សមាជិកសហជីពណាហ្គាវើលដ៍ ៩នាក់ ត្រូវបានផ្តន្ទាទោស ហើយស៊ីថរ ត្រូវបានកាត់ឱ្យជាប់ពន្ធនាគារ ២ ឆ្នាំ
ចេញផ្សាយ ថ្ងៃទី២៥ ខែឧសភា ឆ្នាំ២០២៣នៅព្រឹកនេះសាលាដំបូងរាជធានីភ្នំពេញ បានសម្រេចផ្តន្ទាទោស អតីត និងបច្ចុប្បន្នជាសមាជិក និងថ្នាក់ដឹកនាំសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ (LRSU) ចំនួន ៩ រូប ដែលរួមទាំងកញ្ញា ឈឹម ស៊ីថរ ជាប្រធានសហជីព និងកំពុងជាប់ក្នុងពន្ធនាគារ ពីបទញុះញង់ ។ តុលាការបានផ្តន្ទាទោសអ្នកទាំងនោះ ដោយយោងតាមមាត្រា ៤៩៤ និង ៤៩៥ នៃក្រមព្រហ្មទណ្ឌ ដោយសារការធ្វើកូដកម្មអហិង្សាដែលកំពុងបន្តកើតមានឡើងរបស់សហជីពអ្នកទាំងនោះ ។
តុលាការបានផ្តន្ទាទោស កញ្ញា ស៊ីថរ ឱ្យជាប់ពន្ធនាគារចំនួន ២ឆ្នាំ ដែលជាចំនួនទោសអតិបរមាសម្រាប់បទល្មើសនេះ ហើយកញ្ញាត្រូវបានបញ្ជូនទៅឃុំខ្លួនភ្លាមៗក្រោយពេលប្រកាសសាលក្រម ។ កញ្ញា និងសមាជិកសហជីពដទៃទៀត ធ្លាប់ត្រូវបានអាជ្ញាធរចាប់ខ្លួន និងដាក់ពន្ធនាគារកាលពីខែធ្នូ ឆ្នាំ២០២១ និងខែមករា ឆ្នាំ២០២២ មុនពេលអ្នកទាំងនោះត្រូវបានដោះលែងឱ្យនៅក្រៅឃុំបណ្តោះអាសន្ន កាលពីខែមីនា ឆ្នាំ២០២២ ។ ស៊ីថរត្រូវបានអាជ្ញាធរចាប់ខ្លួន និងឃុំខ្លួនម្តងទៀត កាលពីថ្ងៃទី២៦ ខែវិច្ឆិកា ឆ្នាំ២០២២ ដោយកញ្ញាត្រូវបានអាជ្ញាធរចោទថា បានល្មើសនឹងលក្ខខណ្ឌត្រួតពិនិត្យតាមផ្លូវតុលាការ ទោះជាការពិតទាំងកញ្ញា និងមេធាវីរបស់កញ្ញា មិនដែលទទួលបានដំណឹងអំពីលក្ខខណ្ឌទាំងនោះ ។
សមាជិកសហជីពណាហ្គាវើលដ៍ ៥ នាក់ ផ្សេងទៀត ដែលរួមមាន អ្នកស្រី ឈឹម សុខន អ្នកស្រី ហៃ សុភាព អ្នកស្រី ឃ្លាំ សុបិន្ត កញ្ញា ស៊ុន ស្រីពេជ្រ និង កញ្ញា ទូច សិរីមាស ត្រូវបានតុលាការផ្តន្ទាទោសដាក់ពន្ធនាគារចំនួន ១ ឆ្នាំ ៦ ខែ ប៉ុន្តែអ្នកទាំង ៥ ត្រូវបានដាក់ឱ្យនៅក្រោមការត្រួតពិនិត្យតាមផ្លូវតុលាការ រហូតដល់មានសាលក្រមស្ថាពរ ។
ចំណែកឯជនជាប់ចោទ ៣ នាក់ ផ្សេងទៀត ដែលរួមមាន លោក សុខ ណារិទិ្ធ លោក សុខ គង្គា និងអ្នកស្រី រី សុវណ្ណឌី ដែលកំពុងមានផ្ទៃពោះ ត្រូវបានតុលាការផ្តន្ទាទោសដាក់ពន្ធានាគារចំនួន ១ ឆ្នាំ ប៉ុន្តែទោសត្រូវព្យួរ ។ តុលាការមិនបានផ្តល់សំអាងហេតុណាមួយពាក់ព័ន្ធនឹងសេចក្តីសម្រេចខាងលើ អំឡុងពេលប្រកាសសាលក្រមនោះទេ ។
សមាជិកសហជីពណាហ្គាវើលដ៍ជាច្រើននាក់ បានបន្តធ្វើកូដកម្មចាប់តាំងពីខែធ្នូ ឆ្នាំ២០២១ ក្រោយពេលក្រុមហ៊ុនកាស៊ីណូណាហ្គាវើលដ៍ បានបញ្ឈប់បុគ្គលិក/កម្មករជាងមួយពាន់នាក់ ដែលរួមទាំងថ្នាក់ដឹកនាំ និងសមាជិកសំខាន់ៗរបស់សហជីពទាំងអស់ ។ សមាជិកជាច្រើននាក់ បានទទួលរងពីការរំលោភបំពានតាមផ្លូវតុលាការ រូបរាងកាយ និងផ្លូវភេទ ពីសំណាក់អាជ្ញាធរជាច្រើននាក់ អំឡុងពេលកូដកម្មអហិង្សារបស់អ្នកទាំងនោះ ។
- ឯកសារទាក់ទង
- ចំណងជើង & មូលបទ
- សិទិ្ធបញ្ចេញមតិ និងចូលរួម សិទ្ធិស្ត្រី