ស្វែងរក
អត្ថបទ | មនុស្សជាង ៦០ នាក់ ត្រូវបានចោទប្រកាន់ និង កំពុងឃុំខ្លួនបណ្តោះអាសន្នជុំវិញព្រឹត្តិការណ៍នៃកិច្ចព្រមព្រៀង CLV-DTA
ថ្ងៃទី១៦ ខែកញ្ញា ឆ្នាំ២០២៤
ចាប់តាំងពីថ្ងៃទី ២៣ ខែកក្កដា ឆ្នាំ២០២៤ មក មនុស្សជាង ១០០ នាក់ត្រូវបានចាប់ខ្លួន និងច្រើនជាង ៦០ ត្រូវបានចោទប្រកាន់ និងកំពុងជាប់ឃុំក្នុងពន្ធនាគារដោយសារការបង្ហោះសារលើបណ្តាញសង្គម និងគម្រោងជួបជុំ ជុំវិញព្រឹត្តិការណ៍នៃកិច្ចព្រមព្រៀងតំបន់ត្រីកោណអភិវឌ្ឍន៍ កម្ពុជា-ឡាវ-វៀតណាម (CLV-DTA) ។ កិច្ចព្រមព្រៀងនេះមានរយៈពេល២០ឆ្នាំក្នុងការធ្វើពាណិជ្ចកម្ម និងកិច្ចសហប្រតិបត្តិការរវាងប្រទេសជិតខាងទាំងបី ។
អ្នកដែលត្រូវបានឃុំខ្លួន និងរងបទចោទប្រកាន់ គឺមានអាយុចន្លោះពី ១៦ឆ្នាំទៅ ៧០ឆ្នាំ ។ អ្នកត្រូវបានចាប់ និងឃុំខ្លួនទាំងនោះ រួមមាន អនីតិជនដែលមានអាយុក្រោម១៨ឆ្នាំ ចំនួន ៤ នាក់ ដែលកំពុងរងការចោទប្រកាន់ ។ អ្នកជាប់ឃុំភាគច្រើនរងបទចោទ ពីបទ រួមគំនិតក្បត់ថាបានបង្កើតគម្រោងឡើងដើម្បីប្រព្រឹត្តឧបឃាត ដែលអាចនឹងត្រូវផ្តន្ទាទោសឱ្យជាប់ពន្ធនាគារចាប់ពី ៥ ទៅ ១០ ឆ្នាំ ។ អ្នកផ្សេងទៀត ប្រឈមនឹងបទចោទ “ញុះញង់ឱ្យប្រព្រឹត្តបទឧក្រិដ្ឋ ជាអាទិ៍” ហើយអាចប្រឈមនឹងការជាប់ពន្ធនាគារពី ៦ខែ ទៅ ២ឆ្នាំ និងអ្នកខ្លះទៀតប្រឈមនឹងបទចោទប្រកាន់ផ្សេងៗទៀត ។ ពួកគេកំពុងតែស្ថិតនៅក្នុងពន្ធនាគារនៅទូទាំងប្រទេស ។ ក្នុងចំណោមពន្ធនាគារទាំងនោះ ពន្ធនាគារភាគច្រើនកំពុងតែមានបញ្ហាចង្អៀតណែនខ្លាំង និងលំបាកក្នុងការផ្តល់នូវសេវាកម្មជាមូលដ្ឋានដល់អ្នកជាប់ឃុំជាច្រើនលើសលប់ក្នុងពន្ធនាគារ ។
ថ្ងៃទី១៦ ខែកញ្ញា ឆ្នាំ២០២៤
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៏ (LRSU) កញ្ញា ឈឹម ស៊ីថរ ត្រូវបានតុលាការដោះលែងពីពន្ធនាគារ នាព្រឹកព្រលឹម នៅថ្ងៃនេះ បន្ទាប់ពីកញ្ញាបានអនុវត្តទោសចប់អស់រយៈពេល ២ ឆ្នាំ ក្នុងពន្ធនាគារ ក្រោមបទចោទប្រកាន់ ញុះញង់ ពាក់ព័ន្ធនឹងការធ្វើកូដកម្មអហិង្សាជាបន្តបន្ទាប់នៃសមាជិកសហជីពរបស់កញ្ញា ។ ស៊ីថរ ត្រូវបានមន្ត្រីពន្ធនាគារដោះលែង ពីមណ្ឌលអប់រំកែប្រែទី២ (ម២) នៅម៉ោងប្រហែល ៤ និង ៣០ នាទី ព្រឹក ។
ស៊ីថរ ត្រូវបានអាជ្ញាធរចាប់ខ្លួនយ៉ាងកំរោល កាលពីខែមករា ឆ្នាំ២០២២ នៅពេលដែល ស៊ីថរ ព្យាយាមដើរទៅចូលរួមជាមួយសមាជិកសហជីព LRSU រាប់រយនាក់ ដែលកំពុងធ្វើកូដកម្មអហិង្សា នៅមុខស្ថានទូតអូស្ត្រាលី ក្នុងរាជធានីភ្នំពេញ ។ ក្រោយមកប៉ុន្មានខែ ស៊ីថរ ត្រូវបានតុលាការដោះលែងឱ្យនៅក្រៅឃុំបណ្តោះអាសន្ន ។ បន្ទាប់មកទៀត ស៊ីថរ ត្រូវបានចាប់ និងឃុំខ្លួនម្តងទៀត កាលពីខែវិច្ឆិកា ឆ្នាំ២០២២ ក្រោយពេលត្រឡប់មកពីចូលរួមសិក្ខាសាលាមួយស្តីពីសិទិ្ធការងារនៅក្នុងប្រទេស អូស្ត្រាលី ។ អាជ្ញាធរជាច្រើននាក់ បានអះអាងថា ការចាប់ខ្លួននេះត្រូវបានធ្វើឡើង ដោយសារ ស៊ីថរ ល្មើសនឹងលក្ខខណ្ឌនៅក្រោមការត្រួតពិនិត្យរបស់តុលាការ ទាំងដែលស៊ីថរ និងមេធាវីរបស់ស៊ីថរ មិនដែលទទួលបានការជូនដំណឹងអំពីលក្ខខណ្ឌទាំងនេះក៏ដោយ ។
