សហគមន៍ដីធ្លីជាច្រើនក្នុងខេត្តកោះកុងមកដាក់ញត្តិក្នុងរាជធានីភ្នំពេញ
ចេញផ្សាយ ថ្ងៃទី៤ ខែសីហា ឆ្នាំ២០១៦ថ្ងៃនេះ ប្រជាពលរដ្ឋចំនួន ៧៤នាក់ ដែលមកពីបណ្ដាសហគមន៍មួយចំនួនក្នុងឃុំ ជីខលើ ស្រុកស្រែអំបិល ខេត្តកោះកុង បានដាក់ញត្តិចំនួនប្រាំជូន រាជរដ្ឋាភិបាល រដ្ឋសភាជាតិ និងស្ថានទូតមួយចំនួនក្នុងរាជធានីភ្នំពេញដើម្បីស្វែងរកដំណោះស្រាយបញ្ហាជម្លោះដីធ្លីរបស់អ្នកទាំងនោះដែលបានអូសបន្លាយពេលជាយូរមកហើយ។
នេះជាការតវ៉ាថ្មីមួយទៀត ក្នុងចំណោមការតវ៉ាជាច្រើនរបស់សហគមន៍ ដែលជំទាស់ទៅនឹងការរំលោភយកដីធ្លីពីសំណាក់ក្រុមហ៊ុនផលិតស្ករអំពៅក្នុងស្រុកស្រែអំបិល។ បញ្ហានេះបានកើតឡើងចាប់តាំងពីឆ្នាំ២០០៦ ពេលដែលមានការផ្ដល់ដីសម្បទានសេដ្ឋកិច្ចជាបន្តបន្ទាប់ដើម្បីដាំអំពៅនៅក្នុងខេត្តកោះកុង។
ការតវ៉ាដោយអហិង្សានេះបានឲ្យឃើញថា អ្នកតំណាងជាច្រើននាក់ កាន់បដា និងទង់ជាតិ ដាក់ញត្តិជូនទៅក្រសួងរៀបចំដែនដីនគរូបនីយកម្ម និងសំណង់ ក្រសួងកសិកម្ម រុក្ខប្រមាញ់ និងនេសាទ និងក្រសួងពាណិជ្ជកម្ម។ ញតិ្តមួយចំនួនទៀត ត្រូវបានដាក់ជូនទៅស្ថានទូតសហភាពអឺរ៉ុបប្រចាំនៅកម្ពុជា ហើយញត្តិចុងក្រោយត្រូវបានដាក់ជូនរដ្ឋសភាជាតិ។
បន្ទាប់ពីការដាក់ញត្តិរបស់សហគមន៍ដីធ្លីទាំងនោះជូនទៅរដ្ឋសភាជាតិ អ្នកស្រី ផាវ ញើង ដែលជាតំណាងសហគមន៍ ជីខលើ បានធ្វើសន្និសីទសារព័ត៌មានខ្លីមួយអំឡុងពេលដែលអ្នកស្រីអំពាវនាវឲ្យរាជរដ្ឋាភិបាល និងគណបក្សជំទាស់ឲ្យជួយដោះស្រាយជម្លោះដីធ្លីដែលកើតឡើងជាយូរមកហើយ។ អ្នកស្រីបានសម្ដែងការមិនពេញចិត្តដែលរដ្ឋសភាជាតិមិនទាន់បានធ្វើអន្តរាគមន៍ស្វែងរកដំណោះស្រាយបញ្ហានេះ ដោយហេតុថានេះជាពេលវិស្សមកាល។
- ចំណងជើង & មូលបទ
- សិទិ្ធបញ្ចេញមតិ និងចូលរួម សិទ្ធិដីធ្លី