សកម្មជនបឹងកក់ ត្រូវបានផ្តន្ទាទោសពន្ធនាគារ ប៉ុន្តែត្រូវព្យួរទោស
ចេញផ្សាយ ថ្ងៃទី២៤ ខែសីហា ឆ្នាំ២០១៨
នាព្រឹកនេះ សកម្មជនតំបន់បឹងកក់ អ្នកស្រី ទេព វន្នី និងសមាជិកសហគមន៍របស់អ្នកស្រីចំនួនប្រាំនាក់ផ្សេងទៀត ត្រូវបានតុលាការផ្តន្ទាទោសពីបទ ធ្វើការ “គម្រាមថានឹងសម្លាប់” ពាក់ព័ន្ធនឹងបណ្តឹងមួយដែលត្រូវបានដាក់ដោយអតីតសមាជិកសហគមន៍បឹងកក់ម្នាក់ កាលពីខែមីនា ឆ្នាំ២០១២។ អ្នកទាំងនោះ ត្រូវបានតុលាការផ្តន្ទាទោសដាក់ពន្ធនាគារចំនួន ៦ខែ ប៉ុន្តែទោសទាំងអស់ត្រូវព្យួរ ហើយបទចោទមួយផ្សេងទៀត អំពី “ជេរប្រមាថជាសាធារណៈ” ត្រូវបានតុលាការទម្លាក់ការចោទប្រកាន់។
សំណុំរឿងនេះ ត្រូវបានយកមកពិនិត្យឡើងវិញ កាលពីចុងឆ្នាំ ២០១៦ ទោះបីជាដើមបណ្តឹងបានដកពាក្យបណ្តឹងតាំងពីខែតុលា ឆ្នាំ២០១៦។ ពលរដ្ឋបឹងកក់ទាំងប្រាំមួយនាក់ រួមមាន អ្នកស្រី ទេព វន្នី ង៉ែត ឃុន ឆេង លាភ គង់ ចន្ថា តុល ស្រីពៅ និងហេង មុំ។
សវនាការជំនុំជម្រះ ត្រូវបានបើកតាំងពីខែកក្កដា ឆ្នាំ២០១៧ ប៉ុន្តែត្រូវបានពន្យាពេលដោយចៅក្រមជំនុំជម្រះ ដោយមិនកំណត់ពេលវេលា ព្រោះមិនមានសាក្សីដាក់បន្ទុក មានវត្តមាននៅក្នុងបន្ទប់សវនាការ។ នៅថ្ងៃនេះ សវនាការ ត្រូវបានបន្ត ដោយមានវត្តមានចុងចោទចំនួនបួននាក់ (អ្នកស្រី ទេព វន្នី ង៉ែត ឃុន គង់ ចន្ថា និងឆេង លាភ) ហើយចុងចោទពីរនាក់ផ្សេងទៀត និងសាក្សីប្រាំនាក់អវត្តមាន។
នៅក្រៅពន្ធនាគារ ពលរដ្ឋប្រមាណ ២០នាក់ មកពីសហគមន៍ដីធ្លី និងសង្គមស៊ីវិល បានឈរយ៉ាងស្ងៀមស្ងាត់ នៅមុខតុលាការក្រុងភ្នំពេញ ដើម្បីគាំទ្រដល់សមាជិកសហគមន៍នៅក្នុងសវនាការ។
អ្នកទាំងនោះ ត្រូវបានតុលាការចោទពីបទ “គម្រាមថានឹងសម្លាប់” យោងតាមមាត្រា ២៣៣ នៃក្រមព្រហ្មទណ្ឌ និងផ្តន្ទាទោសពន្ធនាគារ ចំនួន ៦ខែ ប៉ុន្តែត្រូវព្យួរ។ បទចោទអំពី “ជេរប្រមាថជាសាធារណៈ” តាមមាត្រា ៣០៧ ត្រូវបានលើកចោលតាមសំណើរសុំរបស់ព្រះរាជអាជ្ញា។
អ្នកស្រី ទេព វន្នី ត្រូវបានដោះលែងពីពន្ធនាគារ កាលពីថ្ងៃច័ន្ទ បន្ទាប់ពីទទួលបានព្រះរាជទានលើកលែងទោសចំនួនពីរករណី ពីព្រះមហាក្សត្រ (ករណីមួយ មានរយៈពេល ៣០ ខែ និងករណីមួយទៀត មានរយៈពេល ៦ខែ ដែលអ្នកស្រីបានជាប់ក្នុងពន្ធនាគារ ម២)។ ការដោះលែងអ្នកស្រី ត្រូវបានធ្វើឡើងស្របពេលមានការដោះលែងអ្នកវិភាគផ្នែកនយោបាយ លោក គឹម សុខ ដែលបានទទួលទោសរួចរាល់កាលពីថ្ងៃសុក្រសប្តាហ៍មុន និង អតីតអ្នកកាសែតវិទ្យុអាស៊ីសេរី លោក អ៊ួន ឈិន និងលោក យាង សុធារិន ដែលត្រូវបានដោះលែងឲ្យនៅក្រៅឃុំបណ្តោះអាសន្ន កាលពីថ្ងៃ អង្គារ៍។
- ឯកសារទាក់ទង
- ចំណងជើង & មូលបទ
- សិទិ្ធបញ្ចេញមតិ និងចូលរួម សិទ្ធិដីធ្លី