ថ្ងៃទី៩ ខែកញ្ញា ឆ្នាំ២០២៤
តុលាការកំពូលនៅថ្ងៃនេះ បានសម្រេចបដិសេធលើបណ្តឹងសាទុក្ខ របស់លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ ហៅកាត់ថា (IDEA) ដោយសម្រេចតម្កល់ផ្តន្ទាទោសពីបទ ផ្តើមគំនិតឱ្យមានអំពើហិង្សាដោយចេតនាមានស្ថានទម្ងន់ទោស យោងតាមមាត្រា ២៨ និង២១៨ នៃក្រមព្រហ្មទណ្ឌ ដែលជាប់ទាក់ទងទៅនឹងកូដកម្មកាលពីឆ្នាំ ២០១៤ នៅមុខរោងចក្រ យាក់ជីង ក្នុងរាជធានីភ្នំពេញ ។
លោក ពៅ ត្រូវបានសាលាដំបូងរាជធានីភ្នំពេញកាត់ទោសកាលពីឆ្នាំ២០១៤ ឱ្យជាប់ពន្ធនាគាររយៈពេលបួនឆ្នាំ និង ៦ខែ តែអនុវត្តទោស ៥ ខែ ទោសសល់ពីនោះត្រូវបានព្យួរ ហើយត្រូវបានតុលាការកំពូលសម្រេចតម្កល់សាលដីការបស់សាលាឧទ្ធរណ៍នៅថ្ងៃនេះ ។ លោក ពៅ បានជាប់ពន្ធនាគាររយៈពេល ៥ ខែជាមួយនឹង ២១ នាក់ផ្សេងទៀត ដែលជាប់ទាក់ទងនឹងបទចោទទាំងនេះកាលពីឆ្នាំ២០១៤ ។ លោកនៅតែស្ថិតក្នុងហានិភ័យនៃការព្យួរទោសនេះដែលត្រូវបានអនុវត្តប្រសិនលោកត្រូវបានផ្តន្ទាទោសលើបទចោទផ្សេងទៀតក្នុងរយៈពេល៥ឆ្នាំក្រោយ ។
អត្ថបទខ្លីៗ | តុលាការកាត់ទោស សមាជិកគណបក្សជំទាស់ ឱ្យជាប់ពន្ធនាគារចំនួន ២ ឆ្នាំកន្លះ ទាក់ទងនឹងការបង្ហោះលើបណ្តាញសង្គម ហ្វេសប៊ុក
ថ្ងៃទី២៨ ខែសីហា ឆ្នាំ២០២៤
នារសៀលនេះ សាលាដំបូងរាជធានីភ្នំពេញ បានសម្រេចផ្តន្ទាទោសលោក មឺ សេងហ៊ ដែលជាអនុប្រធានគណបក្សកម្លាំងជាតិខេត្តកំពង់ចាម ឱ្យជាប់ពន្ធនាគារចំនួន ២ ឆ្នាំកន្លះ ពីបទ “ញុះញង់ឱ្យមានការរើសអើង” និងបទ “ជេរប្រមាថជាសាធារណៈ” ពាក់ព័ន្ធនឹងការបង្ហោះសារនៅបណ្តាញសង្គម ហ្វេសប៊ុក របស់លោក ដែលបានរិះគន់កំណត់ត្រាស្ថានភាពប្រជាធិបតេយ្យរបស់រាជរដ្ឋាភិបាល ។
លោក សេងហ៊ ដែលគេស្គាល់ជាទូទៅឈ្មោះ គា វិសាល ត្រូវបានចាប់ខ្លួនកាលពីខែមីនា ឆ្នាំ២០២៤ ភ្លាមៗបន្ទាប់ពីលោកបានចូលរួមជីវភាពនយោបាយជាមួយគណបក្សកម្លាំងជាតិ ។ លោកត្រូវបានតុលាការឃុំខ្លួនបណ្តោះអាសន្ន នៅក្នុងពន្ធនាគាររាជធានីភ្នំពេញ (PJ) ពីបទ “ញុះញង់ឱ្យមានការរើសអើង” និងបទ “ជេរប្រមាថជាសាធារណៈ” យោងតាមមាត្រា ៣០៧ ៤៩៤ និង ៤៩៦ នៃក្រមព្រហ្មទណ្ឌ ។ លើសពីទោសពន្ធនាគារ នៅថ្ងៃនេះតុលាការបានបន្ថែមការពិន័យជាប្រាក់ចំនួន ៤ លានរៀល (ប្រមាណ ១.០០០ ដុល្លារអាមេរិក) និងបង្គាប់ឱ្យសងជំងឺចិត្តជាទឹកប្រាក់ ២០ លានរៀល (ប្រមាណ ៥.០០០ ដុល្លារអាមេរិក) ទៅលោក ម៉ៃ ហុងស្រៀង ដែលជាអតីតមន្ត្រីគណបក្សជំទាស់ ហើយក្រោយមកបានចូលរួមជីវភាពនយោបាយជាមួយគណបក្សកាន់អំណាច ។ លោក ម៉ៃ ហុងស្រៀង គឺជាអ្នកប្តឹងលោក សេងហ៊ ទៅតុលាការលើសំណុំរឿងនេះ ។
ថ្ងៃទី២២ ខែសីហា ឆ្នាំ២០២៤
នាព្រឹកនេះសាលាឧទ្ធរណ៍ភ្នំពេញបានប្រកាសសាលដីកា ដោយសម្រេចឱ្យលោក ជា ចាន់ ប្រធានសហជីពមូលដ្ឋានក្នុងរោងចក្រ វីង ស្តារស៊ូ របស់សហព័ន្ធសហជីពកម្ពុជា រួចផុតពីបទចោទប្រកាន់ ដែលលោកត្រូវបានចាប់ និងឃុំខ្លួន កាលពីខែកុម្ភៈ ឆ្នាំ២០២៤ ។
