សកម្មជនគណបក្សភ្លើងទៀន៧នាក់ ត្រូវបានបញ្ជូនទៅឃុំខ្លួនបណ្ដោះអាសន្ន
ចេញផ្សាយ ថ្ងៃទី១៥ ខែកញ្ញា ឆ្នាំ២០២៣
នាល្ងាចម្សិលមិញនេះ មន្ត្រី និងសមាជិកគណបក្សភ្លើងទៀនចំនួន ៧រូប ត្រូវបានបញ្ជូនទៅឃុំខ្លួនបណ្ដោះអាសន្នរង់ចាំសវនាការ ក្រោយពីត្រូវបានចោទប្រកាន់ពីបទញុះញង់ តាមបញ្ញត្តិមាត្រា៤៩៤ និង/ឬមាត្រា៤៩៥ និងបទឆបោក តាមបញ្ញត្តិមាត្រា ៣៧៧ និង ៣៧៨ នៃក្រមព្រហ្មទណ្ឌនៃព្រះរាជាណាចក្រកម្ពុជា ។ បច្ចុប្បន្ន អ្នកទាំងនោះ កំពុងស្ថិតក្រោមការឃុំខ្លួន នៅក្នុងពន្ធនាគារខេត្តបន្ទាយមានជ័យ ។
សកម្មជនទាំង៧នាក់ ដែលត្រូវបានចោទប្រកាន់ គឺស្ថិតក្នុងចំណោមសមាជិកគណបក្សភ្លើងទៀនចំនួន ២៣នាក់ ដែលត្រូវបានកោះហៅទៅសាកសួរដោយមន្ត្រីនគរបាលក្នុងខេត្តបន្ទាយមានជ័យ ចាប់តាំងពីថ្ងៃសៅរ៍ ទី០៩ ខែកញ្ញានេះ ពាក់ព័ន្ធនឹងការបង្កើតគណបក្សថ្មីមួយ ។ មូលដ្ឋាននៃការចោទប្រកាន់នេះ គឺពុំទាន់មានការបញ្ជាក់ពីអាជ្ញាធរនៅឡើយទេ ។
សកម្មជននយោបាយគណបក្សភ្លើងទៀនទាំង៧នាក់ ដែលត្រូវបានចោទប្រកាន់រួមមាន លោក ស៊ីន វត្ថា ប្រធានគណៈកម្មាធិការប្រតិបត្តិខេត្តបន្ទាយមានជ័យ លោក ឡុង ឡាវី អនុប្រធានគណៈកម្មាធិការប្រតិបត្តិខេត្តបន្ទាយមានជ័យ លោក ទេស សម្បត្តិ វឌ្ឍនោ សមាជិកគណបក្ស លោក ទួត វាសនា ប្រធានគណៈកម្មាធិការប្រតិបត្តិស្រុកមង្គលបុរី លោក ឈុំ ស៊ីណាត អនុប្រធានគណៈកម្មាធិការប្រតិបត្តិស្រុកមង្គលបុរី លោក លោក វ៉ាន់ ស៊ុយអ៊ីវ សមាជិកក្រុមប្រឹក្សាសង្កាត់ និងលោក ហ៊ឹម ឡា អ្នកគាំទ្រគណបក្សភ្លើងទៀន ។ ក្នុងនោះ សកម្មជន៥នាក់ ត្រូវបានចោទប្រកាន់ពីបទញុះញង់ផង និងបទឆបោកផង ខណៈដែលសកម្មជន២នាក់ទៀត គឺលោក វ៉ាន់ ស៊ុយអ៊ីវ និងលោក ហ៊ឹម ឡា ត្រូវបានចោទប្រកាន់ពីបទញុះញង់តែមួយទេ ។
គណបក្សភ្លើងទៀន ត្រូវបានបដិសេធមិនឱ្យចូលរួមការបោះឆ្នោតថ្នាក់ជាតិ កាលពីថ្ងៃទី២៣ ខែកក្កដា ឆ្នាំ២០២៣ កន្លងទៅថ្មីៗនេះ ដោយផ្អែកតាមសេចក្ដីសម្រេចមួយរបស់គណៈកម្មាធិការជាតិរៀបចំការបោះឆ្នោត (គ.ជ.ប) ក្នុងខែឧសភា ឆ្នាំ២០២៣ ។ គ.ជ.ប បានសម្រេចថា គណបក្សភ្លើងទៀន ពុំមានសិទ្ធិចុះបញ្ជីប្រកួតប្រជែងនៅលើសន្លឹកឆ្នោតនោះទេ ដោយសារគណបក្សនេះបានខកខានក្នុងការដាក់ឯកសារចុះបញ្ជីច្បាប់ដើម ។ គណបក្សភ្លើងទៀន បានបង្ហាញពីសន្ទុះគាំទ្រខ្លាំងមួយ និងជាគណបក្សជំទាស់សំខាន់មួយ នៅក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ កាលពីខែមិថុនា ឆ្នាំ២០២២ ៕
អត្ថបទខ្លីនេះ ត្រូវបានកែសម្រួលនៅថ្ងៃទី១៩ ខែកញ្ញា ឆ្នាំ២០២៣ ដើម្បីបញ្ជាក់បន្ថែមពីការឃុំខ្លួនលោក ហ៊ឹម ឡា ដោយសារលីកាដូ ទើបទទួលបានព័ត៌មាននេះ ក្រោយពេលចេញផ្សាយអត្ថបទ ។ ចំនួនបទចោទព្រហ្មទណ្ឌ ក៏មានការកែប្រែផងដែរ ។
- ចំណងជើង & មូលបទ
- ការបោះឆ្នោត
