មនុស្ស១៣នាក់ត្រូវបានផ្ដន្ទាទោស ក្នុងនោះ៤នាក់ ត្រូវបានបញ្ជូនទៅពន្ធនាគារក្នុងសំណុំរឿងក្លែងឯកសារ
ចេញផ្សាយ ថ្ងៃទី២៤ ខែមីនា ឆ្នាំ២០២៣
នារសៀលនេះ សាលាដំបូងរាជធានីភ្នំពេញ បានសម្រេចផ្ដន្ទាទោសលោក សៀម ភ្លុក សហស្ថាបនិកនៃគណបក្សបេះដូងជាតិខ្មែរ និងមនុស្ស១២ទៀត ពីបទក្លែងបន្លំ និងបទប្រើប្រាស់ឯកសារក្លែង តាមបញ្ញត្តិមាត្រា៦២៦ មាត្រា៦២៧ មាត្រា៦២៨ នៃក្រមព្រហ្មទណ្ឌ ។ លើសពីនេះ លោក សៀម ភ្លុក ដែលត្រូវបានឃុំខ្លួនតាំងពីខែមេសា ឆ្នាំ២០២២ ក៏ដូចជាជនជាប់ចោទ៣នាក់ទៀត ត្រូវបានចាប់ខ្លួនតែប៉ុន្មានម៉ោងប៉ុណ្ណោះ នៅមុនពេលប្រកាសសាលក្រម ដោយមិនដឹងមូលហេតុ ។
តុលាការ បានកាត់ទោសលោក សៀម ភ្លុក ឱ្យជាប់ពន្ធនាគារ ២ឆ្នាំ ៦ខែ និងពិន័យជាប្រាក់ចំនួន ៥លានរៀល (ប្រមាណ ១.២៥០ដុល្លារ) ខណៈដែលជនជាប់ចោទ១២នាក់ទៀត ត្រូវបានកាត់ទោសឱ្យជាប់ពន្ធនាគារ ២ឆ្នាំ ព្រមទាំងពិន័យជាប្រាក់ដូចៗគ្នាផងដែរ ។ ពុំមានការចេញដីកាចាប់ខ្លួនពួកគេទេ ហើយតុលារការ ក៏មិនបានបញ្ជាក់ហេតុផលចំពោះសាលក្រមនេះដែរ ។
ជនជាប់ចោទទាំង៣នាក់ ដែលត្រូវបានចាប់ខ្លួនមុនពេលចេញសាលក្រម នាព្រឹកនេះ បច្ចុប្បន្នគឺជាសមាជិកគណបក្សភ្លើងទៀន ។ នេះរួមមានលោក តូច ថឹង អាយុ ៧៤ឆ្នាំ ដែលជាប្រធានប្រតិបត្តិខេត្តកំពង់ចាមនៃគណបក្សភ្លើងទៀន និងលោក ខឿន វីរ៉ាត់ អាយុ ៣៣ឆ្នាំ ដែលជាក្រុមប្រឹក្សាជាប់ឆ្នោតនៅសង្កាត់បឹងទំពុនទី២ ក្នុងរាជធានីភ្នំពេញ ឆ្នាំ២០២២ និងអ្នកស្រី នូ សិទ្ធារី អាយុ៦៣ឆ្នាំ ដែលជាក្រុមប្រឹក្សាជាប់ឆ្នោត សង្កាត់ស្ទឹងមានជ័យទី១ ក្នុងរាជធានីភ្នំពេញ ក្នុងឆ្នាំ២០២២ ។
ហេតុផលនៃការចាប់ខ្លួនអ្នកទាំងនេះ ពុំត្រូវបានបកស្រាយភ្លាមៗនោះទេ ។ ជនជាប់ចោទផ្សេងទៀត ដែលត្រូវបានផ្ដន្ទាទោស រួមមាន លោក ជា សុភក្តិ លោក ឈឹម សាវ៉ាត លោក ឈង ហ៊ លោក ឡុង ហួន លោក ផាប់ ឃុន លោក ភ្លី ឈុនហុង លោក ភ្លី ម៉េងហុង លោក រ៉េត ចាន់រតនា និងលោក ស៊ាន ភាព ។
កាលពីថ្ងៃទី១៦ ខែវិច្ឆិកា ឆ្នាំ២០២១ ក្រសួងមហាផ្ទៃ បានបដិសេធពាក្យស្នើសុំចុះបញ្ជីរបស់គណបក្សបេះដូងជាតិខ្មែរ ក្នុងការធ្វើជាគណបក្សនយោបាយ ដោយឈរលើមូលដ្ឋានថា គណបក្សនេះ បានក្លែងបន្លំឯកសារស្នាមមេដៃមួយចំនួនតូចនៃអ្នកគាំទ្រជាង ៤.៧០០នាក់ ដែលបានដាក់ជូនទៅក្រសួងដើម្បីបំពេញលក្ខខណ្ឌនៃស្នាមមេដៃអប្បបរមាចំនួន ៤.០០០នាក់ ។ ក្រសួងបានអះអាងថា ក្នុងនោះមានស្នាមមេដៃជាង២០០ ដែលដូចគ្នា មិនស្គាល់អត្តសញ្ញាណ ឬខុសគ្នាជាមួយនឹងឯកសារអត្តសញ្ញាណកម្ម ។ លោក សៀម ភ្លុក បានប្ដឹងជំទាស់នឹងសេចក្ដីសម្រេចរបស់ក្រសួងមហាផ្ទៃ ដែលត្រូវបានតម្កល់ដោយតុលាការកំពូល កាលពីថ្ងៃទី២៤ ខែធ្នូ ឆ្នាំ២០២១ ៕
MP3 format: ស្តាប់សំឡេងជាភាសាខ្មែរ
- ចំណងជើង & មូលបទ
- តុលាការ និងនីតិរដ្ឋ សិទិ្ធបញ្ចេញមតិ និងចូលរួម បញ្ហាពន្ធនាគារ
