ស្រ្តីម្នាក់ ត្រូវបានរងរបួស បន្ទាប់ពីទទួលរងអំពើហិង្សាពីសំណាក់កម្លាំងសន្តិសុខ អំឡុងពេលតវ៉ាដោយអហិង្សា
ចេញផ្សាយ ថ្ងៃទី៤ ខែកញ្ញា ឆ្នាំ២០២០
នាព្រឹកនេះ ស្ដ្រីម្នាក់ អាយុ៤៩ឆ្នាំ ត្រូវបានបញ្ជូនទៅមន្ទីរពេទ្យ បន្ទាប់ពីកម្លាំងសន្ដិសុខខណ្ឌបានចាប់បោកផ្ទប់ទៅនឹងថ្នល់ ខណៈដែលកំពុងអំពាវនាវដោយសន្ដិវិធី ឱ្យដោះលែងស្វាមីរបស់គាត់ដែលកំពុងជាប់ឃុំក្នុងពន្ធនាគារ ។
នៅព្រឹកថ្ងៃសុក្រនេះ អ្នកស្រី សេង ចាន់ថន ភរិយារបស់លោក ស៊ន់ ធន់ អតីតសមាជិកក្រុមប្រឹក្សាខេត្តកំពង់ធំ និងជាសមាជិកសមាគមគ្រូបង្រៀនកម្ពុជាឯករាជ្យ ត្រូវបានរាំងខ្ទប់ដោយកម្លាំងសន្ដិសុខខណ្ឌ៧មករា ពីការតវ៉ាជាសាធារណៈនៅខាងក្រៅសាលាដំបូងរាជធានីភ្នំពេញ រួមជាមួយក្រុមស្ដ្រីនិងសាច់ញាតិដទៃទៀតរបស់អតីតសមាជិកគណបក្សជំទាស់ដែលត្រូវបានរំលាយ ។ ខណៈដែលកម្លាំងសន្ដិសុខជាច្រើនប៉ះទង្គិចគ្នាជាមួយក្រុមស្រ្តី សន្តិសុខម្នាក់បានចាប់បោកអ្នកស្រី ចាន់ថន យ៉ាងហិង្សា ផ្ទប់ទៅនឹងថ្នល់ ។ អ្នកស្រី ត្រូវបានបញ្ជូនទៅព្យាបាលនៅមន្ទីរពេទ្យមិត្តភាពខ្មែរ-សូវៀត ។
ស្វាមីរបស់អ្នកស្រី ចាន់ថន ត្រូវបានឃុំខ្លួនក្នុងពន្ធនាគារ កាលពីដើមខែមិថុនា ដោយចោទប្រកាន់ពី បទរួមគំនិតក្បត់ បទញុះញង់ឱ្យប្រព្រឹត្តបទឧក្រិដ្ឋ ជាអាទិ៍ និងបទញុះញង់កុំឱ្យយោធិនស្ដាប់បង្គាប់ ។ ក្នុងនោះមានបទចោទខ្លះ ត្រូវបានចោទប្រកាន់ពាក់ព័ន្ធនឹងសកម្មភាព តាំងពីខែកក្កដា ឆ្នាំ២០១៨ ។
ចាប់តាំងពីដើមខែមិថុនា ឆ្នាំ២០២០ គ្រួសាររបស់អតីតសមាជិកគណបក្សជំទាស់ ត្រូវបានអូស ទាញ ទាត់ និងវាយដំ អំឡុងពេលដែលពួកគាត់តវ៉ាដោយសន្ដិវិធី ដើម្បីអំពាវនាវឱ្យដោះលែងសមាជិកគ្រួសារពួកគាត់វិញ ។ គិតមកទល់ពេលនេះ អតីតសមាជិកគណបក្សសង្គ្រោះជាតិដែលត្រូវបានរំលាយចំនួន២៣នាក់ហើយ ត្រូវបានចាប់ និងឃុំខ្លួនក្នុងពន្ធនាគារ ៕
MP3 format: ស្តាប់សំឡេងជាភាសាខ្មែរ
