អ្នកតវ៉ារឿងជម្លោះដីធ្លីធ្វើដំណើរដោយថ្មើរជើងមកភ្នំពេញ បន្ទាប់ពីមានការរារាំងពីសំណាក់អាជ្ញាធរ
ចេញផ្សាយ ថ្ងៃទី៤ ខែមិថុនា ឆ្នាំ២០១៨អាជ្ញាធរបានព្យាយាមរារាំងប្រជាពលរដ្ឋប្រមាណជាង៣០០នាក់ ដែលកំពុងធ្វើដំណើរពីខេត្តកោះកុងមករាជធានីភ្នំពេញ ដើម្បីទាមទារសំណងពីការបាត់បង់ដីធ្លីជាច្រើនឆ្នាំមកហើយនោះ។ នគរបាលជាច្រើននាក់ ដែលដឹកនាំដោយ អភិបាលរងស្រុក បានហាមឃាត់អ្នកទាំងនោះមិនឱ្យឡើងរថយន្តក្នុងស្រុកស្រែអំបិល នៅព្រឹកព្រលឹមឈានចូលថ្ងៃច័ន្ទ។
ដោយសារហេតុនេះហើយទើបសហគមន៍ទាំងនោះ បានប្ដេជ្ញាចិត្តដើរដោយថ្មើរជើងមកកាន់រាជធានីភ្នំពេញ ដែលមានចម្ងាយជាង១៥០គីឡូម៉ែត្រ។ នៅតាមផ្លូវធ្វើដំណើរ ពួកគាត់ត្រូវបានអាជ្ញាធររារាំងជាច្រើនលើកច្រើនសារ ដើម្បីបង្ខំឱ្យពួកគាត់ត្រឡប់ទៅផ្ទះវិញ។
អស់រយៈពេលច្រើនឆ្នាំមកហើយ ប្រជាពលរដ្ឋដែលមកពី ឃុំជីខលើ ឃុំជីខក្រោម ឃុំដងពែង និងឃុំកណ្ដោល ទាំងនេះ បានដាក់ញាត្តិជូនទៅអាជ្ញាធរខេត្តនិងក្រសួងពាក់ព័ន្ធ ដើម្បីស្វែងរកដំណោះស្រាយ និងសំណងសមរម្យ ដោយសារការបាត់បង់ដីធ្លី ជុំវិញការផ្ដល់ដីសម្បទានសេដ្ឋកិច្ចចំនួនពីរ ពាក់ព័ន្ធនឹងក្រុមហ៊ុនស្ករអំពៅថៃ KSL ក៏ដូចជាសមាជិកព្រឹទ្ធសភានៃគណបក្សកាន់អំណាចគឺ លោកឧកញ៉ា លី យ៉ុងផាត់។
ប្រជាពលរដ្ឋមួយចំនួននៃសហគមន៍ទាំងនេះ បានទទួលសំណង កាលពីថ្ងៃទី២២ ខែមីនា ឆ្នាំ២០១៨ កន្លងទៅថ្មីៗនេះ ប៉ុន្តែនៅមានប្រជាពលរដ្ឋជាច្រើនគ្រួសារទៀតដែលពុំទាន់ទទួលបានសំណងសមរម្យ។
កាលពីខែមុន ប្រជាពលរដ្ឋទាំងនេះក៏ត្រូវបានប្រឈមនឹងបញ្ហាបិទផ្លូវនេះដែរ ហើយត្រូវបានប៉ះទង្គិចគ្នា និងរុញច្រានពីសំណាក់កងសន្តិសុខនៅភ្នំពេញ ខណៈពេលដែលពួកគាត់ព្យាយាមដើរហែរក្បួនចេញពីវត្ត (ជាកន្លែងដែលពួកគាត់បានស្នាក់នៅមួយយប់) ដើម្បីឆ្ពោះទៅក្រសួងរៀបចំដែនដី នគររូបនីយកម្ម និងសំណង់។ ពេលនោះ អ្នកតវ៉ាមួយចំនួន កំពុងពរកូនតូចនៅជាប់នឹងខ្លួន អំឡុងពេលប៉ះទង្គិចគ្នា។
- ឯកសារទាក់ទង
- ចំណងជើង & មូលបទ
- សិទិ្ធបញ្ចេញមតិ និងចូលរួម សិទ្ធិដីធ្លី