សកម្មជនបរិស្ថានបីនាក់ ត្រូវបានឃុំខ្លួនក្នុងពន្ធនាគារ ខណៈសកម្មជនពីរអង្គ/នាក់ផ្សេងទៀត ត្រូវបានចាប់ខ្លួន ទាក់ទិននឹងការតវ៉ាដោយសន្តិវិធី
ចេញផ្សាយ ថ្ងៃទី៦ ខែកញ្ញា ឆ្នាំ២០២០នៅថ្ងៃអាទិត្យនេះ អាជ្ញាធរបានចោទប្រកាន់យុវជនជាសកម្មជនបរិស្ថានចំនួន៣នាក់ពី “ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម” និងបង្គាប់ឱ្យបញ្ជូនអ្នកទាំងបីទៅឃុំខ្លួនបណ្ដោះអាសន្នរង់ចាំសវនាការ ពាក់ព័ន្ធនឹងសកម្មភាពអហិង្សារបស់អ្នកទាំងបី ក្នុងការអំពាវនាវឱ្យរាជរដ្ឋាភិបាលយកចិត្តទុកដាក់អំពីការលុបបឹងតាមោក នៅភាគខាងជើងនៃរាជធានីភ្នំពេញ ។
សកម្មជនបរិស្ថានទាំងបីនាក់រួមមាន លោក ថុន រដ្ឋា អាយុ ២៨ឆ្នាំ កញ្ញា ឡុង គន្ធា អាយុ ២២ឆ្នាំ និងកញ្ញា ភួន កែវរស្មី អាយុ ១៩ឆ្នាំ គឺជាសមាជិកចលនាមាតាធម្មជាតិកម្ពុជា ។ នៅថ្ងៃអាទិត្យនេះ អ្នកទាំងបី ត្រូវបានចោទប្រកាន់ជុំវិញការរៀបចំដង្ហែក្បួនបែបអហិង្សា ដោយកញ្ញា ឡុង គន្ធា ពីវត្តភ្នំ ឆ្ពោះទៅកាន់គេហដ្ឋានសម្ដេចនាយករដ្ឋមន្រ្តី ដើម្បីបង្ហាញពីកង្វល់របស់នាង ទាក់ទិននឹងការលុបបឹង និងការសាងសង់ នៅលើផ្ទៃបឹងតាមោក ។
អ្នកទាំងបី ត្រូវបានចាប់ខ្លួនកាលពីថ្ងៃសុក្រ និងសាកសួរដោយព្រះរាជាអាជ្ញានិងចៅក្រមស៊ើបសួរ នៅសាលាដំបូងរាជធានីភ្នំពេញ នៅថ្ងៃចុងសប្ដាហ៍នេះ ។ នៅថ្ងៃអាទិត្យនេះ អ្នកទាំងបីត្រូវបានចោទប្រកាន់ពី “ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម” តាមបញ្ញត្តិមាត្រា៤៩៤ និងមាត្រា៤៩៥នៃក្រមព្រហ្មទណ្ឌ ដែលមានចែងពីការផ្ដន្ទាទោសដាក់ពន្ធនាគារចន្លោះពី៦ខែ រហូតដល់ ២ឆ្នាំ និងពិន័យជាប្រាក់រហូតដល់ ៤លានរៀល ។ លោក រដ្ឋា ត្រូវបានបញ្ជូនទៅឃុំខ្លួននៅមណ្ឌលអប់រំកែប្រែទី១ ខណៈដែលកញ្ញា គន្ធា និងកញ្ញា កែវរស្មី ត្រូវបានបញ្ជូនទៅឃុំខ្លួននៅមណ្ឌលអប់រំកែប្រែទី២ ។
ករណីដាច់ដោយឡែកមួយទៀត នៅថ្ងៃអាទិត្យនេះ អាជ្ញាធរបានចាប់ខ្លួនសមាជិកពីរនាក់នៃចលនាយុវជន ”ប្រជាពលរដ្ឋសកម្មដើម្បីយុត្តិធម៌” ដែលគ្រោងនឹងរៀបចំការជួបជុំនៅទីលានប្រជាធិបតេយ្យ នៅសប្ដាហ៍ក្រោយនេះ ដើម្បីអំពាវនាវឱ្យដោះលែង លោក រ៉ុង ឈុន អតីតប្រធានសហជីពដែលកំពុងជាប់ឃុំក្នុងពន្ធនាគារ ។
ព្រះតេជព្រះគុណ កើត សារ៉ាយ សមាជិកខ្មែរថាវរៈ និងលោក មាន ព្រហ្មមុនី អនុប្រធានសមាគមនិស្សិតខ្មែរបញ្ញាវ័ន្ត ត្រូវបានចាប់ខ្លួន នៅរាជធានីភ្នំពេញ ពាក់ព័ន្ធនឹងផែនការជួបជុំគ្នានៅទីលានប្រជាធិបតេយ្យក្នុងរាជធានីភ្នំពេញ និងការអំពាវនាវឱ្យដោះលែង លោក រ៉ុង ឈុន ប្រធានសហជីព ។ លោក រ៉ុង ឈុន ត្រូវបានចាប់ខ្លួន កាលពីចុងខែកក្កដា និងចោទប្រកាន់ពីបទញុះញង់ ជុំវិញការអត្ថាធិប្បាយរបស់លោកនៅក្នុងកម្មវិធីផ្សាយរបស់វិទ្យុមួយអំពីបញ្ហាព្រំដែនកម្ពុជា-វៀតណាម ។
សាលារាជធានីភ្នំពេញ ធ្លាប់បានចេញសេចក្ដីប្រកាសព័ត៌មានក្នុងការហាមឃាត់ការជួបជុំគ្នានេះ ដោយលើកហេតុផលថា អ្នករៀបចំមិនអាចគ្រប់គ្រងចំនួនអ្នកចូលរួមបាន និងចោទប្រកាន់អ្នកទាំងនោះថា “ញុះញង់” ឱ្យសាធារណជនចូលរួមការតវ៉ា ។ ចលនា “ប្រជាពលរដ្ឋសកម្មដើម្បីយុត្តិធម៌” បានប្រកាសនៅថ្ងៃសៅរ៍ម្សិលមិញថា អ្នករៀបចំនឹងនៅតែធ្វើការជួបជុំគ្នាតាមការគ្រោងទុក ដែលត្រូវចាប់ផ្ដើមពីថ្ងៃទី០៧ ដល់ថ្ងៃទី១៥ ខែកញ្ញា ឆ្នាំ២០២០នេះ ។
រាប់បញ្ចូលទាំងការចាប់ខ្លួនព្រះអង្គ កើត សារ៉ាយ និងលោក មាន ព្រហ្មមុនី មនុស្សចំនួន៨អង្គ/នាក់ហើយ ត្រូវបានចាប់ខ្លួន/ព្រះកាយ ដោយសារការរៀបចំ ឬចូលរួមក្នុងការតវ៉ាដោយសន្ដិវិធី ដើម្បីអំពាវនាវឱ្យដោះលែង លោក រ៉ុង ឈុន ។ ក្រុមសង្គមស៊ីវិលប្រមាណ១៤២ស្ថាប័ន បានអំពាវនាវតុលាការ និងរាជរដ្ឋាភិបាលដោះលែង លោក រ៉ុង ឈុន ទម្លាក់ចោលការចោទប្រកាន់ទាំងអស់ប្រឆាំងនឹងលោកវិញ ៕