គ្រួសាររបស់អ្នកការពារសិទ្ធិមនុស្សដែលកំពុងជាប់ពន្ធនាគារ អំពាវនាវរកយុត្តិធម៌ អំឡុងពេលប្រារព្ធទិវាសិទ្ធិមនុស្សតាមបណ្ដាញទំនាក់ទំនងសង្គម
ចេញផ្សាយ ថ្ងៃទី១០ ខែធ្នូ ឆ្នាំ២០២០
នាថ្ងៃនេះ សមាជិកគ្រួសាររបស់អ្នកការពារសិទ្ធិមនុស្សដែលកំពុងត្រូវបានឃុំខ្លួនក្នុងពន្ធនាគារយ៉ាងតិច៥នាក់ បានអំពាវនាវឱ្យមានការដោះលែងមនុស្សជាទីស្រឡាញ់របស់ពួកគាត់ឱ្យមានសេរីភាពវិញ ខណៈដែលសហគមន៍នៅទូទាំងប្រទេស បានបង្ខំចិត្តប្រារព្ធទិវាសិទ្ធិមនុស្សអន្តរជាតិតាមប្រព័ន្ធផ្សព្វផ្សាយសង្គម ។ ដោយសារអាជ្ញាធរមូលដ្ឋានជាច្រើនបានបដិសេធមិនឱ្យសហគមន៍មូលដ្ឋានជួបជុំគ្នា ដោយលើកហេតុផលពីហានិភ័យនៃឆ្លងវីរុសកូវីដ១៩ សហគមន៍មូលដ្ឋានជាង ២០ បានប្រារព្ធទិវាសិទ្ធិមនុស្សខួបលើកទី៧២ នៃការបង្កើតឱ្យមានសេចក្ដីប្រកាសជាសកលស្ដីពីសិទ្ធិមនុស្ស នៅលើប្រព័ន្ធផ្សព្វផ្សាយសង្គមវិញ ដោយបានអំពាវនាវឱ្យមានការគោរពសិទ្ធិសេរីភាពជាមូលដ្ឋានរបស់ពួកគាត់ ។
នេះជាលើកទីមួយហើយក្នុងរយៈពេល២៧ឆ្នាំ ដែលប្រជាពលរដ្ឋកម្ពុជាមិនអាចប្រារព្ធទិវាសិទ្ធិមនុស្សជាថ្ងៃឈប់សម្រាក បន្ទាប់ពីរាជរដ្ឋាភិបាលបានលុបចោលថ្ងៃប្រារព្ធទិវាមួយនេះចេញពីថ្ងៃឈប់សម្រាកប្រចាំឆ្នាំ កាលពីឆ្នាំមុន ។ ទោះបីជាបែបនេះក្ដី ក៏សហគមន៍ជាច្រើននៅទូទាំងប្រទេសបានរៀបចំព្រឹត្តិការណ៍នេះដោយមានការចូលរួមពីកសិករ កម្មករ-កម្មការិនី និងសហគមន៍ជាច្រើន ដើម្បីសម្ដែងមតិអំពីការរំលោភយកដីធ្លី សិទ្ធិរបស់កម្មករ-កម្មការិនី និងការបន្តកើតមាននៃការរំលោភសិទ្ធិមនុស្សដែលសហគមន៍របស់ពួកគាត់កំពុងជួបប្រឈម ។ ដោយហេតុថា ប្រទេសកម្ពុជាបានរកឃើញករណីដំបូងនៃការឆ្លងជាសហគមន៍នៃវីរុសកូវីដ១៩នៅរយៈពេលពីរសប្ដាហ៍ចុងក្រោយមុនពេលប្រារព្ធទិវានេះ ក្រុមប្រជាពលរដ្ឋជាច្រើនបាននាំគ្នាប្រារព្ធទិវានេះតាមប្រព័ន្ធផ្សព្វផ្សាយសង្គមវិញ ដោយបានលើកឡើងថា យុទ្ធនាការនេះនឹងបន្តធ្វើឡើងរហូតដល់ថ្ងៃទី២៥ ខែធ្នូ ឆ្នាំ២០២០។ មនុស្សមួយក្រុមនៅសហគមន៍មួយក្នុងខេត្តកោះកុងដែលបានចាប់ផ្ដើមប្រារព្ធទិវានេះនៅលើបណ្ដាញទំនាក់ទំនងសង្គមដោយមានការថតរូបនិងវីដេអូខ្លួនឯងជាមួយនឹងផ្ទាំងបដាមួយ ត្រូវបានឃ្លាំមើលដោយនគរបាលមូលដ្ឋានជាច្រើន ។
នារសៀលនេះ គ្រួសារនិងប្ដីឬប្រពន្ធរបស់សកម្មជនវ័យក្មេងដែលកំពុងជាប់ឃុំក្នុងពន្ធនាគារចំនួនយ៉ាងតិច៥នាក់ដោយសារការបង្ក្រាបលើបាតុករអហិង្សាកាលពីឆ្នាំមុន បានសំណូមពរយ៉ាងទទូចឱ្យរាជរដ្ឋាភិបាលដោះលែងអ្នកទាំងនោះវិញ ។ សាច់ញាតិរបស់ក្រុមយុវជនខ្មែរថាវរៈ គឺលោក ហ៊ុន វណ្ណៈ អ្នកស្រី ឈឿន ដារ៉ាវី និងកញ្ញា អេង ម៉ាឡៃ ក៏ដូចជាសកម្មជនចលនាមាតាធម្មជាតិ កញ្ញា ភួន កែវរស្មី និងលោក ថុន រដ្ឋា បានបង្ហោះរូបភាពរបស់ពួកគាត់ភ្ជាប់ជាមួយរូបភាពមនុស្សជាទីស្រឡាញ់របស់ពួកគាត់ដែលកំពុងជាប់ឃុំខ្លួន ដើម្បីទាមទារជាសាធារណៈឱ្យមានការដោះលែងអ្នកទាំងនោះឱ្យមានសេរីភាពវិញ ។ សកម្មជនទាំង៥នាក់ ត្រូវបានចាប់ខ្លួនកាលពីដើមឆ្នាំនេះ ដែលជាផ្នែកមួយនៃការចាប់ខ្លួនបែបហិង្សាទៅលើយុវជន និងសកម្មជនបរិស្ថាន ដែលបានចេញតវ៉ានៅតាមដងផ្លូវដោយសន្តិវិធី ដើម្បីជំទាស់ទៅនឹងការចាប់ខ្លួនលោក រ៉ុង ឈុន ប្រធានសហជីព ក៏ដូចជាជំទាស់ទៅនឹងការលក់បឹងតាមោក ក្នុងរាជធានីភ្នំពេញ ។ សកម្មជនទាំង៥នាក់ កំពុងស្ថិតក្រោមការឃុំខ្លួនបណ្ដោះអាសន្នរង់ចាំសវនាការ និងប្រឈមនឹងការជាប់ពន្ធនាគាររហូតដល់ ២ឆ្នាំ ប្រសិនបើត្រូវបានរកឃើញថាមានទោស ៕
