សាលាឧទ្ធរណ៍តម្តល់ការផ្តន្ទាទោស ប៉ុន្តែព្យួរទោស លោក រ៉ុង ឈុន កញ្ញា ស កន្និកា និងលោក តុន និមល
ចេញផ្សាយ ថ្ងៃទី១២ ខែវិច្ឆិកា ឆ្នាំ២០២១
សាលាឧទ្ធរណ៍រាជធានីភ្នំពេញ នាព្រឹកនេះ បានសម្រេចតម្កល់ការផ្ដន្ទាទោស ប៉ុន្តែព្យួរទោស លោក រ៉ុង ឈុន កញ្ញា ស កន្និកា និងលោក តុន និមល ។ អ្នកទាំងបី ត្រូវបានសាលាដំបូងរាជធានីភ្នំពេញផ្តន្ទាទោសពីបទញុះញង់ តាមបញ្ញត្តិមាត្រា ៤៩៤ និងមាត្រា ៤៩៥ នៃក្រមព្រហ្មទណ្ឌ កាលពីថ្ងៃទី១៨ ខែសីហា ឆ្នាំ២០២១ ដោយសារការអនុវត្តសិទិ្ធសេរីភាពក្នុងការបញ្ចេញមតិរបស់អ្នកទាំងនោះ ។
សាលាឧទ្ធរណ៍ បានសម្រេចឱ្យលោក រ៉ុង ឈុន ជាប់ពន្ធនាគាររយៈពេល ១៥ ខែ និង១១ថ្ងៃ នៃទោសពន្ធនាគារសរុប ២៤ខែ ហើយទោសដែលនៅសល់ត្រូវបានព្យួរ ។ កញ្ញា កន្និកា ត្រូវបានសាលាឧទ្ធរណ៍សម្រេចឱ្យជាប់ពន្ធនាគារចំនួន ១៥ ខែ និង ៥ថ្ងៃ នៃទោសសរុបចំនួន ២០ខែ ដោយទោសដែលនៅសល់ត្រូវព្យួរ ។ រីឯលោក និមល ត្រូវបានសាលាឧទ្ធរណ៍សម្រេចឱ្យជាប់ពន្ធនាគារចំនួន ១៤ ខែ និង ២៤ ថ្ងៃនៃទោសសរុបចំនួន ២០ ខែ ដោយទោសដែលនៅសល់ត្រូវព្យួរ ។ លោក រ៉ុង ឈុន និងកញ្ញា ស កន្និកា បានជាប់ពន្ធនាគារអស់រយៈពេលជាង ១៥ខែ មកហើយ រីឯលោក តុន និមល បានជាប់ពន្ធនាគារអស់រយៈពេលជាង ១២ខែ ។ ក្រៅពីនេះ អ្នកទាំងបីក៏ត្រូវបានសាលាឧទ្ធរណ៍ បានសម្រេចព្យួរទោសសាកល្បងចំនួន ៣ឆ្នាំ ផងដែរ ក្រោយពេលដោះលែង ដោយតម្រូវឱ្យអ្នកទាំងបី គោរពនូវវិធានការដ៏តឹងរ៉ឹងជាច្រើន ដូចជាមិនអាចទាក់ទងជាមួយគ្នា ហើយត្រូវរាយការណ៍ជូនព្រះរាជអាជ្ញានៅពេលអ្នកទាំងបីផ្លាស់ប្តូរទីលំនៅ ឬការងារ យោងតាមមាត្រា ១១៩ និង ១២០ នៃក្រមព្រហ្មទណ្ឌ ។
សាលាឧទ្ធរណ៍ក៏សម្រេចតម្កល់សេចក្តីសម្រេចរបស់សាលាដំបូង ដែលឱ្យសកម្មជនទាំង៣នាក់ បង់ប្រាក់ពិន័យម្នាក់ៗចំនួន ២លានរៀល (៥០០ដុល្លារ) និងបង្គាប់ឱ្យអ្នកទាំង៣នាក់ សងសំណងជំងឺចិត្តរួមចំនួន ៤០០លានរៀល (១០០.០០០ ដុល្លារ) សម្រាប់ការខូចខាតផ្សេងៗ ដែលការពិន័យទាំងពីរនេះ គឺជាការពិន័យដែលមានទឹកប្រាក់ច្រើនហួសហេតុ ។
លោក រ៉ុង ឈុន ដែលជាប្រធានសហជីព និងជាសកម្មជនការពារសិទ្ធិការងារ អស់រយៈពេលជាច្រើនឆ្នាំមកហើយនោះ ត្រូវបានចាប់ខ្លួនកាលពីខែកក្កដា ឆ្នាំ២០២០ ជុំវិញការអត្ថាធិប្បាយរបស់លោកទាក់ទងនឹងបញ្ហាព្រំដែនប្រទេសកម្ពុជា-វៀតណាម ក្រោយពេលដែលលោក បានចុះជួបសំណេះសំណាលជាមួយប្រជាពលរដ្ឋក្នុងមូលដ្ឋាន ។ កញ្ញា កន្និកា និងលោក និមល ត្រូវបានចាប់ខ្លួន អំឡុងពេលតវ៉ាដោយអហិង្សា កាលពីខែសីហា និងកញ្ញា ឆ្នាំ២០២០ ដើម្បីអំពាវនាវឱ្យមានការដោះលែងលោក រ៉ុង ឈុន ។ អំឡុងពេលសាកសួរទៅលើកញ្ញា កន្និកា និងលោក និមល អាជ្ញាធរ បានផ្តោតទៅលើ ថាតើអ្នកទាំងពីរបានចែករំលែកព័ត៌មានទៅលើទំព័រហ្វេសប៊ុក និងថេឡេក្រាម អំពីការចាប់ខ្លួនលោក រ៉ុង ឈុន ដែរឬទេ។
ការចាប់ខ្លួនលោក រ៉ុង ឈុន បានបង្កឱ្យមានរលកនៃការថ្កោលទោសពីសំណាក់សហគមន៍អន្តរជាតិ និងមានការតវ៉ាជាច្រើនពីពលរដ្ឋក្នុងស្រុក រហូតដល់មានការចាប់ខ្លួនសកម្មជន សិល្បករ និងអ្នកការពារសិទ្ធិមនុស្សចំនួន ១៩នាក់បន្ថែមទៀត ហើយភាគច្រើននៃអ្នកទាំងនោះរងការចោទប្រកាន់ពីបទញុះញង់ផងដែរ ។ ក្រុមសង្គមស៊ីវិល សហគមន៍ និងសហជីព ជាង ១៤០ បានអំពាវនាវឱ្យអាជ្ញាធររដ្ឋទម្លាក់ចោលបទចោទទាំងអស់ចំពោះលោក រ៉ុង ឈុន ហើយអ្នករាយការណ៍ពិសេស និងក្រុមការងាររបស់អង្គការសហប្រជាជាតិ ចំនួន ៥នាក់ បានសំដែងការសោកស្តាយជាបន្តបន្ទាប់ចំពោះការចាប់ខ្លួនលោក រ៉ុង ឈុន និងការប្រើអំពើហិង្សាដោយអាជ្ញាធររដ្ឋជាបន្តបន្ទាប់មកលើអ្នកតវ៉ាអហិង្សាផងដែរ ។
- ចំណងជើង & មូលបទ
- សិទិ្ធបញ្ចេញមតិ និងចូលរួម សិទ្ធិការងារ រ៉ុង ឈុន
