ស្ថាប័នឃ្លាំមើលនៃសាជីវកម្មហិរញ្ញវត្ថុអន្តរជាតិ ទទួលបណ្ដឹងអំពីការរំលោភបំពានជុំវិញកម្ចីឥណទានខ្នាតតូចនៅកម្ពុជា
ចេញផ្សាយ ថ្ងៃទី៣ ខែឧសភា ឆ្នាំ២០២២; ក្រុមសង្គមស៊ីវិលការិយាល័យភាពអនុលោម ទីប្រឹក្សាដោះស្រាយវិវាទនៃសាជីវកម្មហិរញ្ញវត្ថុអន្តរជាតិបានទទួលពាក្យបណ្ដឹង និងបន្តដំណើរការពិនិត្យមើលបណ្តឹងចោទប្រកាន់អំពីការរំលោភសិទ្ធិមនុស្ស និងការរំលោភលើបទដ្ឋានអនុវត្តស្តង់ដារ របស់ សាជីវកម្មហិរញ្ញវត្ថុអន្តរជាតិ ដែលប្រព្រឹត្តដោយ គ្រឹះស្ថានមីក្រូហិរញ្ញវត្ថុ និងធនាគារ ចំនួនប្រាំមួយ ដែលផ្តល់កម្ចីឥណទានខ្នាតតូចនៅក្នុងប្រទេសកម្ពុជា ។
បណ្ដឹងនេះត្រូវបានដាក់ក្នុងនាមជាអ្នកខ្ចីប្រាក់ដែលរងផលប៉ះពាល់ តំណាងដោយអង្គការសមធម៌កម្ពុជា និងសម្ព័ន្ធខ្មែរជំរឿន និងការពារសិទ្ធិមនុស្ស លីកាដូ ។ បណ្ដឹងនេះរៀបរាប់លម្អិតអំពីរបៀបដែល សាជីវកម្មហិរញ្ញវត្ថុអន្តរជាតិ បរាជ័យក្នុងការបំពេញកាតព្វកិច្ចរបស់ខ្លួន ដើម្បីចាត់វិធានការចាំបាច់ទាំងអស់ដោយហ្មត់ចត់ និងត្រួតពិនិត្យគម្រោងនានា ដើម្បីធានាបាននូវការអនុលោមតាមបទដ្ឋានអនុវត្តស្តង់ដារ ។ ជាលទ្ធផល ការខូចខាតយ៉ាងធ្ងន់ធ្ងរបណ្តាលមកពីការវិនិយោគទុន និងកម្ចីឥណទានរបស់ សាជីវកម្មហិរញ្ញវត្ថុអន្តរជាតិ នៅក្នុងគ្រឹះស្ថានមីក្រូហិរញ្ញវត្ថុនិងធនាគារ ចំនួនប្រាំមួយ ដែលផ្ដល់កម្ចីឥណទានខ្នាតតូចនៅក្នុងប្រទេសដូចជា ធនាគារអេស៊ីលីដា ធនាគារហត្ថា ធនាគារស្ថាបនា គ្រឹះស្ថានមីក្រូហិរញ្ញវត្ថុអម្រឹត គ្រឹះស្ថានមីក្រូហិរញ្ញវត្ថុអិលអូអិលស៊ី និងគ្រឹះស្ថានមីក្រូហិរញ្ញវត្ថុប្រាសាក់ ដែលរួមគ្នាកាន់កាប់ប្រមាណជា ៧៥ភាគរយ នៃកម្ចីឥទានខ្នាតតូចនៅក្នុងប្រទេសទាំងមូល ។
ការវិនិយោគប្រកបដោយគ្រោះថ្នាក់ និងខ្វះការចាត់វិធានការចាំបាច់ឱ្យបានគ្រប់ជ្រុងជ្រោយរបស់សាជីវកម្មហិរញ្ញវត្ថុអន្តរជាតិ ពាក់ព័ន្ធនឹងគម្រោងកម្ចីឥណទានខ្នាតតូចរបស់ខ្លួន បានបំផ្លិចបំផ្លាញការរស់នៅ និងខូចខាតដល់សហគមន៍ជាច្រើននៅក្នុងប្រទេស ហើយពួកគេត្រូវតែចាត់វិធានការ ដើម្បីផ្ដល់ការអនុគ្រោះពិតប្រាកដសម្រាប់អ្នកខ្ចីប្រាក់ទាំងនេះ