កាលពីថ្ងៃទី២០ ខែមិថុនា ឆ្នាំ២០២៤ សាលាដំបូងខេត្តកំពង់ស្ពឺបានផ្តន្ទាទោសលោក ចាន់ ដែលចោទពី បទសមគំនិតក្នុងអំពើលួច យោងតាមមាត្រា២៩ និង៣៥៦ នៃក្រមព្រហ្មទណ្ឌ ។ តុលាការបានផ្តន្ទាទោសលោក ឱ្យជាប់ពន្ធនាគាររយៈពេល ១ឆ្នាំ តែអនុវត្តទោស ៦ខែ និងទោសដែលនៅសល់ត្រូវព្យួរ ។ កាលពីថ្ងៃ១៩ ខែសីហា ដែលជាថ្ងៃសវនាការបណ្តឹងរបស់លោក ចាន់ នៅសាលាឧទ្ធរណ៍ លោកក៏ត្រូវបានដោះលែងនៅពេលល្ងាចនាថ្ងៃដដែល ដោយសារតែការអនុវត្តទោសពន្ធនាគារ ៦ខែ ត្រូវបានបញ្ចប់ ។
អត្ថបទខ្លីៗ | សមាជិកសហគមន៍សំរោងត្បូង៩រូបត្រូវបានផ្តន្ទាទោស
ថ្ងៃទី១៦ ខែសីហា ឆ្នាំ២០២៤
កាលពីម្សិលមិញ សាលាដំបូងរាជធានីភ្នំពេញបានធ្វើការផ្តន្ទាទោស សមាជិកសហគមន៍សំរោងត្បូង ៩ រូប ពីបទ “ហិង្សាដោយចេតនាមានស្ថានទម្ងន់ទោស” និងបទ “ស្ថានទម្ងន់ទោសនៃបទប្រឆាំងនឹងអ្នករាជការសាធារណៈ” យោងតាមមាត្រា ២១៨ និង មាត្រា៥០៤ នៃក្រមព្រហ្មទណ្ឌ ដោយកាត់ទោសឱ្យជាប់ពន្ធនាគាររយៈពេលពីរឆ្នាំ តែព្យួរទោស ។
បទចោទទាំងនេះធ្វើឡើងក្រោយពីហេតុការណ៍ដែលកើតឡើងកាលពីថ្ងៃទី១ ខែតុលា ឆ្នាំ២០២២ នៅពេលជនជាប់ចោទឈ្មោះ គង់ តឿ ផន សុខុម ប្រាក់ សុភា សាយ សារិទ្ធ សឿន ចំរើន សឿន ស្រីសុទ្ធ តាវ នី យន គឹមយឿន ព្យាយាមទៅចូលទៅផ្ទះរបស់ ហេង មៀង ក្នុងគោលបំណងដើម្បីជួយការពារទ្រព្យសម្បត្តិរបស់គាត់ ។ ក្នុងពេលនោះ អាជ្ញាធរ បានប្រាប់ទៅកាន់ជនជាប់ចោទទាំងនោះឱ្យឈប់ និងអះអាងថា សកម្មភាពនេះគឺជាការការពារលើប្រភេទសំណង់ដែលមិនអនុញ្ញាតឱ្យសាងសង់ ។ ជនជាប់ចោទទាំងអស់ មិនយល់ស្រប ឈានរហូតដល់មានជម្លោះដែលអាជ្ញាធរបានព្យាយាមកកម្ទេចទ្វារ នៅខណៈពេលដែលសមាជិកសហគមន៍ជាច្រើននាក់បានព្យាយាមការពារ ។ ទោះបីជា ឈ្មោះ ហេង មៀងដែលជាម្ចាស់ផ្ទះ ហើយពុំមានវត្តមានក្នុងជម្លោះនោះក៏ត្រូវរងការផ្តន្ទាទោស ដូចជនជាប់ចោទផ្សេងទៀតដែរ ។
ថ្ងៃទី១៥ ខែសីហា ឆ្នាំ២០២៤
នាព្រឹកនេះ សាលាឧទ្ធរណ៍បាត់ដំបង បានតម្កល់ការផ្តន្ទាទោសលើលោក អ៊ុង ថាប់រាំង ដែលជាអ្នកសារព័ត៌មានមួយរូប ពីបទ “បរិហារកេរ្តិ៍ជាសាធារណៈ” និងបទ “ញុះញង់ឱ្យប្រព្រឹត្តបទឧក្រិដ្ឋជាអាទិ៍” ដោយយោងតាមមាត្រា ៣០៥ និង ៤៩៥ នៃក្រមព្រហ្មទណ្ឌ ។
សាលាដំបូងខេត្តបន្ទាយមានជ័យ បានផ្តន្ទាទោសលោក ថាប់រាំង កាលពីថ្ងៃទី២៥ ខែមករា ឆ្នាំ២០២៤ តាមរយៈបណ្តឹងរបស់ប្រធានមន្ទីរពេទ្យបង្អែកក្រុងប៉ោយប៉ែត និងប្រធានសាខាពន្ធដារខេត្ត ។ អ្នកកាសែតរូបនេះបានចុះផ្សាយពីប្រភពប្រជាពលរដ្ឋចោទប្រកាន់ថាមន្រ្តីទាំងពីរបានប្រព្រឹត្តអំពើពុករលួយតាមរយៈសារព័ត៌មានអនឡាញឈ្មោះ ខ្មែរជាយដែន ។ សាលាដំបូងខេត្តបន្ទាយមានជ័យ បានផ្តន្ទាទោសលោក ឱ្យជាប់ពន្ធនាគារចំនួន ៦ ខែ ប៉ុន្តែទោសត្រូវព្យួរ និងពិន័យជាប្រាក់ ២ លានរៀល (ប្រមាណ ៥០០ ដុល្លារអាមេរិក) ។ នាថ្ងៃនេះដែរ សាលាឧទ្ធរណ៍បាត់ដំបង បានតម្កល់សេចក្តីសម្រេចផ្តន្ទាទោសខាងលើនេះទាំងស្រុង ៕
