អតីតមេឃុំគណបក្សសង្គ្រោះជាតិ ត្រូវបានផ្ដន្ទាទោសឱ្យជាប់ពន្ធនាគារ ១៨ខែ
ចេញផ្សាយ ថ្ងៃទី២៧ ខែកុម្ភៈ ឆ្នាំ២០២៣នាព្រឹកនេះ សាលាដំបូងរាជធានីភ្នំពេញ បានសម្រេចពីការផ្ដន្ទាទោសទៅលើអតីតមេឃុំមកពីគណបក្សជំទាស់ គឺ អ្នកស្រី កឹម តុលា ពាក់ព័ន្ធនឹងការចោទប្រកាន់ពី បទញុះញង់ ដោយផ្ដន្ទាទោសអ្នកស្រីដាក់ពន្ធនាគាររយៈពេល ១៨ខែ ។
អ្នកស្រី តុលា ដែលត្រូវបានជាប់ឆ្នោតនៅក្នុងខេត្តកំពង់ស្ពឺ គឺជាអតីតមន្រ្តីគណបក្សសង្រ្គោះជាតិម្នាក់ ក្នុងចំណោម៧នាក់ ដែលត្រូវបានជំនុំជម្រះ និងផ្ដន្ទាទោសពីបទញុះញង់ ក្នុងខែកក្កដា និងខែសីហា ឆ្នាំ២០២២ នៅក្នុងសំណុំរឿងមួយទាក់ទិននឹងការបង្ហោះសារលើហ្វេសប៊ុក នៅចន្លោះឆ្នាំ២០១៨ ដល់ឆ្នាំ២០២១ ។ អ្នកស្រី តុលា ត្រូវបានផ្ដន្ទាទោសដោយកំបាំងមុខ និងកាត់ទោសឱ្យជាប់ពន្ធនាគាររយៈពេល ១៨ខែ ។
អ្នកស្រី តុលា ត្រូវបានចាប់ខ្លួន កាលពីថ្ងៃទី៣០ ខែតុលា ឆ្នាំ២០២២ នៅអាកាសយាន្តដ្ឋានអន្តរជាតិភ្នំពេញ ខណៈពេលដែលអ្នកស្រីកំពុងចាកចេញទៅជួបស្វាមីអ្នកស្រីនៅក្នុងប្រទេសអាឡឺម៉ង់ ។ មេធាវីការពារសិទ្ធិឱ្យអ្នកស្រី បានបដិសេធការផ្ដន្ទាទោសកាលពីខែសីហា ឆ្នាំ២០២២ ដោយផ្អែកលើហេតុផលថា អ្នកស្រី តុលា មិនធ្លាប់ត្រូវបានកោះហៅឱ្យបានត្រឹមត្រូវតាមនីតិវិធីនោះទេ ហើយសាលាដំបូងរាជធានីភ្នំពេញ បានជំនុំជម្រះករណីនេះម្ដងទៀត នៅថ្ងៃទី០៦ ខែកុម្ភៈ ឆ្នាំ២០២២ ។ ជាថ្មីម្ដងទៀត តុលាការបានផ្ដន្ទាទោសអ្នកស្រី កឹម តុលា ពីបទញុះញង់ ដោយមិនមានផ្ដល់ហេតុផលអ្វីនោះទេ ទោះបីជាពុំមានភស្តុតាងបញ្ជាក់គ្រប់គ្រាន់ នៅក្នុងពេលជំនុំជម្រះឡើងវិញនោះ ដែលថា អ្នកស្រី តុលា បានចុចចូលចិត្ត អធិប្បាយ ឬចែករំលែកការបង្ហោះសារនៅលើហ្វេសប៊ុក របស់គណបក្សផ្សេងទៀត ដែលជាកម្មវត្ថុនៃករណីនេះ ៕
- ចំណងជើង & មូលបទ
- តុលាការ និងនីតិរដ្ឋ សិទិ្ធបញ្ចេញមតិ និងចូលរួម បញ្ហាពន្ធនាគារ សិទ្ធិស្ត្រី