ស្ថាប័នទាំងប្រាំមួយទទួលបានការអនុម័តទឹកប្រាក់ច្រើនជាង៤០០លានដុល្លារ ពីមូលនិធិសាជីវកម្មហិរញ្ញវត្ថុអន្តរជាតិ នៅរយៈពេលប្រាំឆ្នាំចុងក្រោយនេះ រួមមានកម្ចីឥណទានដោយផ្ទាល់ កម្ចីបញ្ចូលគ្នា កម្ចីឥណទាននិងការវិនិយោគផ្អែកលើសមភាពពីមូលនិធិដែលគាំទ្រដោយមានសាជីវកម្មហិរញ្ញវត្ថុអន្តរជាតិ ។ ម្ចាស់បណ្ដឹងអំពាវនាវឱ្យការិយាល័យភាពអនុលោម ទីប្រឹក្សាដោះស្រាយវិវាទនៃសាជីវកម្មហិរញ្ញវត្ថុអន្តរជាតិ ចាប់ផ្ដើមស៊ើបអង្កេតជាបន្ទាន់ ទៅលើការខូចខាតបង្កឡើងដោយការវិនិយោគទាំងនេះ ។ ការិយាល័យភាពអនុលោម ទីប្រឹក្សាដោះស្រាយវិវាទ នឹងពិនិត្យមើលបណ្ដឹង ហើយម្ចាស់បណ្ដឹងអាចជ្រើសរើសរវាងការដោះស្រាយវិវាទឬការអនុវត្តវាយតម្លៃ និងការស៊ើបអង្កេត ដើម្បីកំណត់ពីទំហំទាំងមូល និងវិសាលភាពនៃការរំលោភបំពានលើគោលនយោបាយ និងបទដ្ឋានអនុវត្តស្ដង់ដាររបស់សាជីវកម្មហិរញ្ញវត្ថុអន្តរជាតិ ។
អ្នកនាង ណាលី ពីឡូក នាយិកាទទួលបន្ទុកកិច្ចការក្រៅតំបន់នៃអង្គការលីកាដូ បានមានប្រសាសន៍ថា ”ម្ចាស់បណ្ដឹងទាំងនេះ ប្រឈមនឹងហានិភ័យក្នុងការចែករំលែកបទពិសោធន៍របស់ពួកគេ ដើម្បីលាតត្រដាងអំពីការខូចខាត និងការរំលោភបំពានដែលប្រព្រឹត្តដោយ គ្រឹះស្ថានមីក្រូហិរញ្ញវត្ថុ និងធនាគារ នៅកម្ពុជា” ។ អ្នកនាងបន្ថែមថា “ការវិនិយោគប្រកបដោយគ្រោះថ្នាក់ និងខ្វះការចាត់វិធានការចាំបាច់ឱ្យបានគ្រប់ជ្រុងជ្រោយរបស់សាជីវកម្មហិរញ្ញវត្ថុអន្តរជាតិ ពាក់ព័ន្ធនឹងគម្រោងកម្ចីឥណទានខ្នាតតូចរបស់ខ្លួន បានបំផ្លិចបំផ្លាញការរស់នៅ និងខូចខាតដល់សហគមន៍ជាច្រើននៅក្នុងប្រទេស ហើយពួកគេត្រូវតែចាត់វិធានការ ដើម្បីផ្ដល់ការអនុគ្រោះពិតប្រាកដសម្រាប់អ្នកខ្ចីប្រាក់ទាំងនេះ” ។
