ប្រជាពលរដ្ឋជាង ១០០០នាក់ ប្រមូលផ្ដុំគ្នានៅភ្នំពេញ ដើម្បីស្វែងរកដំណោះស្រាយលើបញ្ហាដីធ្លី
ចេញផ្សាយ ថ្ងៃទី៣០ ខែមីនា ឆ្នាំ២០២៣
សមាជិកសហគមន៍ប្រមាណជាង ១០០០នាក់ មកពីខេត្តសៀមរាប កោះកុង កំពង់ស្ពឺ និងខេត្តព្រះវិហារ បានប្រមូលផ្ដុំគ្នា នៅរាជធានីភ្នំពេញ ចាប់ពីថ្ងៃទី២៧ ដល់ថ្ងៃទី២៩ ខែមីនា ឆ្នាំ២០២៣ ដើម្បីដាក់ញត្តិស្វែងរកដំណោះស្រាយទៅលើបញ្ហាជម្លោះដីធ្លី ដែលធ្វើឱ្យប៉ះពាល់ដល់ផ្ទះសម្បែង និងជីវភាពរស់នៅរបស់ពួកគេ ទោះបីជាករណីខ្លះមានការរារាំងក្នុងការធ្វើដំណើរ និងការជួបជុំគ្នា ពីសំណាក់អាជ្ញាធរមូលដ្ឋានក៏ដោយ ។
នៅថ្ងៃទី២៧ និង២៨ ខែមីនា ប្រជាពលរដ្ឋប្រមាណ ១៥០នាក់ មកពីសហគមន៍ចំនួន៧ ក្នុងខេត្តសៀមរាប បានជួបជុំគ្នា ក្នុងរាជធានីភ្នំពេញ ដោយអ្នកតំណាងរបស់ពួកគេ បានដាក់ញត្តិទៅក្រសួងមហាផ្ទៃ និងក្រសួងការពារជាតិ ក្នុងនាមប្រជាពលរដ្ឋ ១ម៉ឺនគ្រួសារ ដែលរស់នៅក្នុងតំបន់ឧទ្យានអភិរក្សអង្គរ ជាតំបន់បេតិកភណ្ឌពិភពលោកនៃអង្គការ អប់រំ វិទ្យាសាស្រ្ត និងវប្បធម៍ នៃសហប្រជាជាតិ ហៅកាត់ថា “អង្គការយូណេស្កូ” ដែលរួមមានប្រាសាទអង្គរវត្ត ជាដើម ។ ញត្តិរបស់ពួកគេមានរៀបរាប់ពី ការស្នើសុំឱ្យរាជរដ្ឋាភិបាលប្រគល់ប័ណ្ណកម្មសិទ្ធិឱ្យប្រជាពលរដ្ឋ ចេញបទប្បញ្ញត្តិអភិរក្សឃ្លាំងទឹក៧៨ ក៏ដូចជាផ្ដល់សំណងសមរម្យចំពោះអ្នកដែលបានរងផលប៉ះពាល់ពីការបណ្ដេញចេញនៅក្នុងទីតាំងនោះ ។ រាជរដ្ឋាភិបាល ធ្លាប់បានលើកឡើងថា ការបណ្ដេញចេញគឺចាំបាច់ ដើម្បីរក្សាសម្បត្តិបេតិកភណ្ឌពិភពលោកនៃអង្គការយូណេស្កូ ។
សហគមន៍ខេត្តសៀមរាប បានបន្តដំណើរទៅការិយាល័យអង្គការយូណេស្កូ នៅក្នុងរាជធានីភ្នំពេញ ។ តំណាងសហគមន៍ បានលើកឡើងថា ពួកគាត់ទទួលបានការឆ្លើយតបនៅការិយាល័យអង្គការយូណេស្កូថា ពួកគាត់មិនអាចដាក់ញត្តិនៅទីនេះបានទេ ដោយសារអង្គការយូណេស្កូ មិនធ្វើការលើបញ្ហាដីធ្លីនោះទេ ។ ការជួបជុំគ្នា ត្រូវបានតាមដានដោយនគរបាល កម្លាំងសន្តិសុខ និងអាជ្ញាធរស្លៀកពាក់ស៊ីវិល ផងដែរ ។
