តុលាការផ្ដន្ទាទោសមនុស្សយ៉ាងតិច ៥១នាក់ ក្នុងសំណុំរឿងដ៏ធំនៃគណបក្សសង្គ្រោះជាតិ
ចេញផ្សាយ ថ្ងៃទី១៤ ខែមិថុនា ឆ្នាំ២០២២
នាព្រឹកនេះ សាលាដំបូងរាជធានីភ្នំពេញ បានប្រកាសសាលក្រមផ្ដន្ទាទោសថ្នាក់ដឹកនាំ សមាជិក និងអ្នកគាំទ្រគណបក្សសង្គ្រោះជាតិដែលត្រូវបានរំលាយ យ៉ាងតិចចំនួន ៥១រូប ពីបទរួមគំនិតក្បត់ និងបទញុះញង់ តាមបញ្ញត្តិមាត្រា៤៥៣ មាត្រា៤៩៤ និងមាត្រា៤៩៥នៃក្រមព្រហ្មទណ្ឌ ។
ថ្នាក់ដឹកនាំអតីតគណបក្សសង្គ្រោះជាតិចំនួន ១២រូប ត្រូវបានកាត់ទោសដោយកំបាំងមុខ ឱ្យជាប់ពន្ធនាគារកំណត់រយៈពេល ៨ឆ្នាំ ។ សមាជិក និងអ្នកគាំទ្រចំនួន ១៩រូប ផ្សេងទៀត ត្រូវបានផ្ដន្ទាទោសឱ្យជាប់ពន្ធនាគាររយៈពេល ៦ឆ្នាំ ។ នាព្រឹកនេះ ក៏មានការចេញដីកាបង្គាប់ឱ្យចាប់ខ្លួនមនុស្សទាំង ៣១ នាក់ ផងដែរ ។
សកម្មជនចំនួន ២០នាក់ ផ្សេងទៀត ត្រូវបានកាត់ទោសឱ្យជាប់ពន្ធនាគារ៥ឆ្នាំ ប៉ុន្តែទោសទាំងអស់ត្រូវបានព្យួរ មានន័យថា អ្នកទាំងនោះនឹងមិនអនុវត្តទោសជាប់ពន្ធនាគារនោះទេ ។ ជនជាប់ចោទចំនួន ៩នាក់ ផ្សេងទៀត មិនត្រូវបានប្រកាសឈ្មោះក្នុងសាលក្រម នាព្រឹកនេះទេ ដូចនេះការសម្រេចសេចក្ដីទៅលើពួកគេគឺនៅមិនទាន់ច្បាស់លាស់នៅឡើយ ។ ពុំមានការទម្លាក់ចោលបទចោទនៅក្នុងការប្រកាសសាលក្រមនេះទេ ។ ជនជាប់ចោទម្នាក់ក្នុងចំណោម ៩នាក់ លោក យឹម ស៊ីណន ទើបបានប្រាប់សារព័ត៌មានក្នុងស្រុកថា បទចោទប្រឆាំងនឹងអ្នកទាំង៩ ត្រូវបានទម្លាក់ចោល ក្នុងខែមករា ឆ្នាំ២០២២ បន្ទាប់ពីពួកគេបានសរសេរលិខិតស្នើទៅសម្ដេចនាយករដ្ឋមន្ត្រី ។
កញ្ញា សេងច័ន្ទធារី ឬ សេង ធារី ដែលមានសញ្ជាតិខ្មែរ និងអាមេរិក គឺស្ថិតក្នុងចំណោមជនជាប់ចោទដែលត្រូវបានផ្ដន្ទាទោសដាក់ពន្ធនាគារ ៦ឆ្នាំ ។ កញ្ញា ត្រូវបានចាប់ខ្លួន នៅខាងមុខសាលាដំបូងរាជធានីភ្នំពេញ ជាកន្លែងដែលកញ្ញាឈរតវ៉ាប្រឆាំងនឹងបទចោទផ្សេងៗនាព្រឹកនេះ ដោយស្លៀកពាក់តំណាងឱ្យរូបសំណាកសេរីភាព បន្ទាប់ពីមានការប្រកាសសាលក្រម ។
ជនជាប់ចោទ៤នាក់ ផ្សេងទៀត បានជាប់ឃុំស្រាប់ទៅហើយ រួមមានលោក កាក់ កុម្ភា លោក ហេង ច័ន្ទសុទ្ធី លោក ទុំ ប៊ុនថន កំពុងស្ថិតក្រោមការឃុំខ្លួននៅមណ្ឌលអប់រំកែប្រែទី១ ខណៈដែលអ្នកស្រី យក់ នាង ស្ថិតក្រោមការឃុំខ្លួននៅពន្ធនាគាររាជធានីភ្នំពេញ (ប៉េហ្ស៊ី) ។ អ្នកទាំងនោះ ត្រូវបានផ្ដន្ទាទោសដាក់ពន្ធនាគារ ៦ឆ្នាំ ។ អ្នកស្រី យក់ នាង ត្រូវបានចាប់ខ្លួន ក្នុងខែមេសា ឆ្នាំ២០២២ បន្ទាប់ពីបានក្លាយជាមន្ត្រីគណបក្សភ្លើងទៀន ។