តាមដែលយើងខ្ញុំបានដឹង នេះគឺជាបណ្ដឹងលើកទីមួយដែលត្រូវបានទទួលយកដោយ ការិយាល័យភាពអនុលោម ទីប្រឹក្សាដោះស្រាយវិវាទ ដោយបានចោទប្រកាន់ទៅលើការរំលោភបំពាននៃបទដ្ឋានអនុវត្តស្តង់ដាររបស់សាជីវកម្មហិរញ្ញវត្ថុអន្តរជាតិ ដោយសារការវិនិយោគជាមួយគ្រឹះស្ថានមីក្រូហិរញ្ញវត្ថុ និងអ្នកផ្ដល់កម្ចីឥណទានខ្នាតតូច ។ បណ្ដឹងនេះ បង្ហាញថា គម្រោងឥណទានខ្នាតតូចរបស់សាជីវកម្មហិរញ្ញវត្ថុអន្តរជាតិ បានរំលោភបំពានដោយផ្ទាល់ទៅលើ “បញ្ជីលើកលែង”របស់ខ្លួន ក្នុងការហាមឃាត់ការវិនិយោគមួយចំនួន ដែលពាក់ព័ន្ធនឹង ពលកម្មកុមារ និងការំលោភសិទ្ធិដីធ្លីរបស់ជនជាតិដើមភាគតិចដោយគ្មានការយល់ព្រម ក៏ដូចជាការរំលោភបំពានបទដ្ឋានអនុវត្តស្តង់ដាររបស់សាជីវកម្មហិរញ្ញវត្ថុអន្តរជាតិខាងក្រោមនេះ៖
▪ បទដ្ឋានអនុវត្ដន៍ទី១៖ ការវាយតម្លៃ និងការគ្រប់គ្រង ផលប៉ះពាល់និងហានិភ័យលើបរិស្ថាននិងសង្គម
▪ បទដ្ឋានអនុវត្ដន៍ទី២៖ លក្ខខណ្ឌការងារ និងពលកម្ម
▪ បទដ្ឋានអនុវត្ដន៍ទី៤៖ សុខភាព សុវត្ថិភាព និងសន្តិសុខសហគមន៍
▪ បទដ្ឋានអនុវត្ដន៍ទី៥៖ លទ្ធកម្មដីធ្លី (ការទទួលបានដី) និងការតាំងទីលំនៅថ្មីដោយមិនស្ម័គ្រចិត្ត
▪ បទដ្ឋានអនុវត្ដន៍ទី៧៖ ជនជាតិដើមភាគតិច
ពួកគេត្រូវតែចាត់វិធានការជាបន្ទាន់ ដើម្បីស៊ើបអង្កេតការរំលោភបំពានទាំងនេះដោយឯករាជ្យ និងផ្ដល់សំណងសមរម្យដល់ជនរងគ្រោះដែលរងការខូចខាតដោយការវិនិយោគខ្វះការប្រុងប្រយ័ត្នរបស់ពួកគេ ព្រមទាំងពង្រឹងការការពារអ្នកប្រើប្រាស់ ក៏ដូចជាបង្កើតប្រព័ន្ធឃ្លាំមើលប្រកបដោយប្រសិទ្ធភាព ដើម្បីបញ្ចៀសការខូចខាតដែលបង្កដោយការវិនិយោគនៅថ្ងៃអនាគតទៀត
កម្ចីឥណទានខ្នាតតូចចំនួន ជិតបីលានកម្ចី សរុបជាទឹកប្រាក់ជាង ១៤ពាន់លានដុល្លារ គឺកំពុងជាប់ជំពាក់ដោយប្រជាពលរដ្ឋតាមគ្រួសារ ហើយនេះតម្រូវឱ្យមានសវនកម្មទាំងស្រុងជាបន្ទាន់លើវិស័យកម្ចីឥណទានខ្នាតតូចនៅក្នុងប្រទេស ដើម្បីកំណត់ពីវិសាលភាព និងភាពធ្ងន់ធ្ងរនៃការខូចខាត ពាក់ព័ន្ធនឹងកម្ចីឥណទានទាំងនេះនៅទូទាំងប្រទេស ។
