សមាជិកសហគមន៍ជាង ៨០០នាក់ ដាក់ញត្តិទៅក្រសួងមួយចំនួនទោះជាត្រូវបាននគរបាលរារាំង
ចេញផ្សាយ ថ្ងៃទី៦ ខែកញ្ញា ឆ្នាំ២០២២អាជ្ញាធរបានដាក់សម្ពាធ និងរារាំងសមាជិកសហគមន៍រាប់សិបនាក់ ដែលកំពុងមានជំលោះដីធ្លីដ៏រាំរ៉ៃ ដោយមិនអនុញ្ញាតឱ្យអ្នកទាំងនោះធ្វើដំណើរមករាជធានីភ្នំពេញនាព្រឹកនេះ ដើម្បីចូលរួមជាមួយពលរដ្ឋមកពីសហគមន៍ផ្សេងទៀតជាង ៨០០ នាក់ ដាក់ញត្តិទៅកាន់ក្រសួងពាក់ព័ន្ធមួយចំនួន ។
ពលរដ្ឋប្រមាណ ៥០០ នាក់ មកពីសហគមន៍នានាក្នុងខេត្តកោះកុង និងពលរដ្ឋប្រមាណជាង ៣៦០នាក់ មកពីសហគមន៍មួយចំនួនក្នុងខេត្តកំពង់ស្ពឺ បានប្រមូលផ្តុំគ្នានៅក្នុងរាជធានីភ្នំពេញ ដើម្បីស្នើសុំឱ្យអាជ្ញាធររដ្ឋពន្លឿនការដោះស្រាយជំលោះដីធ្លីដ៏រ៉ាំរ៉ៃ និងផ្តល់ប័ណ្ណកម្មសិទិ្ធដីធ្លី និងសំណងត្រឹមត្រូវជូនសហគមន៍ទាំងនោះ ដែលកំពុងរង់ចាំដំណោះស្រាយអស់ជាច្រើនឆ្នាំមកហើយ ។ អ្នកតំណាងមួយចំនួននៃសហគមន៍ចំនួន ៦ ក្នុងខេត្តកោះកុង និងសហគមន៍ចំនួន ៣ មកពីខេត្តកំពង់ស្ពឺ បានដាក់ញត្តិទៅកាន់ក្រសួងយុត្តិធម៌ ក្រសួងមហាផ្ទៃ និងក្រសួងដែនដី នគរូបនីយកម្ម និងសំណង់ ក៏ដូចជាខុទ្ទកាល័យសម្តេចនាយករដ្ឋមន្ត្រី នាថ្ងៃអង្គារ៍នេះ នៅខណៈដែលមានការឃ្លាំមើលពីកងនគរបាលជាច្រើនសិបនាក់ ។
នៅតាមផ្លូវមកកាន់រាជធានីភ្នំពេញ នគរបាលបានរារាំងពលរដ្ឋរាប់សិបនាក់មកពីសហគមន៍អមលាំង និងបង្ខំឱ្យអ្នកតំណាងធ្វើកិច្ចសន្យាថានឹងមិនបង្កឱ្យការប៉ះពាល់ដល់ “សណ្តាប់ធ្នាប់សង្គម” នៅក្នុងរាជធានីភ្នំពេញ មុនពេលអនុញ្ញាតដោយកម្រិតឱ្យពលរដ្ឋតែចំនួន ១៥នាក់ ជិះក្នុងរថយន្តមួយគ្រឿង ។ នគរបាលបានលើកឡើងថារថយន្តរបស់អ្នកទាំងនោះផ្ទុកមនុស្សលើសចំណុះរថយន្ត។ ដូចនេះ រថយន្តតែចំនួន ៧ គ្រឿងក្នុងចំណោមរថយន្តទាំងអស់ ៨ គ្រឿង អាចបន្តដំណើរមកទីក្រុងបាន ។
ក្រោយមក នគរបាលនៅខេត្តកំពង់ឆ្នាំង បានដាក់សម្ពាធ និងហាក់ដូចជាដាក់គោលដៅមកលើសមាជិកសហគមន៍អមលាំងនៅតាមផ្លូវ ដោយឃាត់រថយន្តទាំងនោះ និងគម្រាមពិន័យតាមច្បាប់ស្តីពីចរាចរណ៍ផ្លូវគោក ប្រសិនបើអ្នកទាំងនោះមិនព្រមត្រឡប់ទៅកាន់សហគមន៍របស់គេវិញនោះ ។ មានតែពលរដ្ឋជិះក្នុងរថយន្តចំនួន ៥ គ្រឿង ប៉ុណ្ណោះ ដែលសុខចិត្តបង់ពិន័យ ហើយបន្តដំណើរមករាជធានីភ្នំពេញ ដោយបានបង់ប្រាក់ចំនួន ១.២០០.០០០ រៀល (ស្នើនឹងប្រមាណ ៣០០ ដុល្លារអាមេរិក) ក្នុងមួយរថយន្ត ។
នគរបាលក៏បានឃាត់រថយន្តចំនួន ៣ គ្រឿង ទៀតផងដែរ ដែលបានផ្ទុកពលរដ្ឋមកពីសហគមន៍រស្មីសាមគ្គី ហើយសួររកប័ណ្ណបើកបរ និងឯកសារពាក់ព័ន្ធ ។ ចុងក្រោយមានតែរថយន្តមួយគ្រឿងប៉ុណ្ណោះ ដែលត្រូវបានអនុញ្ញាតឱ្យបន្តដំណើរមករាជធានីភ្នំពេញ ។ អាជ្ញាធរក៏បានឃាត់រថយន្តចំនួន ១២ គ្រឿង ផ្សេងទៀត ដែលមកពីសហគមន៍ត្រពាំងជោរ ប៉ុន្តែចុងក្រោយបានអនុញ្ញាតឱ្យអ្នកទាំងនោះបន្តដំណើរមកកាន់រាជធានី ។
សហគមន៍ទាំងបីមកពីខេត្តកំពង់ស្ពឺ មានជំលោះដីធ្លីចាប់តាំងពីឆ្នាំ ២០១០ ជាមួយក្រុមហ៊ុនភ្នំពេញស៊ូហ្គ័ររបស់លោកឧកញ៉ា លី យ៉ុងផាត់ ។ ចំណែកឯសហគមន៍មកពីខេត្តកោះកុង ក៏មានជំលោះដីធ្លីជាមួយក្រុមហ៊ុនរបស់លោក លី យ៉ុងផាត់ និងលោក ហេង ហ៊ុយ ផងដែរ ។
- ចំណងជើង & មូលបទ
- សិទិ្ធបញ្ចេញមតិ និងចូលរួម សិទ្ធិដីធ្លី លី យ៉ុងផាត់