អាជ្ញាធរខេត្តកោះកុង រារាំងយុទ្ធនាការជិះកង់របស់សកម្មជនបរិស្ថាន
ចេញផ្សាយ ថ្ងៃទី៤ ខែមិថុនា ឆ្នាំ២០២០
យុវជន ជាសកម្មជនបរិស្ថានមួយក្រុម ត្រូវបានរំខាន និងសាកសួររយៈពេលជាងមួយថ្ងៃ មុនពេលដែលអ្នកទាំងនោះ ត្រូវបានអាជ្ញាធរដោះលែងកាលពីរសៀលនេះ ។ សកម្មជនទាំងនេះ ត្រូវបាននគរបាលរារាំង ដោយមិនឱ្យបន្តការជិះកង់ពីទីក្រុងខេមរភូមិន្ទនៃខេត្តកោះកុង ឆ្ពោះមកកាន់រាជធានីភ្នំពេញ ដែលការជិះកង់នេះ ជាផ្នែកមួយនៃយុទ្ធនាការ “សង្គ្រោះកោះកុងក្រៅ” របស់អ្នកទាំងនោះ ។ ការរារាំង និងសាកសួរអស់ជាច្រើនម៉ោងនេះ គឺជាការបំភិតបំភ័យមួយដល់យុវជន ដែលស្រលាញ់ និងចង់ការពារធនធានធម្មជាតិ ។
ក្រុមយុវជន ដែលរួមមានសមាជិកចលនាមាតាធម្មជាតិ ត្រូវបានអាជ្ញាធរក្នុងតំបន់ចោទប្រកាន់ថា មានជាប់ពាក់ព័ន្ធនឹងអតីតគណបក្សជំទាស់ ដែលបច្ចុប្បន្នត្រូវបានតុលាការកំពូលរំលាយ ។ នគរបាល នៅតែបដិសេធ ដោយមិនប្រគល់កង់របស់យុវជនទាំងនោះត្រឡប់មកវិញទេ ដោយនឹងប្រគល់សងវិញ នៅក្រោយថ្ងៃទី៥ ខែមិថុនា ដែលជាទិវាបរិស្ថានពិភពលោក ។ ការឃាត់ទុកកង់របស់ក្រុមយុវជននេះ ធ្វើឲ្យអាកខានការធ្វើយុទ្ធនាការជិះកង់ដោយអហិង្សា មកកាន់រាជធានីភ្នំពេញ ។
មន្ត្រីនគរបាលថ្នាក់ខេត្ត បានឃាត់ទុកកង់របស់ក្រុមយុវជន កាលពីម្សិលមិញ ដើម្បីរារាំងក្រុមយុវជនពីការបន្តជិះកង់មកកាន់រាជធានីភ្នំពេញ ដើម្បីដាក់ញត្តិអំពាវនាវឱ្យដាក់តំបន់កោះកុងក្រៅ ជាតំបន់អភិរក្ស ឬឧទ្យានជាតិ ។ នៅពេលដែលក្រុមយុវជនព្យាយាមបន្តដំណើរដោយថ្មើជើង អ្នកទាំងនោះ ត្រូវបានអាជ្ញាធររារាំងនៅពេលយប់ ដោយឱ្យយុវជនទាំងនោះប្រគល់ញត្តិជូនអាជ្ញាធរទាំងពាក់កណ្តាលយប់ ។
បន្ទាប់ពីបដិសេធ ដោយមិនប្រគល់ញត្តិ ក្រុមយុវជនជាសកម្មជនបរិស្ថានទាំងនោះ បានត្រឡប់ទៅកាន់អធិការដ្ឋាននគរបាលស្រុកកោះកុង កាលពីព្រឹកមិញ ដើម្បីទាមទារកង់របស់អ្នកទាំងនោះមកវិញ ។ ក៏ប៉ុន្តែនៅអធិការដ្ឋាន ក្រុមយុវជន ត្រូវបានអាជ្ញាធរសាកសួរអស់ជាច្រើនម៉ោង ។ អាជ្ញាធរ នៅតែទាមទារម្តងហើយម្តងទៀត ដោយចង់ដឹងអំពីអ្នកដែលនៅពីក្រោយការធ្វើយុទ្ធនាការ មូលហេតុដែលអ្នកទាំងនោះប្រើប្រាស់ពាក្យ “សង្គ្រោះ” នៅក្នុងយុទ្ធនាការ និងប្រភពថវិកាដែលអ្នកទាំងនោះយកមកធ្វើយុទ្ធនាការ ។
ក្រោយពីធ្វើការសាកសួរ នគរបាលបានរឹបអូសយកអាវយឺតរបស់អ្នកទាំងនោះ ដែលមានសរសេរអក្សរថា “សង្គ្រោះកោះកុងក្រៅ” ដោយលើកមូលហេតុថាពាក្យ “សង្គ្រោះ” គឺដូចទៅនឹងឈ្មោះគណបក្សសង្គ្រោះជាតិដែលត្រូវបានតុលាការរំលាយ ។ សកម្មជនទាំងនោះ គ្រោងនឹងត្រឡប់មកភ្នំពេញ ដោយជិះរថយន្ត ដើម្បីមកដាក់ញត្តិ ។
យុទ្ធនាការ “សង្គ្រោះកោះកុងក្រៅ” ត្រូវបានចាប់ផ្តើមកាលពីដើមខែកក្កដា ឆ្នាំមុន ដើម្បីអំពាវនាវដល់ក្រសួងបរិស្ថាន ក្នុងការដាក់តំបន់កោះកុងក្រៅជាតំបន់ឧទ្យានជាតិ ។ សកម្មជនបរិស្ថាន បានលើកឡើងពីគុណវិបត្តិ ប្រសិនបើរាជរដ្ឋាភិបាលមិនអាចការពារតំបន់នេះបាន ដោយអាចនឹងមានការអន្តរាយផ្នែកបរិស្ថាន ប្រសិនបើធនធានធម្មជាតិក្នុងតំបន់នេះ ត្រូវបានលក់ទៅឱ្យក្រុមហ៊ុនឯកជន ។
- ចំណងជើង & មូលបទ
- សិទិ្ធបញ្ចេញមតិ និងចូលរួម មាតាធម្មជាតិ