ថ្ងៃទី៩ ខែសីហា ឆ្នាំ២០២៤
នៅព្រឹកនេះ តុលាការកំពូលបានសម្រេចតម្កល់សាលក្រមសាលាដំបូង ដែលផ្តន្ទាទោសអនុប្រធានគណបក្សភ្លើងទៀន លោក ថាច់ សេដ្ឋា ពីបទញុះញង់ ឱ្យជាប់ពន្ធនាគាររយៈពេល ៣ ឆ្នាំ ទាក់ទងនឹងការណ៍ដែលលោកនិយាយទៅកាន់អ្នកគាំទ្រគណបក្សរបស់លោកជាច្រើននាក់ នៅក្នុងប្រទេសកូរ៉េខាងត្បូង កាលពីឆ្នាំមុន ។
ការសម្រេចសេចក្តីរបស់តុលាការកំពូល គឺជាសេចក្តីសម្រេចបិទផ្លូវតវ៉ា ។ សាលាដំបូងរាជធានីភ្នំពេញ កាលពីខែតុលា ឆ្នាំ ២០២៣ បានផ្តន្ទាទោសលោក ពីបទ ញុះញង់ឱ្យប្រព្រឹត្តបទឧក្រិដ្ឋ និងញុះញង់ឱ្យមានការរើសអើង ដោយយោងតាមមាត្រា ៤៩៤ ៤៩៥ និង ៤៩៦ នៃក្រមព្រហ្មទណ្ឌ ។ លោកត្រូវបានតុលាការកាត់ឱ្យជាប់ពន្ធនាគារកំណត់ចំនួន ៣ ឆ្នាំ និងពិន័យជាប្រាក់ ៤ លានរៀល (ប្រមាណ ១.០០០ ដុល្លារអាមេរិក) ។
អត្ថបទខ្លីៗ | តុលាការកំពូលបដិសេធសំណើសុំនៅក្រៅឃុំរបស់លោក កើត សារ៉ាយ
ថ្ងៃទី៧ ខែសីហា ឆ្នាំ២០២៤
នាព្រឹកនេះ លោក កើត សារ៉ាយ ដែលជាអតីតព្រះសង្ឃ និងជាអ្នកការពារសិទ្ធិមនុស្ស ត្រូវបានតុលាការកំពូលបដិសេធសំណើសុំនៅក្រៅឃុំបណ្តោះអាសន្ន លើសំណុំរឿងព្រហ្មទណ្ឌមួយដែលទាក់ទងទៅនឹងការបញ្ចេញមតិរបស់លោក ដោយបានអំពាវនាវឱ្យមានដំណោះស្រាយចំពោះករណីជម្លោះដីធ្លីនៅក្នុងខេត្តព្រះវិហារ ។
តុលាការកំពូលបានចេញសាលដីកាបដិសេធសំណើនៅក្រៅឃុំរបស់ លោក កើត សារ៉ាយ ប្រធានសមាគមសម្ព័ន្ធនិស្សិតបញ្ញវន្តខ្មែរ ដោយបានអះអាងថា អំពើល្មើសរបស់លោក សារ៉ាយ គឺជាអំពើ “មិនរាងចាល” ។ មុនពេលប្រកាសសាលដីកានេះ សវនាការស្នើសុំនៅក្រៅឃុំបណ្តោះអាសន្នមួយត្រូវបានធ្វើឡើង កាលថ្ងៃទី៣១ ខែកក្កដា ដោយពុំមានវត្តមានមេធាវីរបស់លោក សារ៉ាយ ឡើយ ។
អត្ថបទខ្លីៗ | សមាជិកគណបក្សជំទាស់ ៥រូប ត្រូវបានជាប់ឃុំ រីឯដីធ្លីរបស់លោក ទាវ វណ្ណុល ត្រូវបានតុលាការសម្រេចរឹបអូស
ថ្ងៃទី៣១ ខែកក្កដា ឆ្នាំ២០២៤
សមាជិកគណបក្សជំទាស់ ៥រូប ត្រូវបានអាជ្ញាធរចាប់ខ្លួនក្នុងខេត្តចំនួនពីរ ក្នុងរយៈពេល៦ថ្ងៃចុងក្រោយនេះ រីឯសាលាដំបូងរាជធានីភ្នំពេញវិញ បានសម្រេចធ្វើការរឹបអូសអចលនទ្រព្យបីកន្លែងរបស់ប្រធានគណបក្សភ្លើងទៀន លោក ទាវ វណ្ណុល ដែលទាក់ទងនៅការផ្តន្ទាទោសពីបទបរិហាកេរ្តិ៍ជាសាធារណៈ ។
សមាជិកពីររូបនៃគណបក្សភ្លើងទៀន និងពីររូបទៀតនៃគណបក្សឆន្ទៈខ្មែរមកពី ស្រុកបរសេដ្ឋ ខេត្តកំពង់ស្ពឺ ត្រូវបានចាប់ខ្លួន ចន្លោះពីថ្ងៃទី ២៦ ដល់ ថ្ងៃទី៣០ ខែកក្កដា ឆ្នាំ២០២៤ ។ អ្នកទាំងនោះត្រូវបានបញ្ជូនទៅឃុំខ្លួនបណ្តោះអាសន្ន ។ លោក អ៊ុក សុវណ្ណឆន សមាជិកក្រុមប្រឹក្សាឃុំនៃគណបក្សភ្លើងទៀន លោក តុ ដារ៉ា ប្រធានគណបក្សភ្លើងទៀនស្រុកបរសេដ្ឋ ព្រមទាំង លោក ប៊ុន សារុំ និងលោក ចែម សាវឿន អ្នកទាំងពីរជាសមាជិកក្រុមប្រឹក្សាស្រុកត្រូវបានចោទប្រកាន់ជាច្រើនបទល្មើសនៃក្រមព្រហ្មទណ្ឌចំពោះការងារជាប្រចាំរបស់គណបក្ស ។
