អ្នកកាសែត៥នាក់ និងសកម្មជន៤នាក់ ត្រូវបានឃាត់ខ្លួននៅភ្នំតាម៉ៅ
ចេញផ្សាយ ថ្ងៃទី១៦ ខែសីហា ឆ្នាំ២០២២នាព្រឹកនេះ អាជ្ញាធរ បានឃាត់ខ្លួនអ្នកសារព័ត៌មាន៥នាក់ មកពីស្ថាប័នសារព័ត៌មានឯករាជ្យវីអូឌី និង៤នាក់ទៀតមកពីក្រុមយុត្តិធម៌សង្គម ខ្មែរថាវរៈ នៅតំបន់ភ្នំតាម៉ៅ ។ ពួកគេត្រូវបានដោះលែងវិញនៅម៉ោងជាង ៦ល្ងាចនេះ ក្រោយពីអាជ្ញាធរតម្រូវឱ្យពួកគេធ្វើកិច្ចសន្យាមួយ ។
មន្ត្រីកងអង្គរក្សសម្ដេចនាយករដ្ឋមន្ត្រី បានឃាត់ខ្លួន អ្នកសារព័ត៌មាន និងសកម្មជនខ្មែរថាវរៈ រួមមានកញ្ញា សុគន្ធ តុលា កញ្ញា ឆែម ស្រីគា កញ្ញា ឈឿន ដារ៉ាវី និងលោក ហ៊ុន វណ្ណៈ ហើយបានបញ្ជូនពួកគេទាំង៩នាក់ទៅសាកសួរជាច្រើនម៉ោង នៅអធិការដ្ឋាននគរបាលស្រុកបាទី នៅខេត្តតាកែវ ។
សកម្មជនខ្មែរថាវរៈ ត្រូវបានឃាត់ខ្លួន ក្រោយពីសមាជិកក្រុមម្នាក់បានធ្វើការផ្សាយផ្ទាល់ព័ត៌មាននៅលើបណ្ដាញសង្គមហ្វេសប៊ុក ពីតំបន់ភ្នំតាម៉ៅ នាព្រឹកនេះ ហើយក្រុមដដែលនេះបានដាក់ញត្តិមួយទៅកាន់មន្ទីរកសិកម្ម រុក្ខាប្រមាញ់ និងនេសាទ ពាក់ព័ន្ធនឹងដីព្រៃនេះ បើតាមសមាជិកក្រុមម្នាក់ទៀត ។ មានការរាយការណ៍ថា អាជ្ញាធរបានចាប់ផ្ដើមបោះបង្គោលដីព្រៃ ដែលនាំមានចម្ងល់ជាច្រើនពីអ្នកភូមិនៅក្នុងតំបន់ និងនាំឱ្យមានការចុះទៅទស្សនាផ្ទាល់ដោយក្រុមខ្មែរថាវរៈ ។
អ្នកសារព័ត៌មានដែលត្រូវបានឃាត់ខ្លួននៅថ្ងៃអង្គារនេះ កំពុងរាយការណ៍ពីផលវិបាកនៃការឈូសឆាយដីព្រៃ នាពេលថ្មីៗនេះ ។ ក្រុមកងអង្គរក្ស បានដកហូតសម្ភារៈរបស់អ្នកសារព័ត៌មាន និងសកម្មជន ។
ការឃាត់ខ្លួននេះកើតឡើង ត្រឹមតែប៉ុន្មានថ្ងៃប៉ុណ្ណោះ ក្រោយពីមានការឈូសឆាយយ៉ាងធ្ងន់ធ្ងរទៅលើដីព្រៃនៅតំបន់ភ្នំតាម៉ៅ ដោយនាំឱ្យបាត់បង់ដីព្រៃប្រមាណរហូតដល់ ៥០០ហិចតា ក្នុងចំណោមដីសរុបប្រមាណ២០០០ហិចតា ក្នុងរយៈពេលត្រឹម១សប្ដាហ៍ ។ កាលពីថ្ងៃទី០៧ ខែសីហានេះ សម្ដេចនាយករដ្ឋមន្ត្រី បានបញ្ជាឱ្យមានការដាំដើមឈើឡើងវិញ ដោយលុបចោលដីសម្បទាន ដែលរាជរដ្ឋាភិបាល បានផ្ដល់ឱ្យអ្នកជំនួញមួយចំនួនដូចជា លោកឧកញ៉ា ឡេង ណាវ៉ាត្រា និងលោកឧកញ៉ា ឃុន សៀ ជាដើម ។ ការលុបចោលនេះ កើតឡើងបន្ទាប់ពីវីអូឌី បានចេញខ្សែវីដេអូពីលើអាកាស និងអត្ថបទជាច្រើន អំពីការកាប់បំផ្លាញព្រៃឈើយ៉ាងឆាប់រហ័ស ក៏ដូចជាការរិះគន់យ៉ាងខ្លាំងពីសំណាក់សាធារណជននៅលើបណ្ដាញសង្គម ជុំវិញការបំផ្លិចបំផ្លាញព្រៃឈើនេះ ៕
- ចំណងជើង & មូលបទ
- វាយប្រហារលើអ្នកសារព័ត៌មាន និងបញ្ហាប្រព័ន្ធផ្សព្វផ្សាយ