សវនាការឧទ្ធរណ៍របស់ឯកឧត្តម កឹម សុខា បានចាប់ផ្ដើម៖ ការចូលស្តាប់សវនាការត្រូវបានរឹតត្បឹត
ចេញផ្សាយ ថ្ងៃទី៣០ ខែមករា ឆ្នាំ២០២៤
នាព្រឹកនេះ សាលាឧទ្ធរណ៍រាជធានីភ្នំពេញ បានបើកសវនាការលើកដំបូងទាក់ទងនឹងការផ្តន្ទាទោសលើឯកឧត្តម កឹម សុខា ពីបទក្បត់ជាតិ និងបទសន្ទិដ្ឋិភាពជាមួយបរទេស ។ ឯកឧត្តម គឺជាអតីតប្រធានគណបក្សសង្គ្រោះជាតិ (CNRP) ដែលត្រូវបានរំលាយ ។ ឯកឧត្តមត្រូវបានផ្តន្ទាទោសឲ្យជាប់ពន្ធនាគារ ២៧ ឆ្នាំ ដោយសាលាដំបូងរាជធានីភ្នំពេញកាលពី ខែមីនា ឆ្នាំ២០២៣ ។ ការផ្តន្ទាទោសនេះ ធ្វើឡើងក្នុងរយៈពេលមិនដល់ ៥ខែ នោះទេ មុនពេលបោះឆ្នោតជាតិ កាលពីខែកក្កដា ឆ្នាំមុននេះ ។ ឯកឧត្តម កឹម សុខា ត្រូវបានបញ្ជូនទៅឃុំខ្លួនក្នុងផ្ទះ រហូតដល់សាលដីកាចូលជាស្ថាពរ ។
អំឡុងពេលសវនាការ មេធាវីរបស់ឯកឧត្តមបានស្នើសុំតុលាការឱ្យកែសម្រួលលក្ខខណ្ឌតឹងរឹងមួយចំនួនអំឡុងពេលឃុំខ្លួនក្នុងផ្ទះ ប៉ុន្តែចៅក្រមបានបដិសេធ និងបន្តឱ្យឯកឧត្តមស្ថិតនៅក្រោមលក្ខខណ្ឌនៃការត្រួតពិនិត្យតាមផ្លូវតុលាការដដែល ។
មុនពេលចាប់ផ្តើមសវនាការ អាជា្ញធរបានធ្វើការបិទផ្លូវជុំវិញសាលាឧទ្ធរណ៍ ដោយហាមឃាត់មិនឱ្យសាធារណជន ក៏ដូចជាអ្នកសារព័ត៌មានអាចចូលទៅខាងមុខអាគារតុលាការបាននោះទេ ។
ក្នុងសវនាការ មានអ្នកចូលរួមស្តាប់ជាតំណាងមកពីបណ្តាស្ថាប័ន អង្គការមិនមែនរដ្ឋាភិបាល ស្ថានទូត និងអង្គការសហប្រជាជាតិ ។ ទោះបីជាយ៉ាងណាតំណាងដែលមកពីបណ្តាស្ថាប័នសារព័ត៌មានដូចជា វិទ្យុបារាំងអន្តរជាតិ (RFI) ខេមបូចា (CamboJA) និង វិទ្យុសម្លេងសហរដ្ឋអាមេរិក (VOA) មិនត្រូវបានអនុញ្ញាតឱ្យចូលក្នុងបន្ទប់សវនាការនោះទេ ។
អ្នកគាំទ្រប្រហែលជាង ១០០ នាក់បានជួបជុំគ្នានៅមុខផ្លូវដែលត្រូវបិទ ខណៈដែលអ្នកកាសែត និងតំណាងអង្គការក្រៅរដ្ឋាភិបាលនានាក៏បានឈររង់ចាំនៅជិតរបាំងបិទផ្លូវនោះដែរ ។ យ៉ាងតិចណាស់ មានមន្ត្រីនគរបាល និងកងសន្តិសុខដែលមានឯកសណ្ឋាន និងស្លៀកពាក់ស៊ីវិលជាច្រើននាក់ ត្រូវបានដាក់ពង្រាយ និងថតរូប វីដេអូមនុស្សម្នាក់ៗ ដែលមានវត្តមាននៅក្បែរតុលាការនោះផងដែរ ។
តុលាការបានប្រកាសថា យ៉ាងហោចណាស់មានសវនាការចំនួន ៩ លើក ដែលនឹងត្រូវធ្វើឡើងនៅថ្ងៃព្រហស្បតិ៍ ពីរសប្តាហ៍ម្តង ហើយសវនាការរបន្ទាប់នឹងត្រូវធ្វើឡើងនៅថ្ងៃទី ៨ ខែកុម្ភៈ ខាងមុខនេះ ៕
- ចំណងជើង & មូលបទ
- ការបោះឆ្នោត កឹម សុខា
