សាលាឧទ្ធរណ៍តម្កល់ការផ្តន្ទាទោសពីបទញុះញង់លើសកម្មជនចំនួនដប់រូប
ចេញផ្សាយ ថ្ងៃទី២២ ខែសីហា ឆ្នាំ២០២២នារសៀលនេះ សាលាឧទ្ធរណ៍រាជធានីភ្នំពេញ បានសម្រេចតម្កល់ការផ្តន្ទាទោសទៅលើសកម្មជនសង្គម និងនយោបាយចំនួន ១០រូប ពីបទញុះញង់ឱ្យប្រព្រឹត្តិបទឧក្រិដ្ឋជាអាទិ៍ ដោយដាក់អ្នកទាំងនេះឱ្យស្ថិតក្រោមការព្យួរទោសសាកល្បងរហូតដល់ចុងឆ្នាំ ២០២៣ ។
តុលាការបានបដិសេធបណ្តឹងឧទ្ធរណ៍របស់កញ្ញា ឈឿន ដារ៉ាវី លោក ហ៊ុន វណ្ណៈ លោក ថា ឡាវី និងកញ្ញា អេង ម៉ាឡៃ ដែលជាសមាជិកក្រុមយុវជនខ្មែរថាវរៈ បដិសេធបណ្តឹងឧទ្ធរណ៍របស់លោក កើត សារាយ លោក មួង សុភ័ក្ត្រ និងលោក មាន ព្រហ្មមុនី ដែលជាសមាជិកសមាគមសម្ព័ន្ធនិស្សិតបញ្ញាវ័ន្តខ្មែរ និងបដិសេធបណ្តឹងឧទ្ធរណ៍របស់លោក គង់ សំអាន លោក ឈួរ ផេង និងលោកជុំ ពុទ្ធី ដែលជាអតីតសមាជិកគណបក្សសង្គ្រោះជាតិដែលត្រូវបានតុលាការរំលាយ ។
សាលាដំបូងរាជធានីភ្នំពេញ បានផ្តន្ទាទោសសកម្មជនទាំង ១០នាក់ ឱ្យជាប់ពន្ធនាគារចំនួន ២០ខែ ដោយព្យួរទោសពី ៥ ទៅ ៦ខែ និងពិន័យជាប្រាក់ ២លានរៀល (៥០០ដុល្លារ) ក្នុងមួយនាក់ៗ ពីបទញុះញង់ កាលពីខែតុលា ឆ្នាំ ២០២១ ។
ដារ៉ាវី និងវណ្ណៈ ដែលមកពីក្រុមយុវជនខ្មែរថាវរៈ ត្រូវបានតុលាការផ្តន្ទាទោសពន្ធនាគារចំនួន ១៥ខែ ។ ផេង និងពុទ្ធី ដែលជាអតីតសមាជិកគណបក្សសង្គ្រោះជាតិ ក៏ត្រូវបានតុលាការផ្តន្ទាទោសពន្ធនាគារចំនួន ១៥ខែ ដែរ ។ រីឯសំអាន សារាយ សុភ័ក្ត្រ ព្រហ្មមុនី ឡាវី និងម៉ាឡៃ ត្រូវបានតុលាការផ្តន្ទាទោសចំនួន ១៤ខែ ។ អ្នកទាំងនោះ ត្រូវបានអាជ្ញាធរចាប់ខ្លួនកាលពីខែសីហា និងកញ្ញា ឆ្នាំ២០២០ នៅពេលដែលអ្នកទាំងនោះប្រមូលផ្តុំគ្នាអហិង្សានៅមុខតុលាការ ស្នើសុំឱ្យដោះលែងអ្នកដឹកនាំសហជីព លោក រ៉ុង ឈុន ។
សកម្មជនចំនួន ៩ នាក់ ក្នុងចំណោមអ្នកទាំងនោះ ត្រូវបានដោះលែងពីពន្ធនាគារកាលពីខែវិច្ឆិកា ឆ្នាំ២០២១ ។ ពួកគេ ត្រូវបានតុលាការព្យួរទោសសាកល្បងចំនួន ២ឆ្នាំ ដោយតម្រូវឱ្យជូនដំណឹងមកតុលាការនៅពេលដែលអ្នកទាំងនោះផ្លាស់ប្តូរទីលំនៅ ផ្លាស់ប្តូរមុខរបរ ឬចង់ចាកចេញពីប្រទេស និងលក្ខខណ្ឌដទៃទៀត ។
សំអាន ដែលត្រូវបានតុលាការផ្តន្ទាទោសពន្ធនាគារ ៧ឆ្នាំ ពីបទក្បត់ជាតិនៅក្នុងសំណុំរឿងមួយផ្សេងទៀត បានជាប់ពន្ធនាគារចាប់តាំងពីខែកញ្ញា ឆ្នាំ២០២០ ។
ដារ៉ាវី និងវណ្ណៈ គឺនៅក្នុងចំណោមសកម្មជនខ្មែរថាវរៈទាំងបួននាក់ ដែលត្រូវបានអាជ្ញាធរមកពីកងអង្គរក្សសម្តេចនាយករដ្ឋមន្ត្រីឃាត់ខ្លួនកាលពីសប្តាហ៍មុន នៅក្នុងតំបន់ភ្នំតាម៉ៅ ។
- ឯកសារទាក់ទង
- ចំណងជើង & មូលបទ
- សិទិ្ធបញ្ចេញមតិ និងចូលរួម