រាជរដ្ឋាភិបាល លុបចោលអាជ្ញាប័ណ្ណវីអូឌី ក្រោយពីមានការបញ្ជាពីសម្ដេចនាយករដ្ឋមន្ត្រី
ចេញផ្សាយ ថ្ងៃទី១៣ ខែកុម្ភៈ ឆ្នាំ២០២៣នាព្រឹកនេះ រាជរដ្ឋាភិបាល បានសម្រេចដកហូតអាជ្ញាប័ណ្ណផ្សាយព័ត៌មានរបស់មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយព័ត៌មានឯករាជ្យ (CCIM) ជាស្ថាប័នគ្រប់គ្រងទៅលើសារព័ត៌មានដែលផ្សាយជាពីរភាសាគឺ វីអូឌី (VOD) ដែលជាសារព័ត៌មានឯករាជ្យចុងក្រោយមួយដែលនៅសេសសល់ ។
ក្រសួងព័ត៌មាន បានដកហូតអាជ្ញាប័ណ្ណវីអូឌី ក្រោយពីសម្ដេចនាយករដ្ឋមន្ត្រី ហ៊ុន សែន និងកូនប្រុសរបស់សម្ដេច ដែលជាមេបញ្ជាការកងទ័ពជើងគោក បានចោទជាបញ្ហាចំពោះអត្ថបទរបស់វីអូឌីដែលបានចេញផ្សាយកាលពីថ្ងៃទី០៩ ខែកុម្ភៈ ដោយបង្ហាញពីប្រតិកម្មមួយចំនួន ពីមនុស្សផ្សេងៗគ្នា ។ នេះរួមមាន ការអត្ថាធិប្បាយរបស់អ្នកនាំពាក្យរាជរដ្ឋាភិបាល ឯកឧត្តម ផៃ ស៊ីផាន ផងដែរ ពាក់ព័ន្ធនឹងការអះអាងថា ឯកឧត្ដម ហ៊ុន ម៉ាណែត បានចុះហត្ថលេខាលើកិច្ចព្រមព្រៀងមួយ ដើម្បីផ្ដល់ជំនួយហិរញ្ញវត្ថុ ទៅកាន់ប្រទេសតួគី ។ ទាំងឯកឧត្ដម ហ៊ុន ម៉ាណែត និងសម្ដេចនាយករដ្ឋមន្ត្រី ក្រោយមកបានបង្ហោះនៅលើបណ្ដាញសង្គម ដើម្បីបដិសេធទៅលើរឿងដែលថា ឯកឧត្ដម ហ៊ុន ម៉ាណែត បានចុះហត្ថលេខាលើឯកសារនោះ ។
នៅថ្ងៃទី១១ ខែកុម្ភៈ សម្ដេច ហ៊ុន សែន បានសរសេរនៅលើទំព័រហ្វេសប៊ុករបស់សម្ដេចថា វីអូឌី មានពេល ៧២ម៉ោង ដើម្បីសុំទោស រាជរដ្ឋាភិបាល និងឯកឧត្ដម ហ៊ុន ម៉ាណែត ពុំនោះទេ សម្ដេចនឹងបញ្ជាឱ្យក្រសួងព័ត៌មាន លុបចោលអាជ្ញាប័ណ្ណផ្សាយព័ត៌មានរបស់វីអូឌី ។ ក្រោយមក សម្ដេចបានកំណត់ឱសានវាទត្រឹមម៉ោង១០ព្រឹក ថ្ងៃទី១៣ ខែកុម្ភៈនេះ ។ មាត្រា១០នៃច្បាប់ស្ដីពីរបបសារព័ត៌មាន បញ្ជាក់ពីសិទ្ធិរបស់បុគ្គលសាធារណៈ ដែលជឿជាក់ថា សារព័ត៌មានបានផ្សព្វផ្សាយព័ត៌មានមិនត្រឹមត្រូវ ក្នុងគោលបំណងបំផ្លាញបុគ្គលសាធារណៈនោះ ដើម្បីទាមទារការកែតម្រូវ និងប្ដឹងទៅតុលាការបាន ដើម្បីទាមទារឱ្យមានការកែតម្រូវ ការបង់សំណងជំងឺចិត្ត ឬទាំងការកែតម្រូវផង និងការបង់សំណងជំងឺចិត្តផង ។
តាមរយៈកិច្ចប្រជុំមួយជាមួយមន្ត្រីក្រសួងព័ត៌មាននៅថ្ងៃទី១២ ខែកុម្ភៈ មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយព័ត៌មានឯករាជ្យ បានចេញលិខិតមួយជូនសម្ដេច ហ៊ុន សែន ដោយបង្ហាញពី “ការសោកស្ដាយ” និងការស្នើសុំ “ការអធ្យាស្រ័យ” សម្រាប់កំហុសអចេតនា” ។ វីអូឌី ខ្មែរ ក៏បានចេញផ្សាយអត្ថបទមួយនៅល្ងាចនោះ ដែលបង្ហាញពីការបដិសេធរបស់សម្ដេច ហ៊ុន សែន និង ឯកឧត្ដម ហ៊ុន ម៉ាណែត ។
