តុលាការកំពូល ផ្ដន្ទាទោសមនុស្ស ១៣នាក់ ក្នុងសវនាការដ៏ធំនៃសំណុំរឿងគណបក្សសង្គ្រោះជាតិ
ចេញផ្សាយ ថ្ងៃទី៣០ ខែមីនា ឆ្នាំ២០២៣នាព្រឹកនេះ តុលាការកំពូល បានសម្រេចតម្កល់សាលក្រមសាលាដំបូងរាជធានីភ្នំពេញ និងសាលដីកាសាលាឧទ្ធរណ៍រាជធានីភ្នំពេញ ដែលបានផ្ដន្ទាទោសសមាជិកអតីតគណបក្សសង្គ្រោះជាតិចំនួន ១២រូប និងអតីតមន្ត្រីក្រសួងមហាផ្ទៃម្នាក់ ពីបទញុះញង់ និងបទរួមគំនិតក្បត់ ហើយត្រូវបានកាត់ទោសម្នាក់ៗឱ្យជាប់ពន្ធនាគារ ៥ឆ្នាំ ក្នុងនោះទោស ១៦ខែត្រូវបានព្យួរ ។ តុលាការកំពូលពុំបានផ្ដល់ហេតុផលនៅក្នុងសាលដីកានេះទេ ។
មនុស្សទាំង ១៣នាក់ ត្រូវបានផ្ដន្ទាទោស នៅថ្ងៃទី១៧ ខែមីនា ឆ្នាំ២០២២ ដោយសាលាដំបូងរាជធានីភ្នំពេញ នៅក្នុងសវនាការដ៏ធំមួយ រួមជាមួយអតីតថ្នាក់ដឹកនាំ និងសមាជិកគណបក្សសង្គ្រោះជាតិចំនួន៨រូបទៀត ដែលមិនបានប្ដឹងសារទុក្ខ ។ សាលាឧទ្ធរណ៍រាជធានីភ្នំពេញ បានតម្ដល់ការផ្ដន្ទាទោសជនជាប់ចោទទាំង ១៣នាក់ ក្នុងខែធ្នូ ឆ្នាំ២០២២ ។ អ្នកទាំង១៣ មានដូចជា លោក ឆុន ប៊ុនឆាត លោក ឡុង ផារី លោក ឃុត ច្រឹក លោក ងិន ឃាន លោក យឹម សារ៉េត លោក ឃឹម ភាណា លោក ថៃ សុគន្ធា លោក កែវ ថៃ លោក ញ៉ែម វាន លោក ជុំ ចាន់ លោក សុខ ចន្ថា លោក ពៀត ម៉ាប់ និងលោក ស៊ន់ ធន់ ។
អ្នកទាំង១៣ ត្រូវបានឃុំខ្លួនជាប់មករហូតតាំងពីសវនាការនៅតុលាការជាន់ទាប ដោយពួកគាត់ជាច្រើននាក់ ត្រូវបានឃុំខ្លួន រហូតដល់ ៣ឆ្នាំ ហើយរង់ចាំការប្រកាសសាលដីកាស្ថាពរនៅថ្ងៃនេះ ។ អ្នកទាំងនោះ នៅតែបន្តស្ថិតក្រោមការឃុំខ្លួន នៅមណ្ឌលអប់រំកែប្រែទី៣ ដោយកំពុងអនុវត្តទោសជាប់ពន្ធនាគារ ៣ឆ្នាំ ៨ខែ ។ ការផ្ដន្ទាទោសនេះ នឹងធ្វើឱ្យពួកគាត់ជាប់ពន្ធនាគាររហូតដល់ក្រោយការបោះឆ្នោតថ្នាក់ជាតិនៅខែកក្កដា ឆ្នាំ២០២៣ ខាងមុខនេះ ។
នេះជាសំណុំរឿងមួយក្នុងចំណោមសំណុំរឿងដ៏ធំទាំង៥ ដែលបានចាប់ផ្ដើមធ្វើឡើង ប្រឆាំងនឹង អតីតថ្នាក់ដឹកនាំ និងសមាជិកគណបក្សសង្គ្រោះជាតិ ចាប់តាំងពី ខែវិច្ឆិកា ឆ្នាំ២០២០ មក ។ រឿងរ៉ាវនេះពាក់ព័ន្ធនឹងការចោទប្រកាន់ពីការគាំទ្រទៅលើចលនាគណបក្សសង្គ្រោះជាតិ ដែលបង្កើតឡើងដោយ អតីតប្រធានគណបក្សសង្គ្រោះជាតិ លោក សម រង្ស៊ី និងការបញ្ចេញមតិយោបល់ ជុំវិញការឆ្លើយតបរបស់រាជរដ្ឋាភិបាល ចំពោះការរីករាលដាលនៃជំងឺកូវីដ-១៩ ដែលបានធ្វើឡើងតាមរយៈកិច្ចសន្ទនាជាលក្ខណៈឯកជន តាមប្រព័ន្ធទូរសព្ទ និងប្រព័ន្ធអនឡាញ ។
សំណុំរឿងនៅតុលាការជាន់ទាប ពាក់ព័ន្ធនឹងជនជាប់ចោទ៨នាក់ផ្សេងទៀត ដែលជាអតីតថ្នាក់ដឹកនាំគណបក្សសង្គ្រោះជាតិ ក្នុងនោះរួមមាន លោក សម រង្ស៊ី លោកស្រី មួរ សុខហួរ និងលោក អេង ឆៃអ៊ាង ផងដែរ ។ ក្រៅពីការផ្ដន្ទាទោសដោយកំបាំងមុខពីបទញុះញង់ និងបទរួមគំនិតក្បត់ អ្នកទាំងនោះក៏ត្រូវបានរកឃើញថាមានទោសពីបទញុះញង់កុំឱ្យយោធិនស្ដាប់បង្គាប់ ព្រមទាំងត្រូវបានកាត់ទោសឱ្យជាប់ពន្ធនាគារ ១០ឆ្នាំ ផងដែរ ៕
- ចំណងជើង & មូលបទ
- តុលាការ និងនីតិរដ្ឋ ការបោះឆ្នោត សិទិ្ធបញ្ចេញមតិ និងចូលរួម បញ្ហាពន្ធនាគារ