កូដករណាហ្គាវើលដ៍ត្រូវបានវាយដំដោយអាជ្ញាធរ
ចេញផ្សាយ ថ្ងៃទី១១ ខែសីហា ឆ្នាំ២០២២
កូដករណាហ្គាវើលដ៍ម្នាក់ជាស្ត្រី ត្រូវបានអាជ្ញាធរម្នាក់ដាល់ចំច្រមុះ បណ្តាលឱ្យសន្លប់បាត់ស្មារតីមួយរយៈខ្លី ហើយហូរឈាម ក្រោយពេលដែលអាជ្ញាធរមួយក្រុមបានរារាំងយ៉ាងហិង្សាមកលើក្រុមកូដករប្រមាណ ៨០នាក់ ដែលព្យាយាមដើរទៅមុខកាស៊ីណូណាហ្គាវើលដ៍នារសៀលនេះ ។
អំពើហិង្សានេះ បានកើតឡើងនៅពេលដែលក្រុមកូដករនៃសមាជិកសហជីពទ្រទ្រង់សិទិ្ធការងារនៃបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ (LRSU) បានព្យាយាមដើរឆ្លងកាត់របាំងបិទផ្លូវ ដែលអាជ្ញាធរបានដាក់ ដើម្បីរារាំងអ្នកទាំងនោះពីការទៅឈរនៅមុខអគារកាស៊ីណូ ។ នគរបាល និងកម្លាំងចម្រុះប្រមាណ ៨០ នាក់ បានចាប់ផ្តើមប្រើហិង្សា វាយ ទាត់ធាក់ និងរារាំងហើយរុញច្រានសមាជិកសហជីពទាំងនោះ ដែលភាគច្រើនជាស្ត្រី ដើម្បីមិនឱ្យអ្នកទាំងនោះឆ្លងកាត់របាំង ។
មិនដល់ពីរសប្តាហ៍មុននោះទេ កាលពីថ្ងៃទី ២២ ខែកក្កដា អាជ្ញាធរបានប្រើហិង្សារុញច្រានកូដករនៃសមាជិកសហជីពណាហ្គាវើលដ៍ជាច្រើននាក់ ឱ្យដួលទៅលើដីនៅទីតាំងដូចគ្នា នៅកណ្តាលរាជធានីភ្នំពេញ នៅពេលដែលក្រុមកូដករទាំងនោះព្យាយាមដើរទៅកាន់អគារកាស៊ីណូណាហ្គាវើលដ៍ ។
សមាជិកសហជីពជាច្រើននាក់ តែងតែធ្វើកូដកម្មនៅក្បែរកាស៊ីណូណាហ្គាវើលដ៍ ចាប់តាំងពីខែធ្នូ ឆ្នាំ២០២១ ដើម្បីអំពាវនាវឱ្យមានការយកបុគ្គលិកដែលជាសមាជិកសហជីពនិងត្រូវបានបញ្ឈប់ដោយខុសច្បាប់ ចូលធ្វើការវិញ និងទាមទារសំណងត្រឹមត្រូវតាមច្បាប់សម្រាប់បុគ្គលិកដែលត្រូវបានបញ្ឈប់ផ្សេងទៀត ។ សមាជិកសហជីពដែលធ្វើកូដកម្មជាច្រើន ប្រឈមមុខនឹងការចាប់ខ្លួន ឃុំខ្លួន ពិន័យជាប្រាក់ អំពើហិង្សា និងការបៀតបៀនផ្លូវភេទ ពីសំណាក់អាជ្ញាធររដ្ឋមួយចំនួន នៅក្នុងរយៈពេលប្រាំពីរខែចុងក្រោយនេះ ។ សមាជិកសហជីពចំនួន ១១ នាក់ ធ្លាប់ត្រូវបានតុលាការឃុំខ្លួនបណ្តោះអាសន្នរង់ចាំសវនាការអស់ជាងពីរខែ មុនពេលត្រូវបានដោះលែងកាលពីខែមីនា ឆ្នាំ ២០២២ ហើយអ្នកទាំងនោះនៅែតបន្តប្រឈមមុខនឹងទោសពន្ធនាគារជាច្រើនឆ្នាំទៀត ប្រសិនបើត្រូវបានតុលាការផ្តន្ទាទោសពីបទល្មើសដែលត្រូវបានចោទប្រកាន់មិនត្រឹមត្រូវនោះ ។
- ចំណងជើង & មូលបទ
- សិទិ្ធបញ្ចេញមតិ និងចូលរួម សិទ្ធិការងារ សិទ្ធិស្ត្រី
