ក្រុមប្រឹក្សាធម្មនុញ្ញ សម្រេចបដិសេធបណ្តឹងគណបក្សភ្លើងទៀនសុំចុះបញ្ជីឈរឈ្មោះបោះឆ្នោតថ្នាក់ជាតិ ឆ្នាំ ២០២៣
ចេញផ្សាយ ថ្ងៃទី២៥ ខែឧសភា ឆ្នាំ២០២៣
នៅថ្ងៃនេះ ក្រុមប្រឹក្សាធម្មនុញ្ញ បានសម្រេចបដិសេធបណ្តឹងរបស់គណបក្សភ្លើងទៀនដែលស្នើសុំចុះបញ្ជីឈរឈ្មោះបោះឆ្នោតថ្នាក់ជាតិ នៅខែកក្កដា ឆ្នាំ២០២៣ ខាងមុខនេះ ។ នេះគឺជាការសម្រេចបិទផ្លូវតវ៉ា និងជាការដកគណបក្សជំទាស់ធំជាងគេចេញពីការប្រកួតប្រជែងនៃការបោះឆ្នោតថ្នាក់ជាតិ ដោយសារតែមូលហេតុកង្វះឯកសារចុះបញ្ជី ។
សេចក្តីសម្រេចរបស់ក្រុមប្រឹក្សាធម្មនុញ្ញ តម្កល់សេចក្តីសម្រេចរបស់គណៈកម្មាធិការជាតិរៀបចំការបោះឆ្នោត (គជប) កាលពីថ្ងៃទី១៥ ខែឧសភា ដែលបដិសេធការចុះបញ្ជីឈរឈ្មោះបោះឆ្នោតរបស់គណបក្សភ្លើងទៀន សម្រាប់ឆ្នាំនេះ ។ គជប បានអះអាងថាគណបក្សភ្លើងទៀន មិនបានបំពេញគ្រប់នីតិវិធី ដោយមិនបានដាក់លិខិតបញ្ជាក់នីត្យានុកូលកម្មនៃឯកសារច្បាប់ដើមចុះបញ្ជីរបស់គណបក្ស ដែលបញ្ជាក់ដោយរដ្ឋបាលមូលដ្ឋាន ។ ឯកសារនេះ ត្រូវបានគណបក្សភ្លើងទៀនអះអាងថាត្រូវបានអាជ្ញាធររឹបអូសអំឡុងពេលដែលអាជ្ញាធរចុះបិទទីស្នាក់ការគណបក្សសង្គ្រោះជាតិ ក្រោយពេលដែលគណបក្សនេះត្រូវបានតុលាការកំពូលរំលាយកាលពីឆ្នាំ ២០១៧ ។
ការបដិសេធរបស់ គជប បានធ្វើឡើង ទោះជាស្ថាប័ននេះ ធ្លាប់បានអនុញ្ញាតឱ្យគណបក្សភ្លើងទៀនចុះឈ្មោះសម្រាប់ការបោះឆ្នោតថ្នាក់ឃុំសង្កាត់ កាលពីឆ្នាំ២០២២ ក៏ដោយ ។
កាលពីថ្ងៃទី១៩ ខែឧសភា គណបក្សភ្លើងទៀនបានប្តឹងទាស់នឹងសេចក្តីសម្រេចរបស់គជប ទៅក្រុមប្រឹក្សាធម្មនុញ្ញ ដែលមានសមាសភាព ៩ រូប ដែល ៥ រូបក្នុងចំណោមអ្នកទាំងនោះ គឺជាសមាជិកនៃគណៈកម្មាធិការអចិន្ត្រៃយ៍របស់គណបក្សប្រជាជនកម្ពុជា ។ សេចក្តីសម្រេចនាថ្ងៃនេះ គឺជាសេចក្តីសម្រេចបិទផ្លូវតវ៉ា ។
គណបក្សភ្លើងទៀនបានក្លាយជាគណបក្សជំទាស់ធំជាងគេតែមួយគត់ ក្រោយពេលដែលគណបក្សសង្គ្រោះជាតិត្រូវបានតុលាការកំពូលរំលាយ កាលពីឆ្នាំ២០១៧ ។ គណបក្សនេះទទួលបានកៅអីក្រុមប្រឹក្សាឃុំសង្កាត់ចំនួន ២.១៩៨ អសនៈ កាលពីការបោះឆ្នោតឃុំសង្កាត់ ឆ្នាំ២០២២ ដែលទទួលបានការបោះឆ្នោតគាំទ្រចំនួនជាង ១.៦ លានសំឡេង និងជាគណបក្សធំទី២ បន្ទាប់ពីគណបក្សប្រជាជនកម្ពុជា ។
គណបក្សទីបី គឺគណបក្សហ្វ៊ុនស៊ីនប៉ិច ដែលទទួលបាន ១៩ អសនៈ ។
ក្រុមប្រឹក្សាធម្មនុញ្ញក៏បានសម្រេចបដិសេធបណ្តឹងរបស់គណបក្សមួយទៀតដែរ គឺគណបក្សមហាសាមគ្គីជាតិខ្មែរ ដែលស្នើសុំចុះបញ្ជីឈរឈ្មោះបោះឆ្នោតថ្នាក់ជាតិ ២០២៣ ខាងមុខ ផងដែរ ។ គណបក្សនេះ មិនបានចូលរួមក្នុងការបោះឆ្នោតឃុំសង្កាត់កាលពីឆ្នាំ២០២២ នោះទេ ។
- ចំណងជើង & មូលបទ
- ការបោះឆ្នោត
