សកម្មជនដីធ្លីខេត្តកោះកុង៩នាក់ ត្រូវបានអនុញ្ញាតឱ្យនៅក្រៅឃុំ ប៉ុន្តែ២នាក់នៅបន្តជាប់ឃុំក្នុងពន្ធនាគារ
ចេញផ្សាយ ថ្ងៃទី២៩ ខែសីហា ឆ្នាំ២០២៣នាថ្ងៃនេះ សកម្មជនដីធ្លីខេត្តកោះកុងចំនួន៩នាក់ ត្រូវបានសាលាឧទ្ធរណ៍ព្រះសីហនុ អនុញ្ញាតឱ្យនៅក្រៅឃុំបណ្ដោះអាសន្ន ប៉ុន្តែពួកគេ នឹងត្រូវដាក់ឱ្យស្ថិតក្រោមលក្ខខណ្ឌមួយចំនួននៃការត្រួតពិនិត្យតាមផ្លូវតុលាការ ។ សកម្មជនទាំងនេះ ត្រូវបានឃុំខ្លួនបណ្ដោះអាសន្ន អស់រយៈពេល ២ខែមកហើយ នៅក្នុងពន្ធនាគារខេត្តកោះកុង ក្រោយពីការចាប់ខ្លួនពួកគេ កាលពីថ្ងៃទី២៩ ខែមិថុនា ឆ្នាំ២០២៣ ។
សកម្មជនទាំង៩នាក់ បានបង្ហាញវត្តមាននៅក្នុងសវនាការសុំនៅក្រៅឃុំ នៅព្រឹកនេះ ដែលមានការគាំទ្រដោយសមាជិក និងតំណាងសហគមន៍មកពីខេត្តកោះកុងដូចជា សហគមន៍ដីធ្លី១៩៧ សហគមន៍ដីធ្លី១៧៥ និងសហគមន៍ដីធ្លី៩៥៥ ។ អាជ្ញាធរ បានស្នើឱ្យអ្នកគាំទ្ររង់ចាំនៅខាងក្នុងបរិវេណតុលាការ ប៉ុន្តែពួកគេសម្រេចចិត្តរង់ចាំនៅក្រៅតុលាការ ដើម្បីអំពាវនាវជាសាធារណៈឱ្យមានការដោះលែងអ្នកតំណាងរបស់ពួកគេ ។
សកម្មជនទាំង៩នាក់ រួមមាន អ្នកស្រី ផាវ ញ៉ើង អ្នកស្រី ដេតហ៊ួ អ្នកស្រី យី គន្ធា លោក សុខ ជៃ លោក ហេង ជៃ អ្នកស្រី ទិន តាំង លោក ឡាំង ចៀវ អ្នកស្រី សេង លីន និងលោក យឿន ខ្មៅ ។ ពួកគេម្នាក់ៗ ត្រូវបានចោទប្រកាន់ពីបទញុះញង់ បន្ទាប់ពីបានព្យាយាមធ្វើដំណើរដោយសន្តិវិធីទៅរាជធានីភ្នំពេញ ដើម្បីដាក់ញត្តិទៅកាន់ក្រសួងយុត្តិធម៌ ។
ប៉ុន្តែសកម្មជន២នាក់ក្នុងចំណោមពួកគេ គឺអ្នកស្រី ផាវ ញ៉ើង និងអ្នកស្រី សេង លីន នឹងត្រូវបន្តជាប់ឃុំក្នុងពន្ធនាគារ ដោយសារការផ្ដន្ទាទោសដាក់ពន្ធនាគារ១ឆ្នាំ ក្នុងករណីផ្សេងមួយទៀត ដែលពួកគេត្រូវបានផ្ដន្ទាទោសពីបទបរិហាកេរ្តិ៍ និងបទញុះញង់ឱ្យមានភាពវឹកវរធ្ងន់ធ្ងរដល់សន្តិសុខសង្គម ពាក់ព័ន្ធនឹងភាពសកម្មនិយមរបស់ពួកគេ ។
ចំណែកឯ សកម្មជន៧នាក់ទៀត ត្រូវបានរំពឹងថា នឹងត្រូវដោះលែងពីពន្ធនាគារខេត្តកោះកុង នៅពេលដែលមន្ត្រីពន្ធនាគារទទួលបានដីកាបង្គាប់ឱ្យដោះលែងពីតុលាការ ។ ក្រោយពីការដោះលែងនេះ ពួកគេនឹងនៅតែត្រូវបានហាមឃាត់មិនឱ្យចាកចេញពីប្រទេសកម្ពុជា ឬផ្លាស់ប្ដូរអាសយដ្ឋានដោយពុំមានការអនុញ្ញាតពីតុលាការ ហើយត្រូវឆ្លើយតបរាល់ការកោះហៅរបស់តុលាការ ។ សកម្មជនទាំង៩នាក់ នៅតែបន្តប្រឈមនឹងការជាប់ពន្ធនាគារ២ឆ្នាំ និងពិន័យជាប្រាក់ចំនួន ៤លានរៀល (ប្រមាណជា ១.០០០ដុល្លារ) ប្រសិនបើត្រូវបានរកឃើញថាមានទោស ៕
- ចំណងជើង & មូលបទ
- សិទ្ធិដីធ្លី