ថ្ងៃទី២៥ ខែកក្កដា ឆ្នាំ២០២៤
ប្រធានគណបក្សភ្លើងទៀន លោក ទាវ វណ្ណុល ត្រូវបានតុលាការផ្តន្ទាទោស ពីបទបរិហារកេរ្តិ៍ជាសាធារណៈ នៅព្រឹកនេះ ហើយត្រូវបានបង្គាប់ឱ្យសងសំណងខូចខាតសរុបជាទឹកប្រាក់ប្រមាណ ១,៥ លានដុល្លារអាមេរិក ទៅកាន់រាជរដ្ឋាភិបាល ទាក់ទងនឹងការបញ្ចេញមតិរបស់លោកនៅក្នុងបណ្តាញសារព័ត៌មាន កាលពីខែកុម្ភៈ ឆ្នាំ២០២៤ ។
ប្រធានក្រុមប្រឹក្សាជំនុំជម្រះ នៅសាលាដំបូងរាជធានីភ្នំពេញ បានរកឃើញថា លោក វណ្ណុល ជាអតីតសមាជិកព្រឹទ្ធសភាមកពីគណបក្ស សម រង្ស៊ី មានកំហុសទាក់ទងនឹងបទបរិហារកេរ្តិ៍ជាសាធារណៈ តាមបញ្ញត្តិមាត្រា៣០៥ នៃក្រមព្រហ្មទណ្ឌ ។ លោក ត្រូវបានតុលាការបង្គាប់ឱ្យសងសំណងជម្ងឺចិត្តទៅកាន់រាជរដ្ឋាភិបាល សរុប ៦.០០០.០០០.០០០ លានរៀល (ប្រហែល ១,៥ លានដុល្លារអាមេរិក) និងប្រាក់ពិន័យសរុប ១០.០០០.០០០០ លានរៀល (ប្រហែល ២,៥០០ ដុល្លារអាមេរិក) ។
សេចក្តីថ្លែងការណ៍ | សកម្មភាពលោក ជា ចាន់ថា មិនមែនជាបទល្មើស
ថ្ងៃទី២៤ ខែកក្កដា ឆ្នាំ២០២៤
យើងខ្ញុំជា អង្គការសង្គមស៊ីវិល សមាគម សហព័ន្ធ សហជីព ពិតជាមានការខកចិត្តជាខ្លាំងចំពោះសាលាដំបូងខេត្តស្វាយរៀង ដែលបានសម្រេចចោទប្រកាន់ និងបញ្ជូនលោក ជា ចាន់ថា ទៅឃុំខ្លួនបណ្តោះអាសន្ន នៅថ្ងៃទី១៩ ខែកក្កដា ឆ្នាំ២០២៤ ។ លោក ជា ចាន់ថា ជាថ្នាក់ដឹកនាំតំបន់របស់សមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ(IDEA) ការងារដែលលោកបានធ្វើក្នុងខេត្តស្វាយរៀងកាលពីថ្ងៃទី១៦ ខែកក្កដា ឆ្នាំ២០២៤ ជាសកម្មភាពស្របទៅនឹងគោលនយោបាយរបស់រាជរដ្ឋាភិបាលទាក់ទងនឹងបេឡាជាតិសន្តិសុខសង្គម (បសស) ប៉ុន្តែបែរជាលោក ជា ចាន់ថា ត្រូវរងការចោទប្រកាន់ពីបទឆបោក យោងតាមមាត្រា ៣៧៧ និង ៣៧៨ និងបទធ្វើសកម្មភាពបង្កើតឱ្យមានការយល់ច្រឡំជាមួយការបំពេញមុខងារសាធារណៈ យោងតាមមាត្រា ៦១០ នៃក្រមព្រហ្មទណ្ឌ ដែលលោកអាចនឹងប្រឈមមុខជាប់ពន្ធនាគាររហូតដល់៣ឆ្នាំ ។
កន្លងមកសមាគមធ្លាប់បានធ្វើជាវេទិកាពន្យល់ស្តីអំពីកិច្ចគាំពារសង្គមនៅថ្នាក់មូលដ្ឋានតាមបណ្តាខេត្តដោយមានការអញ្ជើញមន្ត្រីបេឡាជាតិសន្តិសុខសង្គម (បសស) ដើម្បីចូលរួមជួយពន្យល់ឱ្យកម្មវិធីនេះបានជ្រួតជ្រាបដល់ថ្នាក់មូលដ្ឋាន បងប្អូនអាជីវករ អ្នកលក់ដូរតាមដងផ្លូវ អ្នកធ្វើការតាមផ្ទះ ដើម្បីបានដឹង ហើយទទួលយកកម្មវិធីបេឡាជាតិរបបសន្តិសុខសង្គម ដោយទៅចុះបញ្ជីចូលជាសមាជិកដោយស្ម័គ្រចិត្ត ។ លោក ជា ចាន់ថា និងសកម្មជនផ្សេងទៀត បានចុះធ្វើកិច្ចការងារនេះទាំងអស់គ្នា កិច្ចការងារនេះ ស្របទៅតាមទិសដៅរបស់រាជរដ្ឋាភិបាល និងក៏ជាចំណែកមួយក្នុងការការពារបងប្អូនដែលកំពុងប្រកបមុខរបរសេដ្ឋកិច្ចក្រៅប្រព័ន្ធ បានចូលក្នុងប្រព័ន្ធឆាប់រហ័ស ។
ថ្ងៃទី២០ ខែកក្កដា ឆ្នាំ២០២៤
