លោក យួន ឈីវ អ្នកសារព័ត៌មាននៅខេត្តកោះកុង ត្រូវបានផ្ដន្ទាទោសពីបទញុះញង់
ចេញផ្សាយ ថ្ងៃទី៣០ ខែកញ្ញា ឆ្នាំ២០២១
នាថ្ងៃនេះ សាលាដំបូងខេត្តកោះកុង បានផ្ដន្ទាទោសលោក យួន ឈីវ ដែលជាចាងហ្វាងការផ្សាយ គេហទំព័រកោះកុងទាន់ហេតុការណ៍ (www.kohkonghotnews.com) ពីបទញុះញង់ តាមបញ្ញត្តិមាត្រា ៤៩៤ និងមាត្រា ៤៩៥ នៃក្រមព្រហ្មទណ្ឌនៃព្រះរាជាណាចក្រកម្ពុជា ។ រយៈពេលតិចជាង ៧២ម៉ោង ក្រោយពីការឃាត់ខ្លួន លោកត្រូវបានផ្ដន្ទាទោសដាក់ពន្ធនាគារកំណត់រយៈពេល ១ឆ្នាំ ។
ការផ្ដន្ទាទោសនេះ បានធ្វើឡើងបន្ទាប់ពីមានការណែនាំរបស់សម្ដេច ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ ដើម្បីឱ្យស៊ើបអង្កេតលើលោក យួន ឈីវ ជុំវិញការចោទប្រកាន់ថាលោក បានបង្ហោះព័ត៌មានដែលមានលក្ខណៈខុសពីការពិត អំពីការពាក់ព័ន្ធរបស់លោកអភិបាលរងខេត្តកោះកុង នៅក្នុងវិវាទដីធ្លីមួយនៅខេត្តកោះកុង ។
លោក យួន ឈីវ ត្រូវបាននគរបាលស្រុកបទុមសាគរកោះហៅទៅសាកសួរកាលពីថ្ងៃអង្គារសប្ដាហ៍នេះ ហើយលោកបានបង្ហាញវត្តមានទៅឆ្លើយបំភ្លឺដោយផ្ទាល់ ។ លោកបានធ្វើលិខិតសុំអភ័យទោស ចំពោះលោកអភិបាលរងខេត្ត និងបានយល់ព្រមលុបចោលអត្ថបទ ដែលបានបង្ហោះនៅលើទំព័រហ្វេសប៊ុករបស់លោក មុនពេលករណីរបស់លោកត្រូវបានបញ្ជូនទៅតុលាការ ម្សិលមិញនេះ ។ សំណុំរឿងរបស់លោកត្រូវបានជំនុំជម្រះថ្ងៃនេះ ដោយពុំមានការបើកការស៊ើបអង្កេតតាមផ្លូវច្បាប់ ដោយផ្អែកលើហេតុផលថា លោកត្រូវបានចាប់ខ្លួនក្នុងពេលប្រព្រឹត្តបទល្មើសជាក់ស្ដែង ។
ច្បាប់ស្ដីពីរបបសារព័ត៌មាន ឆ្នាំ១៩៩៥ បានអនុញ្ញាតឱ្យមានការបង់សំណងការខូចខាត ដើម្បីដោះស្រាយបញ្ហានៃករណីព័ត៌មានដែលមានលក្ខណៈមិនពិត ដែលបានផ្សព្វផ្សាយដោយអ្នកសារព័ត៌មាន ។ ជំនួសឱ្យការប្រើប្រាស់ច្បាប់នេះ អាជ្ញាធរបានប្រើប្រាស់ក្រមព្រហ្មទណ្ឌដើម្បីចាប់អ្នកសារព័ត៌មានដាក់ពន្ធនាគារទៅវិញ ក្នុងពេលដែលមានការបន្តធ្វើទុក្ខបុកម្នេញលើសារព័ត៌មានឯករាជ្យនៅកម្ពុជា ។
លោក យួន ឈីវ បានប្រឈមនឹងការធ្វើទុក្ខបុកម្នេញម្ដងហើយម្ដងទៀតនៅទសវត្សរ៍ចុងក្រោយនេះ ក្នុងនោះមានការគំរាមសម្លាប់ ប្រើប្រាស់អំពើហិង្សា និងការធ្វើទុក្ខបុកម្នេញតាមផ្លូវតុលាការ ចំពោះការងាររបស់លោកផងដែរ ៕
- ចំណងជើង & មូលបទ
- វាយប្រហារលើអ្នកសារព័ត៌មាន និងបញ្ហាប្រព័ន្ធផ្សព្វផ្សាយ
