កញ្ញា ឈឹម ស៊ីធរ ត្រូវបានឃាត់ខ្លួន ក្រោយពីត្រឡប់មកដល់កម្ពុជាវិញ
ចេញផ្សាយ ថ្ងៃទី២៦ ខែវិច្ឆិកា ឆ្នាំ២០២២
.JPG "កញ្ញា ឈឹម ស៊ីធរ ត្រូវបានចាប់ខ្លួនយ៉ាងហិង្សាក្នុងរាជធានីភ្នំពេញ កាលពីថ្ងៃទី០៤ ខែមករា ឆ្នាំ២០២២ ។")
នាថ្ងៃនេះ កញ្ញា ឈឹម ស៊ីធរ ប្រធានសហជីព ត្រូវបានឃាត់ខ្លួន និងសាកសួរដោយនគរបាលអន្តោប្រវេសន៍ នៅក្នុងអាកាសយាន្តដ្ឋានអន្តរជាតិភ្នំពេញ ក្រោយពីបានវិលត្រឡប់មកដល់ប្រទេសកម្ពុជាវិញ បន្ទាប់ពីបានធ្វើដំណើរទៅកាន់ប្រទេសអូស្ត្រាលីអស់រយៈពេល ១២ថ្ងៃ ។ កញ្ញា ត្រូវបានឃាត់ខ្លួននៅការិយាល័យអន្តោប្រវេសន៍ វេលាម៉ោងប្រមាណជា ១០៖៣០នាទី ព្រឹកនេះ ហើយត្រូវបានបញ្ជូនទៅកាន់សាលាដំបូងរាជធានីភ្នំពេញ ។
មេធាវីរបស់កញ្ញា ស៊ីធរ ដែលបានមានវត្តមាននៅអាកាសយាន្តដ្ឋាន មិនត្រូវបានអនុញ្ញាតឱ្យចូលជួបកញ្ញា ស៊ីធរ អំឡុងពេលសាកសួរនោះទេ ព្រមទាំងមិនអាចទាក់ទងកូនក្ដីរបស់ខ្លួន ជាច្រើនម៉ោងផងដែរ ។
កញ្ញា ស៊ីធរ ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៏ ត្រូវបានចោទប្រកាន់ពីបទញុះញង់ តាមបញ្ញត្តិមាត្រា៤៩៤ និងមាត្រា៤៩៥ នៃក្រមព្រហ្មទណ្ឌ កាលពីខែមករា ឆ្នាំ២០២២ ក្រោយពេលសហជីពកញ្ញាចាប់ផ្ដើមធ្វើកូដកម្ម ។ កញ្ញាត្រូវបានចាប់ខ្លួនយ៉ាងហិង្សា អំឡុងពេលព្យាយាមចូលរួមធ្វើកូដកម្មជាមួយកូដករផ្សេងទៀត ហើយត្រូវបានជាប់ឃុំបណ្ដោះអាសន្នក្នុងពន្ធនាគារអស់រយៈពេល២ខែ ជាមួយនឹងថ្នាក់ដឹកនាំ និងសមាជិករបស់ខ្លួន មុនពេលមានការដោះលែងឱ្យនៅក្រៅឃុំវិញ កាលពីខែមីនា ឆ្នាំនេះ ។ ក្រោយពីការដោះលែង ទាំងកញ្ញា ស៊ីធរ និងមេធាវីកញ្ញា មិនត្រូវបានជូនដំណឹងពីការដាក់ឱ្យស្ថិតក្រោមការត្រួតពិនិត្យតាមផ្លូវតុលាការ ឬលក្ខខណ្ឌសាកល្បង ដូចជាការរឹតត្បិតលើការធ្វើដំណើរនោះទេ ។
សមាជិកសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៏ បានចាប់ផ្ដើមធ្វើកូដកម្ម តាំងពីខែធ្នូ ឆ្នាំ២០២១ បន្ទាប់ពីមានការបញ្ឈប់បុគ្គលិកទ្រង់ទ្រាយធំ នៅក្រុមហ៊ុនកាស៊ីណូណាហ្គាវើលដ៏ ដែលក្នុងនោះមានថ្នាក់ដឹកនាំសហជីពទាំងអស់ ។ កញ្ញា ស៊ីធរ ក៏ដូចជាថ្នាក់ដឹកនាំ និងសមាជិកសហជីពណាហ្គាវើលដ៏ ប្រឈមមុខនឹងការដាក់ពន្ធនាគាររយៈពេល ២ឆ្នាំ ប្រសិនបើត្រូវបានរកឃើញថាមានទោស ៕
បច្ចុប្បន្នភាព៖ កញ្ញា ស៊ីធរ ត្រូវបានបញ្ជូនទៅឃុំខ្លួននៅមណ្ឌលអប់រំកែប្រែទី២ (ម២) ហើយ នារសៀលនេះ ។
- ចំណងជើង & មូលបទ
- តុលាការ និងនីតិរដ្ឋ សិទិ្ធបញ្ចេញមតិ និងចូលរួម សិទ្ធិការងារ សិទ្ធិស្ត្រី