លោក ជា ចាន់ថា ដែលជាថ្នាក់ដឹកនាំសមាគមឯករាជ្យនៃសេដ្ឋកិច្ចក្រៅប្រព័ន្ធ (IDEA) នៅខែត្រស្វាយរៀង ត្រូវបានសាលាដំបូងខេត្តស្វាយរៀង បង្គាប់ឱ្យឃុំខ្លួនបណ្ដោះអាសន្នរង់ចាំសវនាការ កាលពីល្ងាចថ្ងៃសុក្រ បន្ទាប់ពីលោកត្រូវបានចាប់ខ្លួន កាលពីថ្ងៃទី ១៦ ខែកក្កដា ។ ការចាប់ខ្លួននេះ ត្រូវបានធ្វើឡេីង នៅពេលដែលលោកកំពុងនិយាយជាមួយកម្មករ អំពីការទទួលបានកិច្ចគាំពារសង្គម តាមរយៈរបបបេឡាជាតិសន្តិសុខសង្គម ឬ ប.ស.ស ។
លោក ចាន់ថា បានចូលរួមក្នុងសិក្ខាសាលាមួយ កាលពីថ្ងៃអង្គារ ដេីម្បីពិភាក្សាអំពីបំរែបំរួលអាកាសធាតុ និងកិច្ចគាំពារសង្គម នៅក្រុងបាវិត ខែត្រស្វាយរៀង ។ ក្រោយពីសិក្ខាសាលាបានបញ្ចប់ លោកបានជួបជាមួយកម្មករមួយចំនួន និងនិយាយអំពីរបបបេឡាជាតិសន្តិសុខសង្គម ឬ ប.ស.ស ។ អំឡុងពេលនោះ លោកក៏ត្រូវបានអាជ្ញាធរចាប់ខ្លួន ។
អត្ថបទខ្លីៗ | ពលរដ្ឋមួយគ្រួសារនៅខេត្តសៀមរាប ត្រូវបានតុលាការផ្តន្ទាទោសពាក់ព័ន្ធនឹងជម្លោះដីធ្លី
ថ្ងៃទី១៨ ខែកក្កដា ឆ្នាំ២០២៤
នាព្រឹកនេះ សាលាដំបូងខេត្តសៀមរាប បានប្រកាសសាលក្រម សម្រេចផ្តន្ទាទោសពលរដ្ឋជាជនជាតិដើមភាគតិច កួយ ចំនួន ៣ នាក់ ពាក់ព័ន្ធនឹងជម្លោះដីធ្លីដ៏រ៉ាំរ៉ៃមួយ ជាមួយនឹងមន្ទីរបរិស្ថានខេត្តសៀមរាប និងក្រុមយោធា នៅលើដីដែលពួកគាត់បានកាន់កាប់តាំងពីឆ្នាំ២០០០ មក ដែលគាត់បានរស់នៅ និងដាំដំណាំរហូតមកចាប់តាំងពីពួកគាត់កាន់កាប់រហូតដល់បច្ចុប្បន្ន ប៉ុន្តែត្រូវបានមន្ត្រីបរិស្ថានអះអាងថាជាដីសហគមន៍តំបន់ការពារធម្មជាតិ “ជប់សោម” ដែលស្ថិតនៅក្នុងដែនជម្រកសត្វព្រៃ គូលែន-ព្រហ្មទេព ។
កាលពីខែសីហា ឆ្នាំ២០២៣ មន្ត្រីមកពីមន្ទីរបរិស្ថាន រួមជាមួយនឹងអាជ្ញាធរក្នុងតំបន់ និងក្រុមយោធា បានទៅធ្វើការហាមឃាត់ពួកគាត់មិនឱ្យដាំស្វាយ និងដកយកកូនស្វាយដែលពួកគាត់កំពុងដាំនៅលើដីចម្ការរបស់អ្នកទាំងពីរនាក់ គឺអ្នកស្រី សាន ស្រែ និងលោក ប្រែង ហ៊ីង ។ នៅខណៈនោះលោក សាន សិទ្ធ ដែលជាប្អូនប្រុសរបស់អ្នកស្រី សាន ស្រែ បានថតវីដេអូ Live ពីព្រឹត្តការណ៍នេះ និងសួរនាំទៅកាន់មន្ត្រីដែលចុះមកហាមឃាត់ ។ សមាជិកគ្រួសារទាំងបីនាក់ ជាជនជាតិដើមភាគតិច កួយ និងសកម្មក្នុងការការពារដីធ្លី និងសិទិ្ធដីធ្លីរបស់ពលរដ្ឋជាង ២៥០ គ្រួសារ ។ ប៉ុន្មានសប្តាហ៍ក្រោយមក អ្នកទាំងបីរងការចោទប្រកាន់ពីបទល្មើសព្រហ្មទណ្ឌពីតុលាការ ។
ថ្ងៃទី១៦ ខែកក្កដា ឆ្នាំ២០២៤
កាលពីម្សិលមិញព្រះសង្ឃមួយអង្គនៅខេត្តបាត់ដំបង ត្រូវបានបណ្តេញចេញពីវត្ត ប៉ុន្មានថ្ងៃបន្ទាប់ពីលោកបាននិមន្តចូលរួមការដង្ហែក្បួនដោយអហិង្សា ដើម្បីរម្លឹកខួប៨ឆ្នាំ នៃការស្លាប់លោកបណ្ឌិត កែម ឡី ។
ព្រះតេជព្រះគុណ សាំង រិទ្ធី ត្រូវបានគណៈកម្មការវត្តដំរីស ក្រុងបាត់ដំបង បណ្ដេញចេញពីវត្តកាលពីល្ងាចថ្ងៃទី១៥ ខែកក្កដា ឆ្នាំ២០២៤ ។ បច្ចុប្បន្នលោកគង់នៅវត្តផ្សេងក្នុងក្រុងបាត់ដំបង។