សម្ដេច ហ៊ុន សែន បានបដិសេធការសុំទោសនេះ នៅលើការបង្ហោះហ្វេសប៊ុកមួយ ដោយលើកឡើងថា សម្ដេចមិនអាចទទួលយកពាក្យថា “សោកស្ដាយ” និង “កាសុំអធ្យាស្រ័យ” ជំនួសឱ្យពាក្យថា “សុំទោស” បានទេ ព្រមទាំងបានបង្គាប់ឱ្យក្រសួងព័ត៌មាន ដកហូតអាជ្ញាប័ណ្ណរបស់វីអូឌី ផងដែរ ។ មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយព័ត៌មានឯករាជ្យ បានចេញលិខិតសុំទោសមួយផ្សេងទៀត ។ ជាថ្មីម្ដងទៀត សម្ដេច ហ៊ុន សែន បានបដិសេធ ការសុំទោសនោះនៅលើហ្វេសប៊ុក នៅព្រឹកថ្ងៃទី១៣ ខែកុម្ភៈ នេះ ។ ក្រុមហ៊ុនផ្គត់ផ្គង់សេវាអ៊ីនធឺណិតមួយចំនួន បានរាំងខ្ទប់ (Block) ការចូលទៅកាន់គេហទំព័ររបស់វីអូឌី គិតត្រឹមព្រឹកនេះ ។
វីអូឌី បានក្លាយជាសារព័ត៌មានឯករាជ្យដ៏សំខាន់មួយនៅក្នុងប្រទេសកម្ពុជា នៅរយៈពេលប៉ុន្មានឆ្នាំចុងក្រោយនេះ ដោយចេញផ្សាយជាភាសាខ្មែរផង និងភាសាអង់គ្លេសផង ។ អ្នកសារព័ត៌មានវីអូឌី បានសរសេររឿងរ៉ាវជាង ៦០ ក្នុងរយៈពេលជាងមួយឆ្នាំ ដោយបានចងក្រង ការរីកសាយនៃអគារទាសករ ដែលមនុស្សត្រូវបានជួញដូរ ត្រូវបានបង្ខំឱ្យធ្វើឧក្រិដ្ឋកម្មលើអ៊ីនធឺណិត ។ ក្នុងខែសីហា ឆ្នាំមុន អ្នកសារព័ត៌មានវីអូឌី៥នាក់ ត្រូវបានឃាត់ខ្លួន ហើយម្នាក់ត្រូវបានឃាត់ដោយអង្គភាពកងអង្គរក្សរបស់សម្ដេចនាយករដ្ឋមន្ត្រី ខណៈពេលដែលកំពុងរាយការណ៍ពីការបំផ្លិចបំផ្លាញព្រៃឈើនៅភ្នំតាម៉ៅ កាលពីពេលថ្មីៗនេះ ។ សារព័ត៌មាននេះ ក៏បានចេញផ្សាយនូវ រឿងរ៉ាវជាច្រើន នៅទូទាំងប្រទេស ដោយបានចងក្រងពីការរឹតត្បិតលំហរនយោបាយ មុនពេលឆ្ពោះទៅរកការបោះឆ្នោតជ្រើសរើសក្រុមប្រឹក្សាឃុំសង្កាត់ឆ្នាំ២០២២ ។
ការបិទសារព័ត៌មានឯករាជ្យមួយ គឺស្រដៀងគ្នាទៅនឹងការបង្រ្កាបទៅលើអ្នកសារព័ត៌មាន មុនការបោះឆ្នោតជាតិឆ្នាំ២០១៨ ។ នៅចុងឆ្នាំ២០១៧ កាសែត ខេមបូឌា ដេលី ត្រូវបានបិទជុំវិញការចោទប្រកាន់ពីការជាប់ជំពាក់ការបង់ពន្ធ ហើយក្នុងឆ្នាំ២០១៨ កាសែតភ្នំពេញប៉ុស្ដិ៍ ត្រូវបានលក់ឱ្យទៅក្រុមហ៊ុនមួយ ដែលមានទំនាក់ទំនងជិតស្និទ្ធជាមួយរាជរដ្ឋាភិបាល ខណៈដែលកំពុងប្រឈមនឹងសម្ពាធ ក្រោយពីមានការចោទប្រកាន់ពីការជាប់ជំពាក់ពន្ធស្រដៀងគ្នា ។ រាជរដ្ឋាភិបាល ក៏បានបិទហ្វ្រេកង់ស៍ ផ្សាយរបស់វិទ្យុជាច្រើន ដែលផ្សាយព័ត៌មានបន្តពីវិទ្យុអាស៊ីសេរី វិទ្យុសំឡេងសហរដ្ឋអាមេរិក និងវិទ្យុវីអូឌី ៕
MP3 format: ស្តាប់សំឡេងជាភាសាខ្មែរ