កុមារអាយុ ១៦ឆ្នាំ ដែលកើតជំងឺអូទីស្សឹម ត្រូវបានផ្ដន្ទាទោស ជុំវិញការបង្ហោះសារលើហ្វេសប៊ុក និងថេលេក្រាម
ចេញផ្សាយ ថ្ងៃទី១ ខែវិច្ឆិកា ឆ្នាំ២០២១
នាព្រឹកនេះ សាលាដំបូងរាជធានីភ្នំពេញ បានសម្រេចផ្ដន្ទាទោសក្មេងប្រុសម្នាក់ អាយុ ១៦ឆ្នាំ ដែលកើតជំងឺអូទីស្សឹម ឱ្យជាប់ពន្ធនាគារ ៨ខែ ជុំវិញមាតិកា ដែលរូបគេ បានចែករំលែកលើប្រព័ន្ធហ្វេសប៊ុក និងថេលេក្រាម ។ កុមារ ដែលជាកូនប្រុសរបស់ សកម្មជន និងសមាជិកគណបក្សជំទាស់ដែលកំពុងជាប់ឃុំ ត្រូវបានផ្ដន្ទាទោសពីបទញុះញង់ និងបទប្រមាថមន្ត្រីរាជការសាធារណៈ តាមបញ្ញត្តិមាត្រា៤៩៤ មាត្រា៤៩៥ និងមាត្រា៥០២ នៃក្រមព្រហ្មទណ្ឌ ។ រូបគេ នឹងត្រូវអនុវត្តទោសជាប់ពន្ធនាគាររយៈពេល ៤ខែ ១៥ថ្ងៃ ដោយទោសនៅសល់ផ្សេងទៀតត្រូវបានព្យួរ ។
កុមារនេះ នឹងត្រូវដោះលែងពីពន្ធនាគារវិញក្នុងខែនេះ ប៉ុន្តែត្រូវបានដាក់ឱ្យស្ថិតក្រោមការព្យួរទោសសាកល្បងរយៈពេល២ឆ្នាំ ដោយតម្រូវឱ្យរូបគេបង្ហាញខ្លួននៅចំពោះមុខតុលាការ គ្រប់ពេលដែលត្រូវបានកោះហៅ ឬជូនដំណឹងទៅតុលាការ ប្រសិនបើផ្លាស់ប្ដូរអាសយដ្ឋាន ក៏ដូចជាត្រូវសុំការអនុញ្ញាត ប្រសិនបើចង់ចាកចេញពីប្រទេស ព្រមទាំងលក្ខខណ្ឌផ្សេងទៀត ។
សវនាការសំណុំរឿងនេះ ត្រូវបានប្រព្រឹត្តឡើងជាសាធារណៈ ហើយនាព្រឹកនេះ អ្នកឃ្លាំមើល ត្រូវបានអនុញ្ញាតឱ្យចូលបន្ទប់សវនាការ ដែលមានវត្តមានរបស់កុមារនេះ ។ ក្រោយមក អ្នកឃ្លាំមើល ត្រូវបានតម្រូវឱ្យចេញពីបន្ទប់សវនាការ មុនពេលប្រកាសសាលក្រម ។ បន្ទាប់ពីចាកចេញពីបន្ទប់សវនាការក្រោយពីការប្រកាសសាលក្រម ម្ដាយរបស់កុមារ ត្រូវបានមន្ត្រីតុលាការហែហមចេញពីអគារតុលាការ ខណៈដែលអ្នកស្រីព្យាយាមប្រាប់ទៅអ្នកឃ្លាំមើល និងអ្នកសារព័ត៌មាន ដែលកំពុងរង់ចាំនៅខាងក្រៅតុលាការ ពាក់ព័ន្ធនឹងការប្រកាសសាលក្រមនេះ ។
លោក កាក់ កុម្ភា ឪពុករបស់ក្មេងប្រុសនេះ ដែលជាអតីតមន្ត្រីគណបក្សសង្គ្រោះជាតិដែលត្រូវបានរំលាយ បានកំពុងជាប់ឃុំក្នុងពន្ធនាគារតាំងពីខែមិថុនា ឆ្នាំ២០២០ ពីបទរួមគំនិតក្បត់ និងបទញុះញង់ ។ អ្នកស្រី ព្រំ ចន្ថា ដែលជាម្ដាយរបស់ក្មេងប្រុស បានតវ៉ាដោយអហិង្សាជាញឹកញាប់ រួមជាមួយស្ត្រីមួយក្រុម ដែលត្រូវបានហៅឈ្មោះថា “ស្រ្តីថ្ងៃសុក្រ” ដើម្បីទាមទារឱ្យមានការដោះលែងកូន និងប្ដីរបស់អ្នកស្រី ក៏ដូចជាអតីតសមាជិកគណបក្សសង្គ្រោះជាតិដទៃទៀត ដែលកំពុងជាប់ឃុំ ។
ក្មេងប្រុសនេះ ត្រូវបានចាប់ខ្លួន ក្នុងខែមិថុនា ឆ្នាំ២០២១ មុនពេលត្រូវបានបញ្ជូនទៅឃុំខ្លួននៅមណ្ឌលអប់រំកែប្រែទី២ក្នុងរាជធានីភ្នំពេញ ដែលរូបគេត្រូវបានឃុំខ្លួនបណ្ដោះអាសន្នរង់ចាំសវនាការ អស់រយៈពេល ៤ខែ មកហើយ ។ សំណើសុំនៅក្រៅឃុំរបស់ក្មេងប្រុសនេះ ត្រូវបានបដិសេធចោល ខណៈដែលក្រុមគ្រួសាររបស់គេត្រូវបានបដិសេធមិនឱ្យចូលជួបសួរសុខទុក្ខអស់រយៈពេលជាច្រើនខែ ទោះបីជាច្បាប់ស្ដីពីយុត្តិធម៌អនីតិជនឆ្នាំ២០១៦ បានចែងថា ការឃុំខ្លួនបណ្ដោះអាសន្នរង់ចាំសវនាការ គួរតែជាជម្រើសចុងក្រោយសម្រាប់កុមារក៏ដោយ ។
ក្មេងប្រុសនេះ ធ្លាប់ត្រូវបានឃុំខ្លួន និងក្រោយមកត្រូវបានដោះលែងវិញ កាលពីខែតុលា ឆ្នាំ២០២០ ។ កាលពីខែមេសា ឆ្នាំ២០២១នេះ រូបគេត្រូវដេររបួស និងសម្រាកព្យាបាល បន្ទាប់ពីជនល្មើសដែលមិនស្គាល់អត្តសញ្ញាណគប់ដុំឥដ្ឋចំក្បាលរបស់គេ ។ ពុំមានជនល្មើសណាម្នាក់ ត្រូវបានយកមកផ្ដន្ទាទោសទាក់ទងនឹងការវាយប្រហារនេះទេ ៕
- ចំណងជើង & មូលបទ
- សិទ្ធិកុមារ តុលាការ និងនីតិរដ្ឋ សិទិ្ធបញ្ចេញមតិ និងចូលរួម បញ្ហាពន្ធនាគារ
