យុវជនសកម្មជន ត្រូវបានឃាត់ខ្លួន ខណៈដែលអាជ្ញាធររារាំងព្រះសង្ឃសូត្រធម៌ឧទ្ទិសដល់បណ្ឌិត កែម ឡី
ចេញផ្សាយ ថ្ងៃទី៨ ខែកក្កដា ឆ្នាំ២០២០
យុវជនជាសកម្មជនម្នាក់ ត្រូវបានឃាត់ខ្លួន នៅពេលដែលព្យាយាមចូលទៅស្ថានីយប្រេងឥន្ធនៈ កាល់តិច បូកគោ ដើម្បីចូលរួមរំលឹកខួប ៤ឆ្នាំ នៃការធ្វើឃាតលើលោកបណ្ឌិត កែម ឡី ។ ការឃាត់ខ្លួន ត្រូវបានធ្វើឡើង នៅខណៈដែលសកម្មជន និងព្រះសង្ឃមួយក្រុម ត្រូវបានកងកម្លាំងចម្រុះ ដែលមាន នគរបាល និងកងសន្តិសុខ រារាំង ដោយមិនឱ្យចូលទៅស្ថានីយប្រេងឥន្ធនៈ កាល់តិច ដែលជាកន្លែងលោកបណ្ឌិត ត្រូវបានគេបាញ់សម្លាប់ ។
សកម្មជនម្នាក់ ដែលមានពាក់អាវយឺតមានរូបលោក កែម ឡី ត្រូវបានឃាត់ខ្លួនដោយនគរបាល ភ្លាមៗនៅពេលដែលលោកមកដល់ទីតាំងរំលឹកខួប ។ លោក ត្រូវបានអាជ្ញាធរដោះលែងវិញ បន្ទាប់ពីចុះហត្ថលេខាលើកិច្ចសន្យាជាមួយអាជ្ញាធរ ។
កងកម្លាំងចម្រុះ បានស្រាក់ដៃគ្នា ដើម្បីរារាំងសកម្មជន និងព្រះសង្ឃទាំងនោះ ដោយមិនឱ្យចូលទៅស្ថានីយ ដែលជាកន្លែងលោកបណ្ឌិត ត្រូវបានគេបាញ់សម្លាប់ ខណៈដែលលោកកំពុងទទួលទានកាហ្វេនៅព្រឹកមួយកាលពីថ្ងៃ ១០ ខែកក្កដា ឆ្នាំ២០១៦ ។
ក្រុមយុវជន ដែលរួមមានក្រុមយុវជនខ្មែរថាវរៈ ក្រុមយុវជន Not1More និងសមាគមសម្ព័ន្ធនិស្សិតបញ្ញាវ័ន្តខ្មែរ និងក្រុមព្រះសង្ឃ បានបង្ខំចិត្តសូត្រធម៌ឧទ្ទិសកុសលជូនលោកបណ្ឌិត ពីចម្ងាយប្រមាណ ១០០ ម៉ែត្រពីទីតាំងស្ថានីយប្រេងឥន្ធនៈ ជាកន្លែងដែលលោក ត្រូវបានខ្មាន់កាំភ្លើងបាញ់សម្លាប់ ។
កាលពីឆ្នាំមុន អាជ្ញាធរ បានឃាត់ខ្លួនពលរដ្ឋ ៧នាក់ អស់រយៈពេលពីរថ្ងៃ នៅពេលដែលអ្នកទាំងនោះព្យាយាមចូលទៅរំលឹកខួបនៃការស្លាប់របស់លោកបណ្ឌិត។ អ្នកទាំងនោះរួមមាន លោក គង់ រ៉ៃយ៉ា និងលោក សួង នាគព័ន្ធ ដែលអ្នកទាំងពីរ ត្រូវបានតុលាការចោទប្រកាន់ពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍ ។ លោក រ៉ៃយ៉ា ត្រូវបានតុលាការកាត់ទោសកំបាំងមុខ ហើយទោសត្រូវតុលាការព្យួរកាលពីខែមិថុនា ឆ្នាំ២០២០ ។
ទោះបី លោក អឿត អាង ដែលជាអតីតទាហាន ត្រូវបានតុលាការផ្តន្ទាទោសជាប់ពន្ធនាគារមួយជីវិត ក្នុងករណីឃាតកម្មលោកបណ្ឌិត កាលពីឆ្នាំ ២០១៧ ក៏ដោយ ក៏ការស៊ើបអង្កេតត្រូវបានសាធារណជនជាតិ និងអន្តរជាតិអះអាងថាមានភាពមិនប្រក្រតី និងមិនទាន់គ្រប់ជ្រុងជ្រោយនៅឡើយ ។ អ្នកគាំទ្រលោកបណ្ឌិត ក៏ដូចជាក្រុមសិទិ្ធមនុស្សជាតិ និងអន្តរជាតិ នៅតែអំពាវនាវ សូមឲ្យមានការស៊ើបអង្កេតឯករាជ្យទៅលើករណីឃាតកម្មនេះ ៕
- ចំណងជើង & មូលបទ
- សិទិ្ធបញ្ចេញមតិ និងចូលរួម ឃាតកម្ម កែម ឡី
