ទិវាសិទ្ធិលំនៅឋានពិភពលោកឆ្នាំ២០២០៖ លើកកម្ពស់សំឡេងប្រជាពលរដ្ឋជាចម្បង
ចេញផ្សាយ ថ្ងៃទី២០ ខែតុលា ឆ្នាំ២០២០ជារៀងរាល់ឆ្នាំ សហគមន៍ជាច្រើននៅលើពិភពលោករួមគ្នា ប្រារព្ធទិវាសិទ្ធិលំនៅឋានពិភពលោក និងសិទ្ធិទទួលបានទីលំនៅសមរម្យ ។ ប្រជាពលរដ្ឋកម្ពុជាជាច្រើននាក់មិនទាន់ទទួលបាន សិទ្ធិទទួលបានលំនៅឋានសមរម្យនៅឡើយទេ ។ បញ្ហាជម្លោះដីធ្លីជាមួយក្រុមហ៊ុនធំៗ បានធ្វើឱ្យប្រជាពលរដ្ឋជាច្រើនគ្រួសារបាត់បង់ដីស្រែចំការ ។ កង្វះខាតនៃហេដ្ឋារចនាសម្ព័ន្ធសំខាន់ៗដូចជា ផ្លូវថ្នល់ សាលារៀន និងមណ្ឌលសុខភាព នាំឱ្យសហគមន៍ទាំងនេះឃ្លាតឆ្ងាយពីសេវាសាធារណៈមូលដ្ឋានដែលពួកគាត់ត្រូវការ ដើម្បីរស់នៅប្រកបដោយសុវត្ថិភាព និងសេចក្ដីថ្លៃថ្នូរ ។ ពីមួយឆ្នាំទៅមួយឆ្នាំ សហគមន៍ទាំងនេះបានចូលរួមជាមួយគ្នាក្នុងការតវ៉ាដោយសន្តិវិធី ដើម្បីស្នើសុំឱ្យអាជ្ញាធរធានាថា សិទ្ធិជាមូលដ្ឋានរបស់ពួកគាត់ក្នុងការរស់រានមានជីវិត និងមានជីវភាពរស់នៅសមរម្យទាំងនេះ ត្រូវបានគោរព ។
ប៉ុន្តែបន្ទាប់មានការចាប់ខ្លួន ការគំរាមកំហែង និងការធ្វើទុក្ខបុកម្នេញជាច្រើនឆ្នាំ សហគមន៍មូលដ្ឋានជាច្រើន ដែលជាប់គាំងនៅក្នុងជម្លោះដីធ្លី បានជួបបញ្ហាប្រឈមកាន់តែខ្លាំងឡើងក្នុងការជួបជុំគ្នានៅទីសាធារណៈ និងតស៊ូមតិដើម្បីទទួលបានសិទ្ធិរបស់ពួកគាត់ ។ នៅឆ្នាំនេះ ប្រជាពលរដ្ឋប្រមាណជាង១០សហគមន៍ បានធ្វើយុទ្ធនាការតាមប្រព័ន្ធផ្សព្វផ្សាយសង្គម ដើម្បីអំពាវនាវឱ្យរាជរដ្ឋាភិបាល ជួយដោះស្រាយបញ្ហាជម្លោះដីធ្លី និងសិទ្ធិទទួលបានលំនៅឋានសមរម្យរបស់ពួកគាត់ ៕
- ចំណងជើង & មូលបទ
- សិទិ្ធបញ្ចេញមតិ និងចូលរួម សិទ្ធិដីធ្លី