កងកម្លាំងប្រើប្រាស់អាវុធ និងចាប់ខ្លួនអ្នកភូមិមួយចំនួន អំឡុងពេលប៉ះទង្គិចគ្នាក្នុងជម្លោះដីធ្លីដ៏រ៉ាំរ៉ៃក្នុងខេត្តព្រះវិហារ
ចេញផ្សាយ ថ្ងៃទី៦ ខែមីនា ឆ្នាំ២០២៤កងកម្លាំងប្រដាប់អាវុធមួយក្រុម ដែលរួមមានកងរាជអាវុធហត្ថ និងមន្ត្រីនគរបាលជាច្រើននាក់ រួមជាមួយនឹងមន្ត្រីរដ្ឋបាលព្រៃឈើមួយចំនួន បានប្រមូលផ្តុំគ្នាកាលពីព្រឹកមិញនេះ ដើម្បីការពារដីធ្លីដែលកំពុងមានជម្លោះនៅក្នុងខេត្តព្រះវិហារ ដោយមានការបាញ់គ្រាប់កាំភ្លើងពិត និងចាប់ខ្លួនពលរដ្ឋមួយចំនួន ។
អ្នកភូមិមួយចំនួន ត្រូវបានគេរាយការណ៍ថា ត្រូវបានអាជ្ញាធរចាប់ និងបញ្ជូនខ្លួនទៅកាន់ក្រុងព្រះវិហារ ។ ទីតាំងជាក់លាក់នៃការឃុំខ្លួន មិនទាន់ដឹងនៅឡើយ ។
អ្នកភូមិមួយចំនួនបានរាយការណ៍ថា កងកម្លាំងប្រដាប់អាវុធចម្រុះដែលប្រដាប់ដោយកាំភ្លើងយន្ត បានចូលទៅក្នុងតំបន់ជម្លោះនោះតាំងពីមុនទៀបភ្លឺ ហើយមានគ្រឿងចក្រសម្រាប់ឈូសឆាយមួយចំនួនចូលមកជាមួយផងដែរ ។ ដោយការភ័យខ្លាចថាទ្រព្យសម្បត្តិរបស់អ្នកភូមិនឹងត្រូវបានបំផ្លាញ ហើយអ្នកទាំងនោះអាចនឹងត្រូវបានកងកម្លាំងទាំងនោះបណ្តេញចេញដោយបង្ខំ អ្នកភូមិទាំងនោះបានប្រមូលផ្តុំគ្នា ទាមទារឱ្យកងកម្លាំង និងអាជ្ញាធរទាំងនោះចាកចេញពីតំបន់នោះ ។ សកម្មភាពប្រឈមមុខដាក់គ្នានេះ ត្រូវបានអ្នកភូមិថតជាវីដេអូបាន ដោយឃើញមានកងកម្លាំងប្រដាប់អាវុធបាញ់គ្រាប់កាំភ្លើងពិតជាច្រើនដង និងមានការប្រើប្រាស់គ្រាប់បែកផ្សែងផងដែរ ។
ជម្លោះដីធ្លីនេះកើតមានឡើងរវាងក្រុមហ៊ុន សីលាដាម៉ិច ខូអិលធីឌី និងពលរដ្ឋជាច្រើនគ្រួសារ ដែលរស់នៅក្នុងភូមិម្រេច ភូមិស្រយ៉ង់ត្បូង និងភូមិក្តាក់ ហើយនិងពលរដ្ឋមួយចំនួនទៀតដែលទើបមកតាំងទីលំនៅនៅក្នុងតំបន់នោះ ។
ក្រុមហ៊ុន សីលាដាម៉ិច ខូអិលធីឌី ទទួលបានដីសម្បទានសេដ្ឋកិច្ច កាលពីខែមីនា ឆ្នាំ២០១១ នៅក្នុងឃុំស្រយ៉ង់ និងឃុំភូមិត្បែងពីរ ស្រុកគូលែន ខេត្តព្រះវិហារ ។ ការទទួលបានដីសម្បទាននេះ ធ្វើឱ្យកើតមាននូវជម្លោះដីធ្លីជាមួយពលរដ្ឋរាប់រយគ្រួសារ ដែលបានរស់នៅទីនោះមុនពេលការផ្តល់ដីសម្បទាននេះ ។ កាលពីឆ្នាំ ២០២២ អ្នកតំណាងពលរដ្ឋចំនួន ១៣១ គ្រួសារ ដែលរងផលប៉ះពាល់ បានរាយការណ៍ថា ទ្រព្យសម្បត្តិ និងដំណាំរបស់ពួកគេ ត្រូវបានអាជ្ញាធរធ្វើការក្នុងនាមក្រុមហ៊ុន បំផ្លាញចោល ។
- ចំណងជើង & មូលបទ
- សិទ្ធិដីធ្លី