ប្រធាន និងសកម្មជនសហជីពណាហ្គាវើលដ៏ ត្រូវបានឃុំខ្លួនបណ្តោះអាសន្នលើបទចោទញុះញង់
ចេញផ្សាយ ថ្ងៃទី៥ ខែមករា ឆ្នាំ២០២២នារសៀលនេះ សាលាដំបូងរាជធានីភ្នំពេញ បានសម្រេចបញ្ជូនប្រធានសហជីពទ្រទ្រង់សិទិ្ធការងារ បុគ្គលិក កម្មករខ្មែរនៃក្រុមហ៊ុនណាហ្គាវើលដ៏ (LRSU) កញ្ញា ឈឹម ស៊ីថរ ទៅឃុំខ្លួនបណ្តោះអាសន្ន នៅមណ្ឌលអប់រំកែប្រែទី២ (ម២) សកម្មជនសហជីព លោក សុខ ណារិទិ្ធ ទៅឃុំខ្លួនបណ្តោះអាសន្ន នៅមណ្ឌលអប់រំកែប្រែទី១ (ម១) ហើយនិងសកម្មជនសហជីពម្នាក់ទៀត លោក សុខ គង្គា ត្រូវបានដោះលែងឱ្យនៅក្រៅឃុំបណ្តោះអាសន្ននិងត្រូវបានដាក់ឱ្យស្ថិតក្រោមការត្រួតពិនិត្យតាមផ្លូវតុលាការ ។
អ្នកទាំងបី ត្រូវបានចោទប្រកាន់ពីបទញុះញង់ឱ្យប្រព្រឹត្តិបទឧក្រិដ្ឋ យោងតាមមាត្រា ៤៩៤ និង ៤៩៥ នៃក្រមព្រហ្មទណ្ឌ ដូចគ្នានឹងបទចោទដែលតុលាការចោទប្រកាន់មកលើសកម្មជន និងសមាជិកសហជីពណាហ្គាវើលដ៏ ៦នាក់ ផ្សេងទៀត ដែលត្រូវបានអាជ្ញាធរចាប់ខ្លួនកាលពីថ្ងៃទី៣១ ខែធ្នូ ឆ្នាំ២០២១ ។ អ្នកទាំង ៦ ដែលរួមមាន អ្នកស្រី ឈឹម សុខន អ្នកស្រី ឃ្លាំង សុបិន្ត កញ្ញា សុន ស្រីពេជ្យ អ្នកស្រី ហៃ សុភាព អ្នកស្រី រីសុវណ្ណឌី និងអ្នកស្រី ទូច សិរីមាស កំពុងត្រូវបានឃុំខ្លួនបណ្តោះអាសន្នរង់ចាំសវនាការនៅ ពន្ធនាគារ ម២ ។
ស៊ីថរ ត្រូវបានចាប់ខ្លួនយ៉ាងហិង្សា កាលពីម្សិលមិញ នៅពេលដែលកញ្ញាព្យាយាមចូលរួមជាមួយសមាជិកសហជីពរបស់នាង ក្នុងការធ្វើកូដកម្មអហិង្សា នៅក្បែរកាស៊ីណូ ណាហ្គាវើលដ៏ ក្នុងរាជធានីភ្នំពេញ ។ ក្រុមសង្គមស៊ីវិល ចំនួន ១១៩ ស្ថាប័ន បានអំពាវនាវឱ្យមានការដោះលែងអ្នកទាំង ៩ ជាបន្ទាន់ និងគ្មានលក្ខខណ្ឌ ហើយលើកចោលបទចោទប្រកាន់ ដែលត្រូវបានចោទមកលើអ្នកទាំងនោះ ក៏ដូចជាអំពាវនាវដល់អាជ្ញាធរ និងក្រុមហ៊ុនធ្វើការដោះស្រាយបញ្ហវិវាទការងារដែលទាមទារដោយកម្មករនិយោជិតណាហ្គាវើលដ៏ ដោយសន្តិវិធី ។
- ចំណងជើង & មូលបទ
- សិទិ្ធបញ្ចេញមតិ និងចូលរួម សិទ្ធិការងារ