សមាជិកគណបក្សភ្លើងទៀនត្រូវបានឃាត់ខ្លួន ក្រោមការចោទក្លែងបន្លំពាក់ព័ន្ធនឹងឯកសារបោះឆ្នោត
ចេញផ្សាយ ថ្ងៃទី១៦ ខែមករា ឆ្នាំ២០២៤
ប្រធានស្តីទីគណៈកម្មាធិការប្រតិបត្តិនៃគណបក្សភ្លើងទៀនរាជធានីភ្នំពេញត្រូវបានឃាត់ខ្លួន កាលពីថ្ងៃ ច័ន្ទ និងបានបញ្ជូនខ្លួនទៅកាន់តុលាការ នៅថ្ងៃនេះ បន្ទាប់ពីរងការចោទប្រកាន់ដោយសាលាដំបូងរាជធានីភ្នំពេញ ពីបទ ក្លែងបន្លំឯកសារពាក់ព័ន្ធនឹងការបោះឆ្នោត ។
កាលពីថ្ងៃច័ន្ទ លោក ខឹម ចាន់វណ្ណៈ ត្រូវបានឃាត់ខ្លួនពេញមួយយប់ដោយនគរបាល ខណៈពេលដែលលោកកំពុងស្ថិតនៅក្នុងគេហដ្ឋានជាមួយក្រុមគ្រួសាររបស់លោក។ នៅថ្ងៃ អង្គារ៍ ស្នងការដ្ឋាននគរបាលរាជធានីភ្នំពេញបាន ចេញសេចក្តីថ្លែងការណ៍មួយ ដោយបានលើកឡើងថា លោក ខឹម ចាន់វណ្ណៈ ត្រូវបានឃាត់ខ្លួន ដើម្បីឆ្លើយបំភ្លឺទាក់ទិននឹង ការក្លែងបន្លំឯកសារពាក់ព័ន្ធនឹងការបោះឆ្នោតកាលពីថ្ងៃទី ៧ ខែវិច្ឆិកា ឆ្នាំ២០២៣ កន្លងទៅ។
ដើមបណ្តឹងចំនួន បីនាក់ បានអះអាងថា លោក វណ្ណៈ បានក្លែងឯកសារ ស្នាមមេដៃ និងហត្ថលេខារបស់ខ្លួន ដើម្បីដាក់ឈ្មោះអ្នកទាំងបីក្នុងបញ្ជីបេក្ខជនក្រុមប្រឹក្សាឃុំសង្កាត់ ផ្សារថ្មី ៣ ខណ្ឌដូនពេញ ដោយមិនមានការយល់ព្រមពីអ្នកទាំងបី ។ គណបក្សនយោបាយជាច្រើន តែងតែរក្សាបញ្ជីឈ្មោះបេក្ខជនរបស់ពួកគេ និងធ្វើបច្ចុប្បន្នភាពបញ្ជីនោះអំឡុងពេលប្រាំឆ្នាំ នៃអណត្តិក្រុមប្រឹក្សាឃុំសង្កាត់ ។
កាលពីថ្ងៃច័ន្ទ លោក សេង ហៀង ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ បានចេញដីកាបញ្ជាឲ្យចូលខ្លួន ដោយបញ្ជាឲ្យអាជ្ញាធរនាំខ្លួន លោក ខឹម ចាន់វណ្ណៈ មកកាន់តុលាការត្រឹមថ្ងៃទី ៣០ ខែមករា ឆ្នាំ ២០២៤។ លោក វណ្ណៈ ត្រូវបាននាំទៅកាន់តុលាការ នៅថ្ងៃអង្គារ៍នេះដើម្បីសួរចម្លើយ។
សមាជិកគណបក្សភ្លើងទៀនមួយរូបទៀត អ្នកស្រី ឆាយ ចិន្ថា ដែលជាអ្នកធ្វើការក្នុងក្រុមចលនាស្ត្រី ក៏ត្រូវបានគេរាយការណ៍ថា ត្រូវបានចាប់ខ្លួនកាលពីថ្ងៃចន្ទផងដែរ ទោះបីជាមិនមានការបញ្ជាក់ពីនគរបាល ឬព័ត៌មានលម្អិតទាក់ទងនឹងការចាប់ខ្លួនរហូតមកដល់ពេលនេះ ។
ការចាប់ខ្លួនទាំងនេះ គឺជាផ្នែកមួយដែលកន្លងមកមានការលើកឡើងពីការគំរាមកំហែង ការបៀតបៀន និងអំពើហិង្សា ទៅលើ សមាជិកគណបក្សភ្លើងទៀនទូទាំងប្រទេស។ ការឃាត់ខ្លួនចុងក្រោយទាំងនេះ កើតឡើងតែប៉ុន្មានសប្តាហ៍ប៉ុណ្ណោះ មុនការបោះឆ្នោតព្រឹទ្ធសភា នីតិកាលទី៥ នៅថ្ងៃទី ២៥ ខែកុម្ភៈ ឆ្នាំ ២០២៤ ដែលមានសមាជិកក្រុមប្រឹក្សាឃុំសង្កាត់ជាប់ឆ្នោតចំនួន ១១.៦២២ នាក់ នៅទូទាំងប្រទេស ដែលរួមទាំងសមាជិកក្រុមប្រឹក្សាចំនួន ២.១៩៨ នាក់ មកពីគណបក្សភ្លើងទៀន ដែលនឹងត្រូវបោះឆ្នោតជ្រើសរើសសមាជិកព្រឹទ្ធសភាថ្មី។
- ចំណងជើង & មូលបទ
- ការបោះឆ្នោត សិទិ្ធបញ្ចេញមតិ និងចូលរួម
