សកម្មជនការពារបរិស្ថានត្រូវបានផ្ដន្ទាទោសពីការគ្រោងតវ៉ាដោយសន្ដិវិធី
ចេញផ្សាយ ថ្ងៃទី៥ ខែឧសភា ឆ្នាំ២០២១នាព្រឹកនេះ យុវជនជាសកម្មជនបរិស្ថានចំនួន៣រូប ត្រូវបានសាលាដំបូងរាជធានីភ្នំពេញ ផ្ដន្ទាទោសឱ្យជាប់ពន្ធនាគារ ចន្លោះពី ១៨ខែ ទៅ២០ខែ ដោយសារការរៀបចំឱ្យមានការដើរហែក្បួនសន្ដិវិធីដោយស្ដ្រីម្នាក់ ក្នុងគោលបំណងបង្ហាញពីការបន្តចាក់លុបបឹងតាមោកក្នុងរាជធានីភ្នំពេញពីសំណាក់អាជ្ញាធរ និងភាពសកម្មនិយមផ្សេងទៀតក្នុងកិច្ចការពារធនធានធម្មជាតិរបស់ប្រទេសកម្ពុជា ។
គិតត្រឹមពេលចាប់ខ្លួន សកម្មជន កញ្ញា ឡុង គន្ធា មានអាយុ ២២ឆ្នាំ និងកញ្ញា ភួន កែវរស្មី មានអាយុ ១៩ឆ្នាំ ហើយអ្នកទាំងពីរត្រូវបានផ្ដន្ទាទោសដាក់ពន្ធនាគារ ១៨ខែ ពី “បទញុះញង់បង្កឱ្យមានភាពវឹកវរធ្ងន់ធ្ងរដល់សន្ដិសុខសង្គម” តាមបញ្ញត្តិមាត្រា ៤៩៤ និងមាត្រា ៤៩៥ នៃក្រមព្រហ្មទណ្ឌ និងពិន័យជាប្រាក់ម្នាក់ៗចំនួន ៤លានរៀល (ប្រមាណ ១ពាន់ដុល្លារ) ។ សកម្មជនទី៣គឺ លោក ថុន រដ្ឋា អាយុ ២៩ឆ្នាំ ត្រូវបានផ្ដន្ទាទោសដាក់ពន្ធនាគារ ២០ខែ និងពិន័យជាប្រាក់ចំនួន ៤លានរៀល ក្រោមបទចោទដូចគ្នា ។
សកម្មជន២នាក់ផ្សេងទៀត ត្រូវបានកាត់ទោសដោយកំបាំងមុខ ក្រោមបទចោទដូចគ្នា ដោយមានការចេញដីកាចាប់ខ្លួនពួកគេផងដែរ ។ លោក Alejandro Gonzalez-Davidson សញ្ជាតិអេស្ប៉ាញ និងជាស្ថាបនិកនៃចលនាមាតាធម្មជាតិ ត្រូវបានផ្ដន្ទាទោសដាក់ពន្ធនាគារ ២០ខែ ខណៈដែលកញ្ញា ជា គន្ធីន ត្រូវបានផ្ដន្ទាទោសដាក់ពន្ធនាគារ ១៨ខែ ។ អ្នកទាំងពីរ ត្រូវបានពិន័យជាប្រាក់ម្នាក់ៗចំនួន ៤លានរៀលដូចគ្នា ។
កញ្ញា គន្ធា កញ្ញា កែវរស្មី និងលោក រដ្ឋា ត្រូវបានដាក់ឱ្យស្ថិតក្រោមការឃុំខ្លួនបណ្ដោះអាសន្នរង់ចាំសវនាការ ចាប់តាំងពីពេលដែលអាជ្ញាធរបានចាប់ខ្លួនពួកគេ កាលពីដើមខែកញ្ញា ឆ្នាំ២០២០ បន្ទាប់ពីពួកគេគ្រោងរៀបចំការដើរក្បួន ដោយកញ្ញា ឡុង គន្ធា ម្នាក់ឯង ពីវត្តភ្នំ ឆ្ពោះទៅកាន់គេហដ្ឋានរបស់ សម្ដេចនាយករដ្ឋមន្រ្តី ដើម្បីបង្ហាញពីកង្វល់ ពាក់ព័ន្ធនឹងការអភិវឌ្ឍន៍ និងការចាក់លុបយ៉ាងឆាប់រហ័សនៃបឹងតាមោក ដែលជាបឹងធំជាងគេមួយ នៅសេសសល់ក្នុងរាជធានីភ្នំពេញ ។ ផ្នែកជាច្រើននៃបឹងនេះ ត្រូវបានកាត់ចេញ និងផ្ដល់ទៅឱ្យ ស្ថាប័នរដ្ឋ និងបុគ្គលដែលមានទំនាក់ទំនងជិតស្និទ្ធជាមួយអ្នកមានអំណាច នៅរយៈពេលប៉ុន្មានខែចុងក្រោយនេះ ។
ការជំនុំជម្រះក្ដីនៃសកម្មជនទាំងនេះ មានការសួរដេញដោលជាច្រើន ទាក់ទិននឹងគណនីហ្វេសប៊ុកមាតាធម្មជាតិ ដែលជាអ្នកផ្ដល់ជំនួយដល់អ្នកការពារបរិស្ថានទាំងនេះ និងព័ត៌មានទាំងឡាយដែលបានបង្ហោះនៅលើបណ្ដាញទំនាក់ទំនងសង្គម ដែលមិនមានបង្ហាញពីភស្តុតាងបញ្ជាក់ពីការញុះញង់ទាល់តែសោះ ។ ក្រុមសង្គមស៊ីវិល បានអំពាវនាវឱ្យដោះលែងសកម្មជនទាំងនេះឱ្យបានឆាប់ ខណៈដែលគ្រួសាររបស់ពួកគេបានកត់សម្គាល់ថា ស្ថានភាពចង្អៀតនៅក្នុងពន្ធនាគារ គឺប៉ះពាល់សុខភាព និងសុវត្ថិភាព របស់អ្នកការពារបរិស្ថានវ័យក្មេងទាំងនេះខ្លាំងណាស់ ។ កញ្ញា គន្ធា និង កញ្ញា កែវរស្មី ត្រូវបានកំណត់ឱ្យដោះលែងពីពន្ធនាគារវិញនៅខែមីនា ឆ្នាំ២០២២ ខណៈដែលលោក រដ្ឋា នឹងត្រូវដោះលែងវិញក្នុងខែឧសភា ឆ្នាំ២០២២ ៕