តុលាការផ្តន្ទាទោសសមាជិកអតីតគណបក្សសង្គ្រោះជាតិ ២១រូប
ចេញផ្សាយ ថ្ងៃទី១៧ ខែមីនា ឆ្នាំ២០២២
នាព្រឹកនេះ សាលាដំបូងរាជធានីភ្នំពេញ បានផ្តន្ទាទោសសមាជិកអតីតគណបក្សសង្គ្រោះជាតិ ១២រូប និងមន្ត្រីក្រសួងមហាផ្ទៃម្នាក់ ឱ្យជាប់ពន្ធនាគារចំនួន ៥ឆ្នាំ ដោយអ្នកទាំងនោះនឹងត្រូវអនុវត្តទោសជាប់ពន្ធនាគារសរុបចំនួន ៣ឆ្នាំ ៨ខែ ក្រោមបទចោទញុះញង់ និងរួមគំនិតក្បត់ ហើយព្យួរទោសដែលនៅសល់ ។ ដូចនេះពួកគេ នឹងត្រូវជាប់ពន្ធនាគាររហូតដល់ក្រោយបោះឆ្នោតឆ្នាំ ២០២៣ ។
លើសពីនេះ ថ្នាក់ដឹកនាំអតីតគណបក្សសង្គ្រោះជាតិចំនួន ៧រូប ដែលរួមមានឯកឧត្តម សម រង្ស៊ី អ្នកស្រី មួរ សុខហួរ និងលោក អេង ឆៃអៀង ត្រូវបានតុលាការផ្តន្ទាទោសដោយកំបាំងមុខ លើបទចោទញុះញង់ រួមគំនិតក្បត់ និងញុះញង់កុំឱ្យយោធិនស្តាប់បង្គាប់ និងត្រូវបានដាក់ឱ្យជាប់ពន្ធនាគារសរុបចំនួន ១០ឆ្នាំ ។ ដីកាបង្គាប់ឱ្យចាប់ខ្លួនអ្នកទាំងនោះ ក៏ត្រូវបានចេញផងដែរ ។
បទ “ញុះញង់កុំឱ្យយោធិនស្តាប់បង្គាប់” ដំបូងត្រូវបានចោទទៅលើជនជាប់ចោទចំនួន ២១នាក់ ប៉ុន្តែត្រូវបានទំលាក់ចោលលើអ្នកដែលកំពុងជាប់ក្នុងពន្ធនាគារ និង លោក ហីន ឆាន ដែលដំបូងត្រូវបានចាប់ខ្លួន ប៉ុន្តែក្រោយមកត្រូវបានដោះលែង។ លោក ឆាន ត្រូវបានតុលាការផ្តន្ទាទោសឱ្យជាប់ពន្ធនាគារចំនួន ៥ឆ្នាំ ពីបទញុះញង់ និងរួមគំនិតក្បត់ ប៉ុន្តែទោសត្រូវព្យួរ ។
មនុស្សចំនួន ១៣នាក់ ដែលរួមមាន លោក ឆន ប៊ុនឆាត លោក ឡុង ផារី លោក ឃុត ច្រឹប លោក ងិន ភា លោក យឹម សារ៉េត លោក ឃឹម ភាណា លោក ថៃ គន្ធា លោក កែវ ថៃ លោក ញ៉ែម វាន លោក ជុំ ចាន់ លោក សុខ ចាន់ថា លោក ពៀត ម៉ាប់ និងលោក ស៊ន់ ធន់ ។ មនុស្សមួយចំនួន ក្នុងចំណោមអ្នកទាំង ១៣ បានជាប់ឃុំខ្លួនបណ្តោះអាសន្នក្នុងពន្ធនាគារជាង ២ឆ្នាំ មកហើយនៅពន្ធនាគារ ម១ ។
ចៅក្រមមិនបានផ្តល់មូលហេតុអ្វីច្បាស់លាស់ក្នុងការសម្រេចសេចក្តីនៅក្នុងសាលក្រមនោះទេ ។
នៅក្នុងបន្ទប់សវនាការ សមាជិកគ្រួសាររបស់ជនជាប់ចោទបានស្រែកទ្រហ៊ោយំ ក្រោយពេលលឺពីការប្រកាសសាលក្រមនេះ ខណៈដែលជនជាប់ចោទទាំងនោះស្រែកថាសាលក្រមនោះគឺអយុត្តិធម៌ ។ ចំណែកឯនៅមុខតុលាការ ភរិយា និងក្រុមគ្រួសាររបស់អ្នកទោសនយោបាយជាប់ពន្ធនាគារមួយចំនួន ដែលត្រូវបានគេស្គាល់ថាជាក្រុម “ស្ត្រីថ្ងៃសុក្រ” បានប្រមូលផ្តុំគ្នា និងលើកបដាដែលសរសេរថា៖ “យុត្តិធម៌ត្រូវតែមានដល់អ្នកស្នេហាជាតិជាដាច់ខាត” ។ ក្រុមស្ត្រី បានធ្វើការតវ៉ាអហិង្សាជានិច្ចកាល ដើម្បីទាមទារឱ្យដោះលែងសមាជិកគ្រួសាររបស់អ្នកទាំងនោះ ចាប់តាំងពីមានការចាប់ខ្លួនពួកគេ ហើយតែងតែទទួលរងការវាយដំ និងរំលោភបំពានពីសំណាក់អាជ្ញាធរជាច្រើន ។
សវនាការព្រឹកនេះ គឺក្នុងចំណោមសវនាការធំៗចំនួន ៤ ដែលត្រូវបានធ្វើឡើងទៅលើសមាជិកអតីត និងអ្នកគាំទ្រគណបក្សសង្គ្រោះជាតិ កាលពីខែវិច្ឆិកា ឆ្នាំ២០២០ ។ ភស្តុតាង ដែលត្រូវបានលើកឡើងនៅក្នុងករណីនេះ រួមមាន វីដេអូជាច្រើននៃការនិយាយជាសាធារណៈ និងការជួបជុំដែលមានពាក់ព័ន្ធនឹង “ចលនាសង្គ្រោះជាតិ” នៅក្រៅប្រទេស ក៏ដូចជាការមានយោបល់ទៅលើគោលនយោបាយរបស់រាជរដ្ឋាភិបាល និងការឆ្លើយតបទៅលើវិធានការកូវីដ ដែលត្រូវបានធ្វើឡើងនៅតាមបណ្តាញសង្គម និងទំនាក់ទំនងតាមទូរស័ព្ទឯកជន ។ ការផ្តន្ទាទោសទាំងនេះ នឹងរារាំងអ្នកទាំងនោះពីការចូលរួមធ្វើនយោបាយ និងការបោះឆ្នោតឃុំសង្កាត់ និងបោះឆ្នោតជាតិ ដោយយោងតាមវិសោធនកម្មច្បាប់ស្តីពីគណបក្សនយោបាយឆ្នាំ ២០១៧ ។
- ចំណងជើង & មូលបទ
- កឹម សុខា
