សាលាឧទ្ធរណ៍តម្កល់សាលក្រមសាលាដំបូងរាជធានីភ្នំពេញ ផ្តន្ទាទោសបុគ្គលិកអង្គការអាដហុក និងបុគ្គលិក គ.ជ.ប
ចេញផ្សាយ ថ្ងៃទី២៣ ខែឧសភា ឆ្នាំ២០២២
នាព្រឹកនេះសាលាឧទ្ធរណ៍រាជធានីភ្នំពេញ បានតម្កល់សាលក្រមសាលាដំបូងរាជធានីភ្នំពេញដែលត្រូវបានតុលាការសម្រេចកាលពីខែកញ្ញា ឆ្នាំ២០១៨ ដោយផ្តន្ទាទោសដោយមិនសមហេតុផល លើបុគ្គលិក និងអតីតបុគ្គលិកសមាគមអាដហុក ការពារសិទិ្ធមនុស្សនិងអភិវឌ្ឍន៍នៅកម្ពុជា (ADHOC) ចំនួន ៤នាក់ ដែលរួមមានលោក នី សុខា លោក យី សុខសាន្ត លោក ណៃ វ៉ង់ដា អ្នកស្រី លឹម មុនី និងមន្ត្រីគណៈកម្មាធិការជាតិរៀបចំការបោះឆ្នោត លោក នី ចរិយា ។ អ្នកទាំងប្រាំ ធ្លាប់ត្រូវបានតុលាការផ្តន្ទាទោសឱ្យជាប់ក្នុងពន្ធនាគារ និងរងការចោទប្រកាន់ពីបទ សូកប៉ាន់សាក្សី ។
លោក សុខា លោក វ៉ង់ដា លោក សុខសាន្ត និងអ្នកស្រី មុនី ត្រូវបានតុលាការកាត់ទោសកាលពីថ្ងៃទី២៦ ខែកញ្ញា ឆ្នាំ ២០១៨ ពីបទ សូកប៉ាន់សាក្សី ដោយយោងតាមមាត្រា ៥៤៨ នៃក្រមព្រហ្មទណ្ឌ ។ ចំណែកឯលោក ចរិយា ដែលជាអគ្គលេខាធិការងនៃគណៈកម្មាធិការជាតិរៀបចំការបោះឆ្នោតនៅមុនពេលចាប់ខ្លួន និងក្រោយពេលដោះលែង ត្រូវបានតុលាការកាត់ទោសពីបទ សមគំនិត ដោយយោងតាមមាត្រា ២៩ និងមាត្រា ៥៤៨ នៃក្រមព្រហ្មទណ្ឌ ។ ការចាប់ខ្លួន ត្រូវបានធ្វើឡើងអំឡុងពេលមានការបង្ក្រាបយ៉ាងច្រើនមកលើក្រុមសង្គមស៊ីវិល និងសមាជិកអតីតគណបក្សជំទាស់ ។ អ្នកការពារសិទិ្ធមនុស្សទាំង ៥ នាក់ បានជាប់ឃុំខ្លួនបណ្តោះអាសន្នក្នុងពន្ធនាគារអស់ ១៤ ខែ មុនពេលត្រូវបានតុលាការដោះលែងឱ្យនៅក្រៅឃុំបណ្តោះអាសន្ន កាលពីខែមិថុនា ឆ្នាំ ២០១៧ ហើយក្រោយមកត្រូវបានតុលាការផ្តន្ទាទោសពន្ធនាគារចំនួន ៥ឆ្នាំ ប៉ុន្តែអនុវត្តទោស ១៤ ខែ ហើយទោសនៅសល់ត្រូវបានព្យួរ ។
ទាំងភាគីជនជាប់ចោទ ទាំងភាគីព្រះរាជអាជ្ញា បានដាក់ពាក្យបណ្តឹងឧទ្ធរណ៍លើសេចក្តីសម្រេចខាងលើនេះ ដោយភាគីចុងចោទស្នើសុំសាលាឧទ្ធរណ៍ឱ្យលើកចោលបទចោទប្រកាន់ និងរួចផុតពីបទល្មើស ចំណែកឯភាគីព្រះរាជអាជ្ញាស្នើសុំតុលាការឱ្យបង្គាប់ឱ្យចុងចោទអនុវត្តទោសទាំងអស់ ។ សាលាឧទ្ធរណ៍ បានបដិសេធបណ្តឹងឧទ្ធរណ៍របស់ភាគីទាំងសងខាង ដោយតម្កល់សាលក្រមសាលាដំបូងដែលផ្តន្ទាទោស និងព្យួរទោសដែលនៅសល់ពីការជាប់ឃុំខ្លួនបណ្តោះអាសន្ន លើអ្នកការពារសិទិ្ធមនុស្សទាំង ៥ នាក់ ។
អ្នកការពារសិទិ្ធមនុស្សទាំង ៥នាក់ គឺជាបុគ្គលិក និងអតីតបុគ្គលិកនៃសមាគម អាដហុក នៅមុនពេលចាប់ខ្លួន ។ អ្នកទាំង ៥ ត្រូវបានចោទប្រកាន់ថាបានផ្តល់លុយដល់ស្ត្រីម្នាក់ ដែលពាក់ព័ន្ធនឹងករណីមួយផ្សេងទៀតទាក់ទងនឹងឯកឧត្តម កឹម សុខា ដែលជាប្រធានអតីតគណបក្សជំទាស់ ។
មិនមានសាក្សីណាម្នាក់ដែលមានឈ្មោះនៅក្នុងសំណុំរឿងនេះ មានវត្តមាននៅក្នុងសវនាការសាលាដំបូងនោះទេ ហើយក៏មិនមានភស្តុតាងគួរឱ្យជឿណាមួយត្រូវបានបង្ហាញដោយព្រះរាជអាជ្ញានៅក្នុងសវនាការនោះផងដែរ ។ សំណើសុំរបស់ចុងចោទ ដល់តុលាការឱ្យកោះហៅសាក្សីមួយចំនួនចូលក្នុងសវនាការសាលាឧទ្ធរណ៍ និងសំណើសុំពន្យាពេលសវនាការ ក៏ត្រូវបានបដិសេធផងដែរ ។
