទៃ ខណៈដែលកញ្ញា រដ្ឋា និងលោក ចាន់ដារ៉ាវុត កំពុងស្ថិតក្រោមការឃុំខ្លួននៅឡើយ ។
ដូចគ្នាផងដែរ កាលពីថ្ងៃពុធ នគរបាលស្រុកកោះធំ ខេត្តកណ្ដាល បានកោះហៅ លោក យីម លាងហ៊ី សកម្មជនបរិស្ថាន ដើម្បីធ្វើការសាកសួរ ហើយលោកត្រូវបានចាប់ខ្លួន បន្ទាប់ពីមកដល់ប៉ុស្ដិ៍នគរបាល ។ ក្រោយមក លោកត្រូវបានបញ្ជូនមករាជធានីភ្នំពេញ និងបញ្ជូនទៅតុលាការ ជាមួយកញ្ញា រដ្ឋា និងលោក ចាន់ដារ៉ាវុត ។ លោក លាងហ៊ី កញ្ញា រដ្ឋា និងលោក ចាន់ដារ៉ាវុត ប្រឈមនឹងការផ្ដន្ទាទោសដាក់ពន្ធនាគារចន្លោះពី ១ឆ្នាំ ទៅ ៥ឆ្នាំ សម្រាប់បទប្រមាថចំពោះអង្គព្រះមហាក្សត្រ ក៏ដូចជាការពិន័យជាប្រាក់ចន្លោះពី ២លាន ទៅ ១០លានរៀល (ប្រមាណចន្លោះពី ៥០០ដុល្លារ ទៅ ២៥០០ដុល្លារ) ហើយពួកគេក៏ប្រឈមនឹងការផ្តន្ទាទោសដាក់ពន្ធនាគារចន្លោះពី ៥ឆ្នាំ ទៅ ១០ឆ្នាំ ផងដែរ សម្រាប់បទរួមគំនិតក្បត់ ។ ជនជាតិអេស្ប៉ាញឈ្មោះ Alejandro Gonzalez-Davidson ក៏ត្រូវបានចោទប្រកាន់ពីបទចោទដូចគ្នា ដែលលោកត្រូវបានបណ្ដេញចេញពីប្រទេសកម្ពុជា កាលពីឆ្នាំ២០១៥ ពាក់ព័ន្ធនឹងសកម្មភាពរបស់លោក ក្នុងនាមជាសហស្ថាបនិកនៃចលនាបរិស្ថាន មាតាធម្មជាតិកម្ពុជា ។
លោក លាង ហ៊ី អាយុ ៣២ ឆ្នាំ ជានិស្សិតកំពុងសិក្សាថ្នាក់បរិញ្ញាបត្រជាន់ខ្ពស់ នៅវិទ្យាស្ថានភាសាបរទេសនៃសាកលវិទ្យាល័យភូមិន្ទភ្នំពេញ តាមរយៈកម្មវិធីអាហារូបករណ៍ ។ កញ្ញា រដ្ឋា អាយុ ២៦ ឆ្នាំ ជាគណនេយ្យករ ដែលទើបបញ្ចប់ការសិក្សាពីសាកលវិទ្យាល័យកម្ពុជា ដែលកញ្ញាបានសិក្សាតាមរយៈកម្មវិធីអាហារូបករណ៍ផងដែរ ។ លោក ចាន់ដារ៉ាវុត អាយុ ២២ ឆ្នាំ ជានិស្សិតឆ្នាំទី៤ ជំនាញនីតិសាស្រ្ត នៃសាកលវិទ្យាល័យភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ច ។
កាលពីខែមុន សាលាដំបូងរាជធានីភ្នំពេញ បានផ្ដន្ទាទោសសកម្មជនបរិស្ថាន ៣នាក់ ផ្សេងទៀត ដែលកំពុងជាប់ឃុំឃាំងនិងដែលជាប់ពាក់ព័ន្ធនឹងចលនាមាតាធម្មជាតិ ឱ្យជាប់ពន្ធនាគារចន្លោះពី ១៨ខែ ទៅ ២០ខែ ដោយសារការរៀបចំដើរតវ៉ាបែបអហិង្សាដោយស្ត្រីម្នាក់ ដើម្បីបង្ហាញពីកង្វល់នៃការលុបបឹងតាមោក នៅក្នុងរាជធានីភ្នំពេញ ។ សកម្មជនមាតាធម្មជាតិ២នាក់ផ្សេងទៀត គឺលោក Alejandro Gonzalez-Davidson និងកញ្ញា ជា គន្ធីន ក៏ត្រូវបានកាត់ទោសដោយកំបាំងមុខ នៅពេលនោះផងដែរ ៕
MP3 format: ស្តាប់សំឡេងជាភាសាខ្មែរ
- ចំណងជើង & មូលបទ
- សិទិ្ធបញ្ចេញមតិ និងចូលរួម មាតាធម្មជាតិ