លោក អៀង វុទ្ធី នាយកប្រតិបត្តិនៃអង្គការសមធម៌កម្ពុជា បានមានប្រសាសន៍ថា “ការរំលោភសិទ្ធិមនុស្សធ្ងន់ធ្ងរ បង្កឡើងដោយវិស័យនេះ គឺបន្តកើតមានឡើងជាច្រើនឆ្នាំមកហើយ ហើយយើងសង្ឃឹមថា ព័ត៌មានលម្អិតដែលបានផ្ដល់នៅក្នុងបណ្ដឹងនេះ នឹងដើរតួជាការអំពាវនាវរំលឹក ដល់សាជីវកម្មហិរញ្ញវត្ថុអន្តរជាតិ ។ លោកបានបន្តថា “ពួកគេត្រូវតែចាត់វិធានការជាបន្ទាន់ ដើម្បីស៊ើបអង្កេតការរំលោភបំពានទាំងនេះដោយឯករាជ្យ និងផ្ដល់សំណងសមរម្យដល់ជនរងគ្រោះដែលរងការខូចខាតដោយការវិនិយោគខ្វះការប្រុងប្រយ័ត្នរបស់ពួកគេ ព្រមទាំងពង្រឹងការការពារអ្នកប្រើប្រាស់ ក៏ដូចជាបង្កើតប្រព័ន្ធឃ្លាំមើលប្រកបដោយប្រសិទ្ធភាព ដើម្បីបញ្ចៀសការខូចខាតដែលបង្កដោយការវិនិយោគនៅថ្ងៃអនាគតទៀត ៕
សម្រាប់ព័ត៌មានបន្ថែម សូមទំនាក់ទំនង៖
▪ លោក អៀង វុទ្ធី នាយកប្រតិបត្តិនៃអង្គការសមធម៌កម្ពុជាតាមរយៈ Signal: +៨៥៥ ១២ ៧៩១ ៧០០ (ភាសាខ្មែរ និងអង់គ្លេស)
▪ លោក អំ សំអាត នាយកទទួលបន្ទុកកិច្ចការទូទៅនៃអង្គការលីកាដូ តាមរយៈ Signal: +៨៥៥ ១០ ៣២៧ ៧៧០ (ភាសាខ្មែរ)
▪ អ្នកនាង ណាលី ពីឡូក នាយិកាទទួលបន្ទុកកិច្ចការក្រៅតំបន់នៃអង្គការលីកាដូ តាមរយៈ Signal: +៨៥៥ ១២២១៤ ៤៥៤ (ភាសាអង់គ្លេស)
សាវតារ
កាលពីខែមិថុនា ឆ្នាំ២០២១៖ អង្គការលីកាដូ និង អង្គការសមធម៌កម្ពុជាបានសហការគ្នា ចេញផ្សាយរបាយការណ៍រួមមួយស្ដីពី សិទ្ធិទទួលបានការអនុគ្រោះ សំឡេងសហគមន៍ដីធ្លីដែលជាប់ជំពាក់បំណុល ដែលបង្ហាញពីការំលោភសិទ្ធិមនុស្សទាក់ទងនឹងបំណុលឥណទានខ្នាតតូចនៅក្នុងសហគមន៍ចំនួន ១៤ នៃខេត្តចំនួនប្រាំបួននៅក្នុងប្រទេសកម្ពុជា ។ របាយការណ៍នេះរួមមានការសម្ភាសន៍ជាមួយប្រជាសហគមន៍រាប់រយនាក់នៅទូទាំងប្រទេស និងបានចងក្រងការរំលោភបំពានយ៉ាងទូលំទូលាយ និងជាប្រព័ន្ធដោយអ្នកផ្ដល់កម្ចីឥណទានខ្នាតតូចគាំទ្រដោយសាជីវកម្មហិរញ្ញវត្ថុអន្តរជាតិ ។ របាយការណ៍នេះ បានចងក្រងការរំលោភបំពានជាច្រើន ទាក់ទងនឹងបំណុលឥណទានខ្នាតតូច ក្នុងនោះរួមមាន ការអនុវត្តការផ្ដល់ប្រាក់កម្ចីបែបកេងប្រវញ្ច ការលក់ដីដោយបង្ខំ ការគំរាមកំហែង ពលកម្មកុមារ និងការបង្កើនបន្ទុកបំណុលសម្រាប់អ្នកខ្ចីប្រាក់ ។
