អាជ្ញាធរប្រើហឹង្សារុញច្រានសមាជិកសហជីពណាហ្គាវើលដ៍
ចេញផ្សាយ ថ្ងៃទី២២ ខែកក្កដា ឆ្នាំ២០២២សមាជិកសហជីពទ្រទ្រង់សិទិ្ធការងារនៃបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ (LRSU) ត្រូវបានអាជ្ញាធរជាច្រើននាក់ប្រើហិង្សារុញច្រានឱ្យដួលទៅលើដី នៅខណៈដែលសមាជិកទាំងនោះព្យាយាមដើរទៅមុខអគារកាស៊ីណូណាហ្គាវើលដ៍នៅកណ្តាលរាជធានីភ្នំពេញនារសៀលនេះ ។
កូដករជាសមាជិកសហជីពប្រមាណ ៨០នាក់ ដែលភាគច្រើនជាស្ត្រី បានប្រមូលផ្តុំគ្នានៅរសៀលនេះ ហើយត្រូវបានអាជ្ញាធរនគរបាល និងកងកម្លាំងចម្រុះប្រមាណ ១០០នាក់ រារាំងនៅកែងមហាវិថីសម្តេចសុធារស និងសម្តេចព្រះសីហនុ ក្បែរអគារកាស៊ីណូណាហ្គាវើលដ៍ ។ កូដករជាច្រើន ត្រូវបានអាជ្ញាធរប្រើហិង្សារុញច្រាន នៅពេលដែលពួកគេព្យាយាមឆ្លងកាត់របាំងបិទផ្លូវ ។ កងសន្តិសុខជាច្រើននាក់ បានរុញកូដករជាច្រើននាក់ឱ្យដួលលើដី ដែលបណ្តាលឱ្យស្ត្រីម្នាក់ និងបុរសម្នាក់រងរបួសដាច់រលាត់ស្បែកនៅលើផ្ទៃមុខ ។
អ្នកឃ្លាំមើលការរំលោភសិទិ្ធមនុស្សមួយចំនួន ត្រូវបានអាជ្ញាធរប្រាប់ឱ្យចាកចេញពីកន្លែងប្រមូលផ្តុំ និងប្រាប់ឱ្យឈប់ថតរូប មុនពេលអាជ្ញាធរទាំងនោះប្រើហឹង្សាទៅលើកូដករ ។
សមាជិកសហជីពណាហ្គាវើលដ៍ តែងតែប្រមូលផ្តុំគ្នាចាប់តាំងពីខែធ្នូ ឆ្នាំ២០២១ ដើម្បីទាមទារឱ្យក្រុមហ៊ុនទទួលយកសមាជិកសហជីពដែលត្រូវបានបណ្តេញចេញដោយខុសច្បាប់ ឱ្យចូលធ្វើការវិញ និងផ្តល់ប្រាក់សំណងសមរម្យចំពោះបុគ្គលិកដែលត្រូវបានបញ្ឈប់ផ្សេងទៀត ។
កូដករជាច្រើនបានប្រឈមមុខនឹងការឃាត់ខ្លួន ចាប់ខ្លួន ពិន័យជាប្រាក់ និងការរំលោភបំពានផ្លូវភេទពីសំណាក់អាជ្ញាធរមួយចំនួន អំឡុងពេលអ្នកទាំងនោះប្រមូលផ្តុំគ្នាដោយអហិង្សារយៈពេលជាង ៧ខែកន្លងមកនេះ ។ សមាជិកសហជីពចំនួន ១១នាក់ ត្រូវបានឃុំខ្លួនបណ្តោះអាសន្នរង់ចាំសវនាការអស់ជាង ២ខែ មុនពេលត្រូវបានដោះលែងកាលពីខែមីនា ឆ្នាំ២០២២ ហើយអ្នកទាំង ១១ នៅតែបន្តប្រឈមមុខនឹងទោសពន្ធនាគារជាច្រើនឆ្នាំ ប្រសិនបើតុលាការផ្តន្ទាទោសដោយយោងតាមការចោទប្រកាន់ដែលមិនត្រឹមត្រូវ ។
- ចំណងជើង & មូលបទ
- សិទិ្ធបញ្ចេញមតិ និងចូលរួម សិទ្ធិការងារ សិទ្ធិស្ត្រី