បុគ្គលិកសមាគម CCFC បីនាក់ ត្រូវបានចាប់ឃាត់ខ្លួននៅខេត្តក្រចេះ
ចេញផ្សាយ ថ្ងៃទី១៨ ខែឧសភា ឆ្នាំ២០២៣បុគ្គលិករបស់សមាគមសម្ព័ន្ធសហគមន៍កសិករកម្ពុជា (CCFC) ត្រូវបានចាប់ខ្លួន និងអាចនឹងត្រូវបញ្ជូនទៅកាន់តុលាការ មួយថ្ងៃបន្ទាប់ពីនគរបាលខេត្តក្រចេះបានឃាត់រថយន្តក្រុងដែលផ្ទុកមនុស្សសរុបចំនួន ៣៧ នាក់ ហើយមនុស្សមួយចំនួនក្នុងចំណោមនោះ ត្រូវបានឃាត់ខ្លួន និងសាកសួរពីនគរបាលពេញមួយយប់ ។
នាព្រឹកនេះ នគរបាលបានសម្រេចចាប់ខ្លួនលោក ថេង សាវឿន ជាប្រធានសមាគម CCFC លោក ញិល ភាព ជាបុគ្គលិកជាន់ខ្ពស់ និងលោក ថាន់ ហាច ជាបុគ្គលិកគម្រោង ជាផ្លូវការ ។ មូលហេតុនៃការឃាត់រថយន្តក្រុង និងចាប់ខ្លួនអ្នកទាំងបី នៅមិនទាន់ច្បាស់នៅឡើយ ។ អ្នកទាំងបី គឺស្ថិតក្នុងចំណោមមនុស្សដែលត្រូវបានឃាត់ខ្លួនអស់ពេញមួយយប់ ខណៈដែលមនុស្សដទៃទៀតចំនួន ៣៤ នាក់ ត្រូវបាននគរបាលអនុញ្ញាតឲ្យចេញពីស្នងការដ្ឋាននាព្រឹកនេះ ។
អាជ្ញាធរបានដកហូតកុំព្យូទ័រ ទូរស័ព្ទចល័ត និងឯកសារសរសេរដោយដៃជាច្រើនទៀតពីអ្នកទាំងនោះ ហើយមន្ត្រីនគរបាលដែលមកពីនាយកដ្ឋានប្រឆាំងនឹងបទល្មើសបច្ចេកវិទ្យានៃក្រសួងមហាផ្ទៃ ក៏ត្រូវបានគេឃើញមានវត្តមាននៅក្នុងស្នងការដ្ឋាននោះដែរ ក្រោយពេលបុគ្គលិកសមាគម CCFC ទាំងនោះត្រូវបាននគរបាលឃាត់ខ្លួន ។
សមាគម CCFC គឺជាស្ថាប័នសមាជិកភាព ដែលត្រូវបានបង្កើតឡើងនៅឆ្នាំ ២០១១ ដើម្បីជួយដោះស្រាយបញ្ហាសិទិ្ធដីធ្លី និងបញ្ហានានាដែលប៉ះពាល់ដល់កសិករ ។ លោក ថេង សាវឿន ធ្លាប់ត្រូវបានចាប់ខ្លួនម្តង ជាមួយសមាជិកសង្គមស៊ីវិល និងសហគមន៍ដទៃទៀត កាលពីខែមករា ឆ្នាំ២០១៤ ក្រោយពេលមានព្រឹត្តិការណ៍នៃការបង្ក្រាបយ៉ាងហិង្សាមកលើអ្នកតវ៉ាជាច្រើននៅក្នុងរាជធានីភ្នំពេញ ហើយសាវឿនបានចំណាយពេលក្នុងពន្ធនាគារចំនួន ៥ ខែ មុនពេលលោកត្រូវបានតុលាការផ្តន្ទាទោសដាក់ពន្ធនាគារចំនួន ៤ ឆ្នាំ និងព្យួរទោសដែលនៅសល់ ។
- ចំណងជើង & មូលបទ
- សិទិ្ធបញ្ចេញមតិ និងចូលរួម