ការផ្ដន្ទាទោសលើតំណាងសហគមន៍ដីធ្លីនៅខេត្តត្បូងឃ្មុំ ត្រូវបានតម្កល់
ចេញផ្សាយ ថ្ងៃទី១៥ ខែមិថុនា ឆ្នាំ២០២២
តុលាការកំពូលនាព្រឹកនេះ បានតម្កល់សាលដីកា លោក ហឿន ស៊ីនាត តំណាងសហគមន៍ដីធ្លីមកពីខេត្តត្បូងឃ្មុំ ទុកជាបានការ ។ លោក ស៊ីនាត ត្រូវបានផ្ដន្ទាទោសដោយសាលាដំបូងខេត្តត្បូងឃ្មុំ កាលពីខែធ្នូ ឆ្នាំ២០២០ ពីបទធ្វើឱ្យខូចខាតដោយចេតនា មានស្ថានទម្ងន់ទោស ក្នុងនាមជាសហចារី តាមបញ្ញត្តិមាត្រា៤១០ និងមាត្រា៤១១(១) នៃក្រមព្រហ្មទណ្ឌ ។ លោក ត្រូវបានផ្ដន្ទាទោសដាក់ពន្ធនាគារកំណត់រយៈពេល ២ឆ្នាំ ជាសាលដីកាសម្រេចតម្ដល់ដោយសាលាឧទ្ធរណ៍ត្បូងឃ្មុំ ក្នុងខែសីហា ឆ្នាំ២០២១ និងតុលាការកំពូល នាព្រឹកនេះ ។
សហគមន៍ជាច្រើន ក្នុងស្រុកតំបែរ ខេត្តត្បូងឃ្មុំ បានប្រឈមនឹងបញ្ហាទំនាស់ដីធ្លីសហគមន៍ជាច្រើនឆ្នាំមកហើយ ជាមួយក្រុមហ៊ុន ចិនចំការកៅស៊ូ ហាម៉ឹនី វីន អ៊ិនវេសមេន ។ អ្នកភូមិ៨នាក់ទៀតដែលមិនស្ថិតក្រោមការឃុំខ្លួន និងលោក ស៊ីនាត ត្រូវបានផ្ដន្ទាទោសក្រោយពីអ្នកទាំងនោះធ្វើការតវ៉ាប្រឆាំងនឹងការបិទផ្លូវ និងការឈូសឆាយដីធ្លីរបស់ពួកគេពីសំណាក់ក្រុមហ៊ុន ។ លោក ស៊ីនាត គឺជាមនុស្សតែម្នាក់គត់ ដែលបានប្ដឹងសាទុក្ខទៅកាន់តុលាការកំពូល ។ លោកត្រូវបានឃុំខ្លួន អស់រយៈពេលជាង ១ឆ្នាំ និង១០ខែហើយ ក្នុងពន្ធនាគារខេត្តត្បូងឃ្មុំ គិតចាប់តាំងពីពេលចាប់ខ្លួនលោក ក្នុងខែសីហា ឆ្នាំ២០២០ ។
លោក ស៊ីនាត ក៏ត្រូវបានផ្ដន្ទាទោសក្នុងសំណុំរឿងដាច់ដោយឡែកមួយទៀត ក្រោយពេលចាប់ខ្លួន ។ នៅក្នុងសំណុំរឿងនេះ លោកត្រូវបានផ្ដន្ទាទោសរួមជាមួយមនុស្ស ១៤នាក់ផ្សេងទៀត ពីបទរារាំងមន្ត្រីរាជការសាធារណៈ មានស្ថានទម្ងន់ទោស តាមបញ្ញត្តិមាត្រា៥០៣ និងមាត្រា៥០៤នៃក្រមព្រហ្មទណ្ឌ បន្ទាប់ពីបានថតសកម្មភាពអាជ្ញាធរអនុវត្តដីការបស់តុលាការ ពាក់ព័ន្ធនឹងដីជម្លោះនោះ ។ លោកត្រូវបានផ្ដន្ទាទោសដាក់ពន្ធនាគាររយៈពេល ១ឆ្នាំ និងពិន័យជាប្រាក់ចំនួន ១លានរៀល ។ មនុស្សចំនួន ១៤នាក់ផ្សេងទៀត ត្រូវបានតុលាការព្យួរទោសទាំងស្រុង ។ លោក ស៊ីនាត ក៏បានប្ដឹងសាទុក្ខសំណុំរឿងនេះទៅកាន់តុលាការកំពូលផងដែរ ហើយដំណើរការនីតិវិធីកំពុងបន្ត ។
សមាជិកសហគមន៍ស្រែប្រាំងប្រមាណ ៣០នាក់ មកពីខេត្តត្បូងឃ្មុំ បានធ្វើដំណើរទៅកាន់រាជធានីភ្នំពេញ និងបានជួបជុំគ្នានៅខាងមុខ តុលាការកំពូល ដើម្បីគាំទ្រលោក ស៊ីនាត អំឡុងពេលសវនាការរបស់លោក កាលពីថ្ងៃពុធ សប្ដាហ៍មុន ។ សន្តិសុខខណ្ឌដូនពេញ បានរាំងខ្ទប់ អ្នកទាំងនោះ មិនឱ្យជួបជុំគ្នានៅខាងមុខតុលាការ ក៏ដូចជាដើរទៅកាន់រដ្ឋសភាជាតិ ដើម្បីសួរនាំអំពីញត្តិដែលពួកគេបានដាក់ជូនកន្លងមកនោះទេ ៕
- ចំណងជើង & មូលបទ
- តុលាការ និងនីតិរដ្ឋ សិទិ្ធបញ្ចេញមតិ និងចូលរួម សិទ្ធិដីធ្លី