នៅក្នុងការប្រមូលផ្ដុំគ្នាដាច់ដោយឡែកមួយទៀត កាលពីថ្ងៃទី២៩ ខែមីនានេះ ប្រជាពលរដ្ឋច្រើនជាង ១០០០នាក់ មកពីសហគមន៍ចំនួន៣ក្នុងខេត្តកំពង់ស្ពឺ និងសហគមន៍ចំនួន៧ក្នុងខេត្តកោះកុង ក៏ដូចជាតំណាងសហគមន៍មកពីខេត្តព្រះវិហារ បានជួបជុំគ្នា នៅក្នុងរាជធានីភ្នំពេញ ដើម្បីដាក់ញត្តិទៅកាន់ក្រសួងដែនដី នគរូបនីយកម្ម និងសំណង់ ក្រសួងមហាផ្ទៃ ខុទ្ទកាល័យសម្ដេចនាយករដ្ឋមន្រ្តី និងការិយាល័យប្រតិភូសហភាពអឺរ៉ុបប្រចាំនៅកម្ពុជា ។ សហគមន៍នៅខេត្តកំពង់ស្ពឺ និងខេត្តកោះកុងទាំងនេះ មានជម្លោះដីធ្លីដ៏រ៉ាំរ៉ៃជាមួយក្រុមហ៊ុនដែលមានទំនាក់ទំនងនឹងឧកញ៉ា លី យ៉ុងផាត់ និងឧកញ៉ា ហេង ហ៊ុយ ។ ញត្តិរបស់ពួកគេ ស្នើសុំឱ្យរាជរដ្ឋាភិបាលជួយជនរងគ្រោះនៃការរំលោភយកដីធ្លី ដោយទាមទារមកវិញនូវដីធ្លី ដែលកំពុងកាន់កាប់ដោយក្រុមហ៊ុន ពាក់ព័ន្ធនឹងឧកញ៉ាទាំងពីរ ។ អាជ្ញាធរស្លៀកពាក់ស៊ីវិល និងនគរបាល ប្រមាណជា ៤០នាក់ ក៏បានបង្ហាញវត្តមាននៅទីនោះ ផងដែរ ។
ម្ដងហើយម្ដងទៀត អាជ្ញាធរបានរារាំងសមាជិកសហគមន៍ ខណៈដែលពួកគេព្យាយាម ធ្វើដំណើរពីសហគមន៍របស់ពួកគេក្នុងខេត្តកំពង់ស្ពឺ និងខេត្តកោះកុង ទៅរាជធានីភ្នំពេញ ។ នគរបាល និងអាជ្ញាធរមូលដ្ឋាន បានរារាំងសហគមន៍ក្នុងខេត្តកំពង់ស្ពឺ នៅពេលចាប់ផ្ដើមធ្វើដំណើរ ដោយសមាជិកសហគមន៍មកពីភូមិពាមរស់ ត្រូវបង្ខំចិត្តដើរដោយថ្មើរជើងចម្ងាយ ១០គីឡូម៉ែត្រ មុនពេលស្វែងរកមធ្យោបាយធ្វើដំណើរផ្សេង ។ អាជ្ញាធរ ក៏បានរារាំងរថយន្តជាច្រើនគ្រឿង ដែលដឹកសមាជិកសហគមន៍រាប់រយនាក់ ពីខេត្តកោះកុង និងខេត្តកំពង់ស្ពឺ នៅតាមផ្លូវធ្វើដំណើរទៅរាជធានីភ្នំពេញ ដោយធ្វើការទាមទារឈ្មោះ និងឯកសារអត្តសញ្ញាណកម្មរបស់ពួកគាត់ ជាដើម ។ សមាជិកសហគមន៍ប្រមាណ ៥០០នាក់ មកពីខេត្តកោះកុង បានធ្វើដំណើរថ្មើរជើងយ៉ាងឆ្ងាយ នៅព្រឹកព្រលឹម រហូតទាល់តែរថយន្តធ្វើដំណើររបស់ពួកគេត្រូវបានអនុញ្ញាតឱ្យបន្តដំណើរវិញ ៕
MP3 format: ស្តាប់សំឡេងជាភាសាខ្មែរ
- ចំណងជើង & មូលបទ
- សិទិ្ធបញ្ចេញមតិ និងចូលរួម សិទ្ធិដីធ្លី លី យ៉ុងផាត់