អ្នកជាប់ឃុំ៤នាក់នេះ គឺជនជាប់ចោទដែលមានវត្តមាននៅក្នុងបន្ទប់សវនាការនាព្រឹកនេះ ។ អ្នកស្រី ព្រុំ ចន្ថា ប្រពន្ធលោក កាក់ កុម្ភា គឺសមាជិកគ្រួសារអ្នកជាប់ឃុំតែម្នាក់គត់ ដែលបានចូលរួមស្ដាប់ការប្រកាសសាលក្រម នាថ្ងៃនេះ ដោយបានយំ និងព្យាយាមទៅជិតស្វាមីរបស់អ្នកស្រី ប៉ុន្តែមន្រ្តីសន្តិសុខបានរាំងខ្ទប់ជនជាប់ចោទពីអ្នកឃ្លាំមើលនៅក្នុងសវនាការ និងបាននាំជនជាប់ចោទចេញក្រៅបន្ទប់សវនាការ ។
អំឡុងពេលសវនាការ មេធាវីការពារក្ដី បានលើកឡើងម្ដងហើយម្ដងទៀតថា ជនជាប់ចោទជាច្រើន មិនត្រូវបានកោះហៅចូលសវនាការឱ្យបានត្រឹមត្រូវតាមនីតិវិធីនោះទេ ។ ជនជាប់ចោទភាគច្រើន ត្រូវបានកាត់ទោសដោយកំបាំងមុខ ។
រឿងក្ដីនេះ បានអូសបន្លាយពេល ចាប់ពីខែវិច្ឆិកា ឆ្នាំ២០២០ ដល់ខែមេសា ឆ្នាំ២០២២ ។ សវនាការទាំងនេះ ផ្ដោតសំខាន់ទៅលើថ្នាក់ដឹកនាំគណបក្សសង្គ្រោះជាតិ ជាពិសេសឯកឧត្ដម សម រង្ស៊ី ដែលជាប្រធានគណបក្ស ក្នុងការព្យាយាមធ្វើមាតុភូមិនិវត្តន៍ ត្រឡប់មកប្រទេសកម្ពុជាវិញ កាលពីខែវិច្ឆិកា ឆ្នាំ២០១៩ ក៏ដូចជាការបង្កើតចលនាគណបក្សសង្គ្រោះជាតិនៅក្រៅប្រទេស ។
រូបភាពថតស្រ្គីនជាច្រើនក្នុងការបង្ហោះសារនៅលើបណ្ដាញសង្គមហ្វេសប៊ុក ដែលបង្ហាញពីការគាំទ្រទៅលើអតីតគណបក្សជំទាស់ ឬគោលការណ៍លទ្ធិប្រជាធិបតេយ្យ គឺជាភស្ដុតាងភាគច្រើនត្រូវបានលើកយកមកបង្ហាញដើម្បីដាក់បន្ទុក ។ ពុំមានភាពស៊ីចង្វាក់គ្នារវាងភស្តុតាងដែលបានទទួលយក ជនជាប់ចោទម្នាក់ៗ និងធាតុផ្សំនៃបទល្មើសនីមួយៗទាំងនោះទេ ហើយចៅក្រមមិនបានផ្ដល់ការវិភាគវែកញែកនៅក្នុងសាលក្រមព្រឹកនេះទេ ។
សាលក្រមថ្ងៃនេះ ធ្វើឡើងក្រោយពីមានសវនាការដ៏ធំ ដែលចាប់ផ្ដើមក្នុងខែវិច្ឆិកា ឆ្នាំ២០២០ ទៅលើសកម្មជនអតីតគណបក្សសង្គ្រោះជាតិចំនួន ១៣៨នាក់ ។ ក្រោយមក សវនាការដ៏ធំនេះ ត្រូវបានបែងចែកជា ២ធំៗ ដោយមាន៤សំណុំរឿង ។ ការប្រកាសសាលក្រមនាថ្ងៃនេះ គឺពាក់ព័ន្ធនឹងជនជាប់ចោទចំនួន ៦០នាក់ នៅក្នុងសំណុំរឿងលេខ ១១៤០និងលេខ ៦០០៥ ខណៈដែលជនជាប់ចោទចំនួន ៧៨នាក់ ផ្សេងទៀត កំពុងរង់ចាំសវនាការនៅក្នុងសំណុំរឿងលេខ ៦៧២៥ និងលេខ ៧៨១៨ ។
