ព្រះសង្ឃមួយអង្គត្រូវបានឃាត់ព្រះកាយ និងផ្សឹក អំឡុងពេលចូលរួមធម្មយាត្រា ដើម្បីយុត្តិធម៌សង្គម និងទាមទារដោះលែងសកម្មជននៅក្នុងពន្ធនាគារ
ចេញផ្សាយ ថ្ងៃទី១១ ខែមីនា ឆ្នាំ២០២៣
ព្រះតេជព្រះគុណ សយ សាត ត្រូវបានឃាត់ព្រះកាយមួយយប់នៅក្នុងស្នងការនគរបាលខេត្តបាត់ដំបង នៅថ្ងៃទី០៩ ខែមីនា ឆ្នាំ២០២៣ ។ ព្រះអង្គត្រូវបានចាប់ផ្សឹក និងដោះលែងវិញ នៅល្ងាចថ្ងៃទី១០ ខែមីនានេះ ដោយត្រូវបានបង្ខំឱ្យក្លាយពលរដ្ឋសាមញ្ញវិញ ។
ការឃាត់ព្រះកាយនេះ កើតឡើង ក្នុងពេលដែលព្រះអង្គកំពុងបន្តដំណើរធម្មយាត្រាបែបសាសនា ដែលចាប់ផ្ដើម តាំងពីថ្ងៃទី០១ ខែមីនា ឆ្នាំ២០២៣ នៅក្នុងរាជធានីភ្នំពេញ ហើយរំពឹងថានឹងបញ្ចប់នៅក្នុងចម្ងាយ ៣៥០គីឡូម៉ែត្រ នៅក្រុងប៉ោយប៉ែត ។
ព្រះអង្គ សយ សាត បានធ្វើធម្មយាត្រានេះ ដើម្បីបង្ហាញពីការទាមទារចំនួន ៧ចំណុច រួមមាន ការអំពាវនាវសូមឱ្យបញ្ឈប់ការបណ្ដេញព្រះសង្ឃចេញពីវត្ត ដោយសារការចូលរួមសកម្មភាពសង្គម សូមកុំឱ្យប្រើប្រាស់តុលាការដោយរំលោភបំពានដើម្បីប្រឆាំងនឹងសកម្មជន សូមឱ្យគោរពសេរីភាពក្នុងការបញ្ចេញមតិរបស់ប្រជាពលរដ្ឋទាំងអស់ សូមឱ្យមានដំណោះស្រាយសមស្របលើបញ្ហាដីធ្លី និងសូមឱ្យមានការដោះលែងអ្នកនយោបាយ ក្រុមសង្គមស៊ីវិល និងយុវជន ដែលបច្ចុប្បន្នកំពុងត្រូវបានឃុំខ្លួនក្នុងពន្ធនាគារ ។
ការឃាត់ព្រះកាយនៅក្នុងខេត្តបាត់ដំបងនេះ ធ្វើឡើងក្រោយពេលមានការរារាំង នៅព្រឹកថ្ងៃទី០៧ ខែមីនា ឆ្នាំ២០២៣ ខណៈពេលដែលអាជ្ញាធរនៅតាមព្រំប្រទល់ខេត្តពោធិ៍សាត់ បានបញ្ឈប់ និងសាកសួរព្រះអង្គ មួយរយៈពេលខ្លី ។
នេះគឺជាលើកទីពីរហើយក្នុងឆ្នាំនេះ ដែលព្រះតេជព្រះគុណ សយ សាត ចូលរួមនៅក្នុងក្បួនធម្មយាត្រាឆ្លងកាត់ខេត្តជាច្រើននេះ ។ កាលពីចុងខែមករា ព្រះអង្គបានចូលរួមក្បួនធម្មយាត្រា ដែលដឹកនាំដោយអតីតប្រធានសហជីព គឺលោក រ៉ុង ឈុន ដែលបច្ចុប្បន្នជាអនុប្រធានគណបក្សភ្លើងទៀន ។ បន្ទាប់ពីវិលត្រឡប់មកកុដិនៅក្នុងវត្តផ្លោច ក្នុងខេត្តកំពង់ស្ពឺ ព្រះតេជព្រះគុណ សយ សាត ត្រូវបានជូនដំណឹងថា ព្រះអង្គមិនអាចគង់នៅក្នុងវត្តនេះបានទៀតទេ ។ ចាប់តាំងពីពេលនោះមក ព្រះអង្គបានគង់នៅតំបន់ព្រៃក្បែរនោះ ៕
- ចំណងជើង & មូលបទ
- តុលាការ និងនីតិរដ្ឋ សិទិ្ធបញ្ចេញមតិ និងចូលរួម