ចាប់តាំងពីឆ្នាំ ២០១៩ អង្គការលីកាដូ បានចេញផ្សាយរបាយការណ៍ចំនួនបីផ្សេងទៀត ជាមួយនឹងអង្គការសង្គមស៊ីវិលក្នុងស្រុក ដែលបង្ហាញពីវិបត្តិជំពាក់បំណុលវ័ណ្ឌកនៅក្នុងប្រទេស ។ ក្នុងខែមិថុនា ឆ្នាំ២០២០ របាយការណ៍ស្ដីពី “ធ្វើការងាររហូតជំពាក់បំណុលវ័ណ្ឌក៖ ភាពជំពាក់បំណុលច្រើនលើសលុបក្នុងវិស័យកាត់ដេរនៅប្រទេសកម្ពុជា” ត្រូវបានចេញផ្សាយជាមួយអង្គការសិទ្ធិការងារសង់ត្រាល់ ។ ក្នុងខែឧសភា ឆ្នាំ២០២០ អង្គការលីកាដូ បានចេញផ្សាយរបាយការណ៍ស្ដីពី “ការនាំឲ្យមានចំណាកស្រុក៖បទពិសោធន៍នៃភូមិមួយអំពីបំណុលគ្រឹះស្ថានមីក្រូហិរញ្ញវត្ថុ និងការចំណាកស្រុកឆ្លងដែន” ហើយក្នុងខែសីហា ឆ្នាំ២០១៩ អង្គការសមាគមធាងត្នោតដែលធ្វើការលើសិទ្ធិក្នុងទីក្រុង និងអង្គការលីកាដូ បានចេញផ្សាយរបាយការណ៍ស្ដីពី “ការធ្វើឲ្យខូចខាតទ្រព្យដាក់បញ្ចាំ៖ការបាត់បង់ដីធ្លី និងការរំលោភបំពាន់ក្នុ្កងវិស័យមីក្រូហិរញ្ញវត្ថុនៅកម្ពុជា” ។
បច្ចុប្បន្ន ប្រជាពលរដ្ឋកម្ពុជាមានជាប់ជំពាក់កម្ចីឥណទានច្រើនជាងគេនៅក្នុងពិភពលោក ។ ប្រជាពលរដ្ឋចំនួន ៩៥% មានប្រាក់ចំណូលប្រចាំឆ្នាំ តិចជាងចំនួនកម្ចីគិតជាមធ្យមនេះទៅទៀត ហើយជាញឹកញាប់ កម្ចីឥណទានខ្នាតតូច ត្រូវតម្រូវឱ្យដាក់ប្លង់កម្មសិទ្ធិដីធ្លីជាទ្រព្យធានា ។ ទោះបីជាមានការចងក្រងឯកសារជាច្រើន ដែលបង្ហាញពីការរំលោភសិទ្ធិមនុស្ស ទាក់ទងនឹងកម្ចីឥណទានទាំងនេះក៏ដោយ ក៏គ្រឹះស្ថានមីក្រូហិរញ្ញវត្ថុ និងអ្នកផ្ដល់កម្ចីឥណទានខ្នាតតូចនៅកម្ពុជា នៅតែបន្តទទួលបានទឹកប្រាក់រាប់រយលានដុល្លារនៅក្នុងមូលនិធិរបស់ស្ថាប័នជាច្រើនដូចជា សាជីវកម្មហិរញ្ញវត្ថុអន្តរជាតិ និងធនាគារអភិវឌ្ឍន៍ជនបទ អង្គការអភិវឌ្ឍន៍នៃរដ្ឋនៅសហភាពអឺរ៉ុប ដូចជា ធនាគារអភិវឌ្ឍន៍ប្រទេសអាល្លឺម៉ង់ ធនាគារអភិវឌ្ឍន៍របស់ប្រទេសហូឡង់ (FMO), Proparco, Finnfund, Norfund, OeEB, ទីភ្នាក់ងារអភិវឌ្ឍន៍របស់ប្រទេសស៊ុយអែត (SIDA) និងវិនិយោគិនឯកជនមកពីសហភាពអឺរ៉ុប និងសហរដ្ឋអាមេរិក ៕
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
MP3៖ ស្តាប់សំឡេងជាភាសាខ្មែរ
- ចំណងជើង & មូលបទ
- គ្រឹះស្ថានមីក្រូហិរញ្ញវត្ថុ និងបញ្ហាបំណុល