តំណាងសហគមន៍ពីរនាក់ ត្រូវបានចាប់ខ្លួន ក្រោមបទចោទទាក់ទងនឹងច្បាប់កូវីដ-១៩
ចេញផ្សាយ ថ្ងៃទី២៨ ខែសីហា ឆ្នាំ២០២១នាថ្ងៃនេះ តំណាងសហគមន៍ដីធ្លីចំនួនពីរនាក់ នៅខេត្តស្វាយរៀង ត្រូវបានបញ្ជូនទៅឃុំខ្លួនបណ្តោះអាសន្នរង់ចាំសវនាការ ក្រោមការចោទប្រកាន់ពី “បទមិនគោរពវិធានការរដ្ឋបាល” និង “បទរារាំងការអនុវត្តវិធានការ” តាមបញ្ញត្តិមាត្រា ១០ និងមាត្រា១១ នៃច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ ១៩ និងជំងឺឆ្លងកាចសាហាវនិងប្រកបដោយគ្រោះថ្នាក់ធ្ងន់ធ្ងរផ្សេងទៀត ដែលទើបតែអនុម័តនាដើមឆ្នាំនេះ ដោយបទល្មើសទាំងពីរអាចធ្វើឲ្យអ្នកទាំងពីរជាប់ពន្ធនាគាររហូតដល់ ៥ ឆ្នាំ និងពិន័យជាប្រាក់រហូតដល់ ២០លានរៀលក្នុងម្នាក់ៗ ។
អ្នកស្រី យស់ សោភ័ណ្ឌ និងអ្នកស្រី ឥន សូត្រ តំណាងសហគមន៍សាមគ្គីចេកមាសនៅក្នុងស្រុកស្វាយជ្រំ ត្រូវបាននគរបាលខេត្តកោះហៅសាកសួរកាលពីព្រឹកថ្ងៃសុក្រ ហើយត្រូវបានចាប់ខ្លួនបន្ទាប់ពីមកដល់ប៉ុស្តិ៍នគរបាល ។ ការកោះហៅអ្នកទាំងពីរ ពាក់ព័ន្ធនឹងការតវ៉ាដោយអហិង្សារបស់សហគមន៍នៅលើវាលស្រែ ដែលមានការចូលរួមពីអ្នកភូមិប្រមាណ ១០០នាក់ កាលពីថ្ងៃទី០២ ខែសីហា ឆ្នាំ២០២១ ។ អំឡុងពេលតវ៉ា អាជ្ញាធរបានចោទប្រកាន់អ្នកទាំងពីរ ថាមិនគោរពតាមវិធានការសុខាភិបាលឲ្យបានត្រឹមត្រូវ និងបានពិន័យអ្នកទាំងពីរជាប្រាក់ចំនួន ២ លានរៀល ក្នុងម្នាក់ៗ ។ អភិបាលស្រុកស្វាយជ្រំ បានប្រាប់កាសែតក្នុងស្រុកថា ប្រសិនបើអ្នកទាំងពីរមិនព្រមបង់ប្រាក់ពិន័យក្នុងរយៈពេលមួយខែទេ អ្នកទាំងពីរនឹងប្រឈមមុខនឹងវិធានការច្បាប់បន្ថែមទៀត ។
អ្នកជំនាញអង្គការសហប្រជាជាតិជាច្រើន កាលពីខែមេសា បានលើកឡើងពីការព្រួយបារម្ភមួយចំនួន ទាក់ទងនឹងការប្រើប្រាស់ “ទោសជាប់ពន្ធនាគារ និងពិន័យធ្ងន់ធ្ងរហួសហេតុ” នៅក្នុងច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ ១៩ និងជំងឺឆ្លងកាចសាហាវនិងប្រកបដោយគ្រោះថ្នាក់ធ្ងន់ធ្ងរផ្សេងទៀត ដែលរាជរដ្ឋាភិបាលទើបតែបានអនុម័ត ដោយមិនមានការពិគ្រោះយោបល់ឲ្យបានត្រឹមត្រូវ កាលពីខែមីនា ឆ្នាំ២០២១ ។
អ្នកភូមិជាច្រើននាក់នៅសហគមន៍ចេកមាស សំណូមពរឱ្យអាជ្ញាធរខេត្តបញ្ឈប់ការបំភិតបំភ័យ និងដាក់សំពាធដល់អ្នកទាំងនោះ ឱ្យទទួលយកសំណងដែលមិនសមរម្យ ជាថ្នូរនឹងដីស្រែចំនួន ១០០ ហិកតា ដែលអាជ្ញាធរគ្រោងនឹងយកទៅអភិវឌ្ឍក្នុងផ្នែកមួយនៃគម្រោងជីកប្រឡាយទឹកសាធារណៈ ៕
- ចំណងជើង & មូលបទ
- តុលាការ និងនីតិរដ្ឋ កូវីដ-១៩ សិទិ្ធបញ្ចេញមតិ និងចូលរួម សិទ្ធិដីធ្លី សិទ្ធិស្ត្រី