មេឃុំជាប់ឆ្នោតគណបក្សភ្លើងទៀន ត្រូវបានចាប់ខ្លួន ពាក់ព័ន្ធនឹងការចោទប្រកាន់ពីអំពើប្លន់ កាលពី២០ឆ្នាំមុន
ចេញផ្សាយ ថ្ងៃទី២១ ខែមិថុនា ឆ្នាំ២០២២
លោក ញឹម សារ៉ុម មេឃុំជាប់ឆ្នោតថ្មីៗ មកពីគណបក្សភ្លើងទៀន ត្រូវបានចាប់ខ្លួន នារសៀលនេះ និងឃាត់ខ្លួននៅខេត្តកំពង់ធំ ពាក់ព័ន្ធនឹងការចោទប្រកាន់ពីអំពើប្លន់ កាលពីឆ្នាំ២០០២ ។ លោកគឺជាមេឃុំម្នាក់ក្នុងចំណោមមេឃុំ៤នាក់នៃគណបក្សជំទាស់នៅទូទាំងប្រទេស ដែលបានជាប់ឆ្នោតក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ កាលពីដើមខែនេះ ។
លោក សារ៉ុម ត្រូវបានសង្ស័យក្នុងការប្រព្រឹត្តអំពើប្លន់ក្នុងឆ្នាំ២០០២ និងត្រូវបានចោទប្រកាន់៥ឆ្នាំក្រោយក្នុងឆ្នាំ២០០៧ តាមបញ្ញត្តិមាត្រា៦នៃច្បាប់ស្ដីពីស្ថានទម្ងន់ទោសនៃបទឧក្រិដ្ឋ ។ បន្ទាប់មក ក៏មានការចេញដីកាចាប់ខ្លួនលោកក្នុងឆ្នាំ២០១២ ។ លោក សារ៉ុម និងជនសង្ស័យបីរូបទៀត ត្រូវបានតុលាការផ្តន្ទាទោសដោយកំបាំងមុខ កាលពីឆ្នាំ ២០១៤ ដោយសម្រេចឱ្យជាប់ពន្ធនាគារចំនួន ៥ឆ្នាំ ក្រោមការចោទប្រកាន់ថាអ្នកទាំងបួន បានលួចម៉ាស៊ីនភ្លើងមួយគ្រឿង ។ ក្នុងករណីនេះ ភាគីដើមបណ្តឹង បានដកពាក្យបណ្តឹងតាំងពីមុនពេលមានការផ្តន្ទាទោស ។
នៅដើមខែនេះ លោក សារ៉ុម បានជាប់ឆ្នោត ក្លាយជាមេឃុំចំណាលើ ក្នុងស្រុកស្ទោង ខេត្តកំពង់ធំ និងត្រូវបានកំណត់ឱ្យចូលកាន់តំណែង បើតាមការប្រកាសលទ្ធផលបោះឆ្នោតជាផ្លូវការ នៅថ្ងៃទី២៦ ខែមិថុនា ខាងមុខនេះ ។ លោក ធ្លាប់ជាជំទប់ទី១នៃឃុំចំណាលើក្នុងឆ្នាំ២០១៧ មកពីគណបក្សសង្គ្រោះជាតិ មុនពេលគណបក្សនេះត្រូវបានរំលាយ ប៉ុន្តែក្រោយមក អាសនៈរបស់លោក ត្រូវបានដកឱ្យទៅគណបក្សប្រជាជនកម្ពុជា ។
ការចាប់ខ្លួនលោក សារ៉ុម បាននាំឱ្យចំនួនសរុបនៃសមាជិក និងសកម្មជនគណបក្សភ្លើងទៀន ដែលត្រូវបានចាប់ខ្លួនដាក់ពន្ធនាគារ នាឆ្នាំនេះ កើនដល់ ៧នាក់ហើយ ដោយក្នុងនោះមានបេក្ខជនមេឃុំចំនួន៤នាក់ ។ អ្នកទោសមនសិការសរុបចំនួន ៥២នាក់ ក្នុងនោះមានសកម្មជននយោបាយ សកម្មជនដីធ្លី និងអ្នកសារព័ត៌មាន គឺកំពុងស្ថិតក្រោមការឃុំខ្លួនក្នុងពន្ធនាគារ ។
អត្ថបទនេះ ត្រូវបានធ្វើបច្ចុប្បន្នភាពនៅថ្ងៃទី២២ ខែមិថុនា ឆ្នាំ២០២២ ដោយបន្ថែមព័ត៌មាននៃការផ្តន្ទាទោសលោក សារ៉ុម និងទីតាំងនៃការឃាត់ខ្លួនលោក ៕
- ចំណងជើង & មូលបទ
- តុលាការ និងនីតិរដ្ឋ ការបោះឆ្នោត បញ្ហាពន្ធនាគារ