អ្នកដែលត្រូវបានផ្ដន្ទាទោសដាក់ពន្ធនាគារ៨ឆ្នាំ មានដូចជា៖ ឯកឧត្ដម សម រង្ស៊ី ឯកឧត្ដម អេង ឆៃអ៊ាង លោកជំទាវ មូរ សុខហួរ ឯកឧត្ដម តុ វ៉ាន់ចាន់ ឯកឧត្ដម ហូរ វ៉ាន់ ឯកឧត្ដម អ៊ូ ច័ន្ទឫទ្ធិ ឯកឧត្ដម ឡុង រី ឯកឧត្ដម ម៉ែន សុថាវរិន្រ្ទ ឯកឧត្ដម អ៊ុំ សំអាន លោក មោញ សារ៉ាត់ លោក អ៊ីសា ឧស្មាន និងឯកឧត្ដម គង់ សភា ។
អ្នកដែលត្រូវបានផ្ដន្ទាទោសដាក់ពន្ធនាគារ៦ឆ្នាំ មានដូចជា៖ លោក កាក់ កុម្ភា លោក ហេង ច័ន្ទសុទ្ធី លោក ទុំ ប៊ុនថន អ្នកស្រី យក់ នាង លោក អូន ពៅ លោក នីវ ចំរើន អ្នកស្រី សេង ច័ន្ទធារី លោក ជា ជីវ ឯកឧត្ដម ឡុង ប៊ុត្តា ឯកឧត្ដម ហេង ដាណារ៉ូ លោក ឆាំ ឆៃយ៉ា លោក តោ និមល លោក ហេង ឡៃហួរ លោក ឃិន ជំរឿន លោក នាង សុឃុន លោក សួន ចំរើន លោក រិន រដ្ឋ លោក សេង ប៊ុនរ៉ុង និងលោក ឆេង សោភ័ណ ។
អ្នកដែលត្រូវបានផ្ដន្ទាទោសដាក់ពន្ធនាគារ៥ឆ្នាំ ប៉ុន្តែត្រូវបានព្យួរទោសទាំងស្រុង មានដូចជា៖ លោក លី រតនរស្មី លោក សុត វ៉ាន់ឌី លោក ព្រុំ រ័ត្ន លោក ភួង ថា លោក ឯក ចេស្ដា អ្នកស្រី ហង្ស សុផារី លោក នៅ វិចិត្រ លោក អ៊ូ គឹមហ៊ត លោក ហ៊ឹង ទាក់ លោក ស្រី ច័ន្ទតារា លោក ជា យ៉ាម៉ន ឯកឧត្ដម វ៉ាន ណារិទ្ធ លោក អ៊ិន ខុម លោក ឡេង សេងហុង លោក ឆាត វិជ្ជា លោក ហ៊ី សុខជា អ្នកស្រី ណី ល័ក្ខ កញ្ញា សៅ ឧសភា លោក ឃាន វិសេស និងកញ្ញា យូ ចាន់ធានី ។
សាលក្រមរបស់មនុស្ស៩នាក់ផ្សេងទៀត មិនទាន់មានភាពច្បាស់លាស់ មានដូចជា៖ លោក ទឹម វណ្ណី អ្នកស្រី រស់ សុផល លោក ឈុន ប៊ុនហ៊ា លោក សុខ រដ្ឋា លោក យង់ ស៊ីណេត អ្នកស្រី ព្រុំ សុខា លោក ថុង ហួច លោក មាស ពិសាល និងលោក យឹម ស៊ីណន ។ ក្រោយមក មានការរាយការណ៍ថា បទចោទប្រឆាំងនឹងអ្នកទាំង៩ ត្រូវបានទម្លាក់ចោល ក្នុងខែមករា ឆ្នាំ២០២២ ។
សាលក្រមថ្ងៃនេះ គឺជាសាលក្រមទី៣ហើយ ក្នុងសវនាការដ៏ធំរបស់សកម្មជនអតីតគណបក្សសង្គ្រោះជាតិ គិតចាប់តាំងពីឆ្នាំ២០២១មក ។ ថ្នាក់ដឹកនាំអតីតគណបក្សសង្គ្រោះជាតិចំនួន ៩នាក់ ត្រូវបានផ្ដន្ទាទោសពីបទឧបឃាតប្រឆាំងនឹងរដ្ឋ ក្នុងខែមីនា ឆ្នាំ២០២១ ខណៈដែលមនុស្សចំនួន ២១នាក់ផ្សេងទៀត រួមមានសកម្មជនគណបក្សសង្រ្គោះជាតិ និងមន្ត្រីរដ្ឋាភិបាលម្នាក់ ត្រូវបានផ្ដន្ទាទោសក្នុងខែមីនា ឆ្នាំ២០២២ ។
អត្ថបទនេះ ត្រូវបានធ្វើបច្ចុប្បន្នភាព នៅថ្ងៃទី១៦ ខែមិថុនា ឆ្នាំ២០២២ ដើម្បីបញ្ជាក់ពីការរាយការណ៍ថា បទចោទប្រឆាំងនឹងជនជាប់ចោទ៩នាក់ ដែលត្រូវបានទម្លាក់ចោល ក្នុងខែមករា ឆ្នាំ២០២២ ៕
MP3 format: ស្តាប់សំឡេងជាភាសាខ្មែរ
- ឯកសារទាក់ទង
