សហគមន៍សំរោងត្បូង រាយការណ៍ថាមានអំពើហិង្សា នៅពេលអាជ្ញាធរកំពុងឈូសឆាយដីតំបន់បឹងតាមោក
ចេញផ្សាយ ថ្ងៃទី២៧ ខែកុម្ភៈ ឆ្នាំ២០២៤
នាព្រឹកនេះ សមាជិកសហគមន៍សំរោងត្បូងមួយចំនួន ត្រូវបានគេរាយការណ៍ថា បានរងរបួសពីការប្រឈមមុខដាក់គ្នារវាងអាជ្ញាធរជាច្រើននាក់ និងសមាជិកសហគមន៍មួយចំនួន នៅពេលដែលអាជ្ញាធរកំពុងចាក់ដីលុបតំបន់មួយក្នុងបឹងតាមោក ក្នុងរាជធានីភ្នំពេញ ។ តំបន់មួយចំនួនក្នុងផ្ទៃបឹងតាមោក ត្រូវបានរាជរដ្ឋាភិបាល កាត់ និងផ្តល់ទៅឱ្យក្រុមហ៊ុន និងបុគ្គលឯកជនមួយចំនួន ដែលមានទំនាក់ទំនងល្អ និងជិតស្និទ្ធជាមួយអាជ្ញាធររដ្ឋ នៅប៉ុន្មានឆ្នាំចុងក្រោយនេះ ។
សមាជិកមួយចំនួននៃសហគមន៍សំរោងត្បូង បានប្រមូលផ្តុំគ្នា កាលពីម្សិលមិញ និងនៅព្រឹកនេះ ដើម្បីតវ៉ាជំទាស់នឹងការឈូសឆាយរបស់អាជ្ញាធររដ្ឋដែលប៉ះពាល់ដល់ដីធ្លីរបស់សមាជិកសហគមន៍ ។ សមាជិកសហគមន៍មួយចំនួន ក៏កំពុងប្រឈមមុខទៅនឹងបណ្តឹងនៅតុលាការផងដែរ ដែលយ៉ាងតិចណាស់មានបណ្តឹងចំនួន ៤ ករណី កំពុងដំណើរការ ចាប់តាំងពីឆ្នាំ ២០២២ ដោយផ្អែកលើភាពសកម្មនិយមលើរឿងដីធ្លីរបស់ពួកគេ ។
ការប្រឈមមុខដាក់គ្នានៅពេលនេះ ដែលពាក់ព័ន្ធនឹងរឿងជម្លោះដីធ្លីដ៏រ៉ាំរ៉ៃនៅតំបន់បឹងតាមោក គឺកើតឡើងនៅពេលដែលគ្រឿងចក្រឈូសឆាយចំនួន ៣គ្រឿង ជាមួយនិងសន្តិសុខចំនួន ១០ នាក់ ត្រូវបានដាក់ពង្រាយ ដើម្បីឈូសឆាយដីដែលកាន់កាប់ដោយសមាជិកសហគមន៍ ។ សមាជិកសហគមន៍មួយចំនួន បានប្រមូលផ្តុំគ្នា និងព្យាយាមបញ្ឈប់ការឈូសឆាយនោះ ។ ក្រោយមកកងកម្លាំងនគរបាលមួយចំនួន បានមកដល់ និងឈរឃ្លាំមើលសកម្មភាពរបស់សហគមន៍ ។ ការឈូសឆាយ បានបន្តនាព្រឹកនេះ ដោយមានវត្តមានកងកម្លាំងនគរបាលច្រើនជាងកាលពីម្សិលមិញ ដោយមានចំនួនប្រហែលជាង ២០០ នាក់ រួមមាននគរបាលប្រមាណជាង ៥០ នាក់ និងលោកអភិបាលរងខណ្ឌព្រែកព្នៅ មួយនាក់ផងដែរ ។ អាជ្ញាធរមួយចំនួន បានឈរមើលការឈូសឆាយ ហើយអាជ្ញាធរមួយចំនួនទៀត ដែលរួមមាននគរបាល និងអាជ្ញាធរស្លៀកពាក់ស៊ីវិល បានថតរូប និងវីដេអូអំពីសកម្មភាពតវ៉ារបស់សមាជិកសហគមន៍ដែលមានចំនួនប្រមាណជាង ១០០ នាក់ កំពុងប្រមូលផ្តុំគ្នានៅតំបន់នោះ ។
ពលរដ្ឋមួយចំនួន ដែលរងរបួស ត្រូវបានបញ្ជូនទៅកាន់មន្ទីរពេទ្យដែលនៅក្បែរនោះ ដើម្បីទទួលការព្យាបាល ខណៈដែលសមាជិកសហគមន៍ដទៃទៀត ត្រូវបានគេរាយការណ៍ថា កំពុងត្រូវបានគេបង្ខំឱ្យចាកចេញពីតំបន់ដែលកំពុងមានជម្លោះ ។
ការប៉ះទង្គិចគ្នានាសប្តាហ៍នេះ កើតឡើងក្រោយពេលមានសេចក្តីជូនដំណឹងមួយ ដែលចុះថ្ងៃទី១៨ ខែកុម្ភៈ ឆ្នាំ២០២៤ ដែលចេញដោយរដ្ឋបាលខណ្ឌព្រែកព្នៅ ដោយបានអះអាងថាតំបន់នោះ គឺជាដីរបស់រដ្ឋ ហើយបង្គាប់ឱ្យពលរដ្ឋបញ្ឈប់ការតាំងទីលំនៅ និងចូលរួមសហការជាមួយអាជ្ញាធរក្នុងការឈូសឆាយតំបន់នោះ ។
សហគមន៍សំរោងត្បូង បានកកើតឡើង ហើយពលរដ្ឋចំនួន ៧៦ គ្រួសារ បានតាំងទីលំនៅក្នុងតំបន់នោះ ចាប់តាំងពីឆ្នាំ ១៩៩៦ ។ ពលរដ្ឋរស់នៅក្នុងសហគមន៍នេះ បានប្រឈមមុខនឹងការបាត់បង់ដីធ្លីរបស់ពួកគេ ចាប់តាំងពីរាជរដ្ឋាភិបាលចាប់ផ្តើមកាត់ផ្ទៃបឹងតាមោក ទៅឱ្យក្រុមហ៊ុន និងបុគ្គលឯកជន ។ រហូតមកទល់ពេលនេះ រាជរដ្ឋាភិបាលបានកាត់ផ្ទៃបឹងតាមោកចំនួន ៨០ ក្បាលដី រួចទៅហើយ ដែលគ្របដណ្តប់ប្រមាណជិត ៧៥% នៃផ្ទៃបឹងទាំងមូល ។ បឹងនេះ គឺជាបឹងធំបំផុតចុងក្រោយនៅក្នុងរាជធានីភ្នំពេញ ៕
- ឯកសារទាក់ទង
- ចំណងជើង & មូលបទ
- សិទិ្ធបញ្ចេញមតិ និងចូលរួម សិទ្ធិដីធ្លី
