យុវជនបរិស្ថានមាតាធម្មជាតិ ត្រូវបានដោះលែងឱ្យនៅក្រៅឃុំ
ចេញផ្សាយ ថ្ងៃទី១២ ខែវិច្ឆិកា ឆ្នាំ២០២១យុវជនបរិស្ថានរបស់ក្រុមមាតាធម្មជាតិចំនួន ៦រូប ដែលកំពុងរងបណ្តឹងលើបទល្មើសមជ្ឈឹម និងឧក្រិដ្ឋ ត្រូវបានតុលាការសម្រេចដោះលែងឱ្យនៅក្រៅឃុំបណ្តោះអាសន្ននាថ្ងៃនេះ ។ ទីបំផុតអ្នកទាំងប្រាំមួយ អាចជួបជុំឳពុកម្តាយ និងក្រុមគ្រួសាររបស់អ្នកទាំងនោះវិញបាន ក្រោយពេលជាប់ក្នុងពន្ធនាគារអស់រយៈពេលជាង ១៤ខែ ។ ក៏ប៉ុន្តែអ្នកទាំងប្រាំមួយ នៅបន្តស្ថិតនៅក្រោមការត្រួតពិនិត្យតាមផ្លូវតុលាការដោយមានលក្ខខណ្ឌមួយចំនួន ដូចជាការតម្រូវឱ្យអ្នកទាំងនោះបង្ហាញខ្លួនចំពោះមុខអាជ្ញាធរជារៀងរាល់ខែ និងការកម្រិតសេរីភាពក្នុងការធ្វើដំណើររបស់អ្នកទាំងប្រាំមួយ ។
កញ្ញា ស៊ុន រដ្ឋា និងលោក យឹម លាងហ៊ី ត្រូវបានចាប់ខ្លួនកាលពីថ្ងៃទី១៦ ខែមិថុនា ឆ្នាំ២០២១ និងជាប់ចោទពីបទក្បត់ជាតិ និងប្រមាថព្រះមហាក្សត្រ យោងតាមមាត្រា ៤៥៣ និង ៤៣៧ (ស្ទួន) នៃក្រមព្រហ្មទណ្ឌ ។ លោក លី ចាន់ដារ៉ាវុត ក៏ត្រូវបានចាប់ខ្លួននៅថ្ងៃតែមួយ ហើយត្រូវបានចោទប្រកាន់ពីបទ ក្បត់ជាតិ ផងដែរ ។ លោក ថុន រដ្ឋា កញ្ញា ឡុង គន្ធា និងកញ្ញា ភួន កែវរស្មី ត្រូវបានចោទបន្ថែមពីបទ ក្បត់ជាតិ កាលពីខែកក្កដា ឆ្នាំ២០២១ នៅពេលដែលអ្នកទាំងបីកំពុងជាប់ពន្ធនាគារលើបទចោទ ញុះញង់ ដែលត្រូវបានតុលាការផ្តន្ទាទោសកាលពីខែឧសភា ឆ្នាំ២០២១ ។
កាលពីថ្ងៃទី៥ ខែវិច្ឆិកា សាលាឧទ្ធរណ៍រាជធានីភ្នំពេញ បានសម្រេចព្យួរទោស រដ្ឋា គន្ធា និង រស្មី ។ ប៉ុន្តែអ្នកទាំងបីត្រូវនៅបន្តក្នុងពន្ធនាគាររហូតមក ដោយសារមានដីកាឃុំខ្លួនបណ្តោះអាសន្នរបស់ចៅក្រមស៊ើបសួរនៃសាលាដំបូងរាជធានីភ្នំពេញ លើបទចោទបន្ថែមផ្សេងទៀត ដែលត្រូវបានចេញតាំងពីខែកក្កដា ឆ្នាំ២០២១ ។ បទចោទ ក្បត់ជាតិ និងប្រមាថព្រះមហាក្សត្រ ដែលអាចធ្វើឱ្យអ្នកទាំងនោះជាប់ពន្ធនាគាររហូតដល់ ១០ឆ្នាំ ប្រសិនបើត្រូវបានផ្តន្ទាទោស ពាក់ព័ន្ធនឹងការសន្ទនាជាក្រុមដែលត្រូវបានធ្វើឡើងជាលក្ខណៈឯកជនលើប្រព័ន្ធអ៊ិនធើណែត ។
លោក រដ្ឋា គន្ធា និងរស្មី ដែលមានអាយុ ២៨ ២២ និង ១៩ ឆ្នាំ នៅពេលចាប់ខ្លួន បានជាប់ក្នុងពន្ធនាគារជាង ១៤ ខែមកហើយ ។ ចំណែកឯកញ្ញា រដ្ឋា លាងហ៊ី និងដារ៉ាវុធ ដែលមានអាយុ ២៦ ៣២ និង ២២ ឆ្នាំ នៅពេលចាប់ខ្លួន បានជាប់ក្នុងពន្ធនាគារជាង ៥ ខែមកហើយ ។
- ចំណងជើង & មូលបទ
- សិទិ្ធបញ្ចេញមតិ និងចូលរួម មាតាធម្មជាតិ