សហគមន៍ដីធ្លីនៅខេត្តបន្ទាយមានជ័យតវ៉ា សូមឱ្យដោះលែងតំណាងសហគមន៍របស់ពួកគាត់
ចេញផ្សាយ ថ្ងៃទី២៧ ខែមីនា ឆ្នាំ២០១៨
នាព្រឹកនេះ ប្រជាពលរដ្ឋប្រហែលជា៥០នាក់ ដែលរងគ្រោះដោយការរំលោភយកដីធ្លី បាននាំគ្នាឡើងមកតវ៉ា នៅមុខសាលាដំបូងខេត្តបន្ទាយមានជ័យ ដើម្បីទាមទារឱ្យមានការដោះលែងតំណាងរបស់ពួកគាត់ គឺអ្នកស្រី ឡុង សុគន្ធី ដែលត្រូវបានចាប់ខ្លួន កាលពីម្សិលមិញ ។
អ្នកស្រី ឡុង សុគន្ធី ត្រូវបានចាប់ខ្លួន និងបញ្ជូនទៅឃុំខ្លួននៅពន្ធនាគារខេត្តបន្ទាយមានជ័យ នៅពេលដែលអាជ្ញាធរអនុវត្តសាលក្រមចុះថ្ងៃទី១៥ ខែមីនា ឆ្នាំ២០១៨ ដែលបានសម្រេចផ្ដន្ទាទោសអ្នកស្រី ពី “បទប៉ះពាល់កម្មសិទ្ធិឯកជន” និង “បទធ្វើឱ្យខូចខាតដោយចេតនា” ។
អ្នកស្រីគឺជាតំណាងប្រជាពលរដ្ឋចំនួន ៣១០គ្រួសារ ដែលមានជម្លោះដីធ្លីជាមួយលោកឧកញ៉ា សំ ផាន់ណារិទ្ធិ តាំងពីឆ្នាំ២០០៤ លើផ្ទៃដី២០៧៦ ហិចតា ស្ថិតនៅចំណុច អូរលុងខុប អូរបុង ភូមិថ្នល់បត់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។
ប្រជាពលរដ្ឋទាំងនោះធ្លាប់បានដាក់ពាក្យបណ្ដឹងទៅអាជ្ញាធរថ្នាក់ខេត្ត និងថ្នាក់ជាតិ ដើម្បីស្នើរសុំអន្តរាគមន៍និងដោះស្រាយលើករណីនេះ ប៉ុន្តែរហូតមកទល់ពេលនេះ ប្រជាពលរដ្ឋទាំងនោះ មិនទាន់ទទួលបានដំណោះស្រាយប្រកបដោយប្រសិទ្ធិភាពណាមួយនៅឡើយទេ។
អ្នកតវ៉ាទាំងនោះបានអះអាងថាពួកគាត់នឹងមិនចាកចេញពីមុខតុលាការទេ ប្រសិនបើមិនមានការដោះលែងអ្នកស្រី ឡុង សុគន្ធី មកវិញនោះ។
- ចំណងជើង & មូលបទ
- តុលាការ និងនីតិរដ្ឋ សិទ្ធិដីធ្លី