ព្រះតេជព្រះគុណ សាំង រិទ្ធី បានចូលរួមដង្ហែក្បួនជាមួយនឹងព្រះសង្ឃ និងសកម្មជនជាច្រើននាក់ផ្សេងទៀត កាលពីថ្ងៃទី១០ ខែកក្កដា ឆ្នាំ២០២៤ ដើម្បីរម្លឹកខួប នៃការបាញ់សម្លាប់អ្នកវិភាគនិងជាអ្នកអត្ថាធិប្បាយលើបញ្ហាសង្គម លោកបណ្ឌិត កែម ឡី ក្នុងឆ្នាំ២០១៦ ។ សកម្មជនមួយក្រុមនោះបានកាន់បដាដែលមានរូបលោកបណ្ឌិត កែម ឡី និងសកម្មជនលេចធ្លោដែលត្រូវបានគេធ្វើឃាតមួយចំនួនទៀត និងអំពាវនាវឱ្យដោះលែងសកម្មជនបរិស្ថាននៃចលនាមាតាធម្មជាតិ ដែលកំពុងជាប់ពន្ធនាគារថ្មីៗនេះ ។ ដំបូងឡើយ អាជ្ញាធរបានព្យាយាមរារាំងការប្រមូលផ្តុំដោយអហិង្សានេះ ប៉ុន្តែអ្នកចូលរួមបានបន្តការហែក្បួន ដោយបញ្ចប់នៅវិមានឯករាជ្យនៅកណ្តាលក្រុងបាត់ដំបង។
ថ្ងៃទី១០ ខែកក្កដា ឆ្នាំ២០២៤
សកម្មជនយុវជន ព្រះសង្ឃ ក្រុមសង្គមស៊ីវិល និងសមាជិកក្រុមគ្រួសាររបស់សកម្មជនដែលកំពុងជាប់ឃុំ បានជួបជុំគ្នាថ្ងៃនេះ ដើម្បីហែក្បួន រម្លឹកខួបលើកទី៨ នៃការបាញ់សម្លាប់អ្នកវិភាគនយោបាយលោកបណ្ឌិត កែម ឡី ដោយអំពាវនាវស្វែងរកយុត្តិធម៌ជូនលោក និងស្នើសុំឱ្យមានការដោះលែងសកម្មជនយុវជន និងបរិស្ថាន ។
បន្ទាប់ពី ដើរក្បួនក្នុងរាជធានីភ្នំពេញ ប្រហែលជាម៉ោង ៩ ព្រឹក ក្រុមយុវជនបានមកជួបជុំគ្នានៅស្ថានីយប្រេងឥន្ធនៈកាល់តិច បូកគោ ជាកន្លែងដែលលោកបណ្ឌិត កែម ឡី ត្រូវបានគេបាញ់សម្លាប់កាលពីថ្ងៃទី១០ ខែកក្កដា ឆ្នាំ២០១៦ នៅពេលដែលលោកកំពុងតែពិសាកាហ្វេ ពេលព្រឹក ។ ក្រោយមក ការស៊ើបអង្កេតមួយត្រូវបានធ្វើឡើង ប៉ុន្តែមិនមានលក្ខណៈគ្រប់គ្រាន់ ។ សង្គមស៊ីវិលនៅតែបន្តទាមទារឱ្យមានការស៊ើបអង្កេតដោយឯករាជ្យចំពោះករណីឃាតកម្មនេះ នៅខណៈពេលដែលអាជ្ញាធរនៅតែមានពេលវេលាក្នុងការរារាំងលើសកម្មភាពចូលរួមរម្លឹកខួបនៃការបាញ់សម្លាប់លើលោកបណ្ឌិត ។
ថ្ងៃទី៤ ខែកក្កដា ឆ្នាំ២០២៤
សេចក្តីសម្រេចរបស់សាលាដំបូងរាជធានីភ្នំពេញ ដែលបានផ្តន្ទាទោសទៅលើសកម្មជនបរិស្ថាននៃចលនាមាតាធម្មជាតិ ចំនួន ១០រូប ដោយដាក់ពន្ធនាគារពី ៦ ទៅ ៨ ឆ្នាំ ហើយចាប់ខ្លួនអ្នកទាំងនោះនៅថ្ងៃទី០២ ខែកក្កដា ឆ្នាំ២០២៤ នេះគឺជារឿងដែលគួរឱ្យអាម៉ាស់យ៉ាងខ្លាំងសម្រាប់ជាតិយើង ។ ការបំបិទសំឡេងរបស់សកម្មជនបរិស្ថាន និងការចោទប្រកាន់ថា សកម្មភាពតស៊ូមតិដោយសន្តិវិធីរបស់ពួកគេ ជាការគំរាមកំហែងដល់សន្តិសុខជាតិ នេះគឺធ្វើឱ្យប្រព័ន្ធយុត្តិធម៌រងភាពអាម៉ាស់ ។
អាជ្ញាធរមានសមត្ថកិច្ចគួរតែស្តាប់ និងចូលរួមធ្វើការជាមួយយុវជន និងសកម្មជនបរិស្ថាន ហើយសូមមេត្តាបញ្ឈប់ការចំណាយធនធាន ដើម្បីធ្វើទុក្ខបុកម្នេញ គំរាមកំហែង និងដាក់ទោសទៅលើយុវជនវ័យក្មេងដែលក្លាហាន និងមានឆន្ទៈខ្ពស់ក្នុងការការពារធនធានធម្មជាតិដ៏មានតម្លៃបំផុតរបស់កម្ពុជា ។
ថ្ងៃទី៣ ខែកក្កដា ឆ្នាំ២០២៤
កាលពីម្សិលមិញ សកម្មជនបរិស្ថាននៃចលនាមាតាធម្មជាតិចំនួន ៥ រូប ត្រូវបានតុលាការផ្តន្ទាទោសដាក់ឱ្យជាប់ពន្ធនាគារពី ៦ ទៅ ៨ ឆ្នាំ ។ ក្រោយមកអ្នកទាំង ៥ ត្រូវបានអាជ្ញាធរបញ្ជូនខ្លួនទៅឃុំនៅពន្ធនាគារចំនួន ៥ ខុសៗគ្នា ដោយពន្ធនាគារមួយចំនួន មានចម្ងាយរាប់រយគីឡូម៉ែត្រពីគ្នា និងពីកន្លែងដែលក្រុមគ្រួសារពួកគេកំពុងរស់នៅ ។ ការបំបែកអ្នកទាំងនោះចេញពីគ្នា និងដាក់ឱ្យជាប់ឃុំនៅក្នុងពន្ធនាគារឆ្ងាយពីគ្នា និងឆ្ងាយពីក្រុមគ្រួសាររបស់ពួកគេបែបនេះ គឺជាទណ្ឌកម្មផ្លូវចិត្តដ៏ធ្ងន់ធ្ងរ និងមិនដែលមានពីមុនមក ។
លោក ថុន រដ្ឋា ត្រូវបានបញ្ជូនទៅឃុំខ្លួននៅមណ្ឌលអប់រំកែប្រែទី ៣ (ម៣) នៅក្នុងខេត្តត្បូងឃ្មុំ ។ លោក លី ចាន់ដារ៉ាវុត ត្រូវបានបញ្ជូនទៅឃុំខ្លួននៅពន្ធនាគារខេត្តកណ្តាល រីឯកញ្ញា ភួន កែវរស្មី ត្រូវបានបញ្ជូនទៅឃុំខ្លួននៅពន្ធនាគារខេត្តពោធិ៍សាត់ ។ លោក យីម លាងហ៊ី ត្រូវបានបញ្ជូនទៅឃុំខ្លួននៅពន្ធនាគារខេត្តកំពង់ស្ពឺ ហើយកញ្ញា ឡុង គន្ធា ត្រូវបានបញ្ជូនទៅឃុំនៅពន្ធនាគារខេត្តព្រះវិហារ ។
ការបញ្ជូនខ្លួនពិរុទ្ធជនទៅកាន់ពន្ធនាគារយ៉ាងឆ្ងាយពីក្រុមគ្រួសារ និងមេធាវីរបស់ពួកគេបែបនេះ គឺជាការរំលោភបំពានសិទិ្ធរបស់ជនជាប់ឃុំ ដែលត្រូវបានលើកឡើងនៅក្នុងរបាយការណ៍របស់អង្គការសហប្រជាជាតិស្តីពី បញ្ហាសិទិ្ធមនុស្សនៃការឃុំខ្លួនអ្នកទោសកកកុញ និងលើសចំនួនកំណត់ ។ សកម្មភាពនេះក៏ជាការរំលោភបំពានសិទិ្ធមនុស្សផងដែរ ដោយផ្អែកលើ “ច្បាប់នេលសុនម៉ាន់ដេឡា” ស្តីពីការប្រព្រឹត្តិទៅលើអ្នកទោសដោយមានភាពមនុស្សធម៌ ។ គោលការណ៍នៃច្បាប់នេះ បានអំពាវនាវឱ្យអ្នកជាប់ឃុំទាំងអស់ ត្រូវជាប់ឃុំនៅក្បែរក្រុមគ្រួសាររបស់ពួកគេ។
ថ្ងៃទី២ ខែកក្កដា ឆ្នាំ២០២៤
នាព្រឹកនេះសកម្មជនបរិស្ថាននៃចលនាមាតាធម្មជាតិចំនួន ១០នាក់ ត្រូវបានសាលាដំបូងរាជធានីភ្នំពេញ ផ្តន្ទាទោសដាក់ឱ្យជាប់ពន្ធនាគារពី ៦ ដល់ ៨ ឆ្នាំ ខណៈដែលសកម្មជន ៤រូប ដែលមានវត្តមាននៅមុខតុលាការ ត្រូវបានចាប់ខ្លួនយ៉ាងហិង្សាដោយកងកម្លាំងសន្តិសុខជាច្រើននាក់ ។
ក្រុមប្រឹក្សាជំនុំជម្រះ បានប្រកាសសាលក្រមនៅឯសាលាដំបូងរាជធានីភ្នំពេញ នាព្រឹកថ្ងៃអង្គារ៍នេះ ដែលជាការបិទបញ្ចប់សវនាការជំនុំជម្រះលើអ្នកទាំងនោះ ពាក់ព័ន្ធនឹងភាពសកម្មនិយមអហិង្សា ក្នុងកិច្ចការពារបរិស្ថានរបស់ពួកគេ ។ អ្នកទាំងនោះ រងនូវបទចោទប្រកាន់ចំនួនពីរ ដែលរួមមានបទ រួមគំនិតក្បត់ និងបទប្រមាថចំពោះអង្គព្រះមហាក្សត្រ។
សេចក្តីថ្លែងការណ៍ | សូមបញ្ឈប់ការធ្វើទុក្ខបុកម្នេញទៅលើអង្គការសង់ត្រាល់ ពាក់ព័ន្ធនឹងរបាយការណ៍រោងចក្រកាន់តែប្រសើរ
ថ្ងៃទី២៧ ខែមិថុនា ឆ្នាំ២០២៤
ការសម្រេចចិត្តរបស់ក្រសួងមហាផ្ទៃ ក្នុងការពិនិត្យមើល ទៅលើញត្តិដែលបានទទួល និងមើលអំពីលទ្ធភាពដែលអាចធ្វើការស៊ើបអង្កេតលើ មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (CENTRAL) ឬ អង្គការ សង់ត្រាល់ ពាក់ព័ន្ធនឹងការចេញផ្សាយរបាយការណ៍របស់ស្ថាប័ននេះ អំពីគម្រោងរោងចក្រកាន់តែប្រសើរនៅកម្ពុជា (Better Factories Cambodia) គឺជាការឆ្លើយតបបែបអវិជ្ជមាន និងជាការព្យាយាមបំភិតបំភ័យទៅលើអង្គការមិនមែនរដ្ឋាភិបាល ដែលកំពុងធ្វើការងារដើម្បីជួយធ្វើឱ្យកាន់តែប្រសើរឡើង នូវសេរីភាពរបស់សហជីព សម្រាប់កម្មករ និងសហជីពនៅកម្ពុជា ។
