តុលាការកំពូលសម្រេចតម្កល់ការកាត់ទោសបទញុះញង់លើសកម្មជនទំាង ៩ រូប
ចេញផ្សាយ ថ្ងៃទី៣១ ខែឧសភា ឆ្នាំ២០២៣នាព្រឹកនេះ តុលាការកំពូលបានបដិសេធបណ្តឹងរបស់ អ្នកទាំង ៩នាក់ ដែលជា អតីតសកម្មជននយោបាយ សកម្មជនសង្គម និងយុវជន ។ តុលាការបានសម្រេចតម្កល់សាលដីកាដែលចោទប្រកាន់ពីបទញុះញង់ទៅលើ អតីត និងសកម្មជនខ្មែរថាវរៈ ដែលមានដូចជា អ្នកនាង ឈឿន ដារ៉ាវី លោក ហ៊ុន វណ្ណៈ លោក ថា ឡាវី និង កញ្ញា អេង ម៉ាឡៃ ហើយនិងសកម្មជនរបស់សមាគមសម្ព័ន្ធនិស្សិតបញ្ញាវ័ន្តខ្មែរ លោក កើត សារ៉ាយ លោក មួង សុភ័ក្រ និងលោក មាន ព្រហ្មមុនី ព្រមទាំង អតីតសមាជិកគណបក្សសង្គ្រោះជាតិ លោក ឈួ ផេង ឬ ហៅថា ឈូ ផេង និង លោក ជុំ ពុទ្ធី ឬហៅ ថា ទុំ ពុទ្ធី ឬ ឈុំ ពុទ្ធី ។
តុលាការបានសម្រេចតម្កល់សេចក្តីសម្រេចរបស់តុលាការជាន់ទាប ដែលសម្រេចកាត់ទោសសកម្មជនទាំងនោះ ចំនួន ២០ ខែក្នុងពន្ធនាគារជាមួយនឹងការព្យួរទោសពួកគេចន្លោះពី៥ ទៅ ៦ ខែ ។ អ្នកនាង ដារ៉ាវី លោក វណ្ណៈ លោក ផេង និង លោក ពុទ្ធី ត្រូវបានជាប់ពន្ធនាគាររយៈពេល ១៥ ខែ ខណៈពេលដែល លោក សារ៉ាយ លោក សុភ័ក្រ លោក ព្រហ្មមុនី លោក ឡាវី និង កញ្ញា ម៉ាឡៃ បានជាប់ក្នុងពន្ធនាគាររយៈពេល ១៤ ខែ ។ អ្នក ទាំង ៩ រូបនេះក៏ត្រូវបានពិន័យជាទឹកប្រាក់ក្នុងម្នាក់ ២ លានរៀល (ប្រហែល ៥០០ ដុល្លារអាមេរិក) ផងដែរ ។
សកម្មជនទាំងនេះ ត្រូវបានចាប់ខ្លួនក្នុងអំឡុងខែ សីហា និងខែ កញ្ញា ឆ្នាំ ២០២០ និងត្រូវបានឃុំខ្លូនបណ្តោះអាសន្នរង់ចាំសវនាការ ដែលរយៈពេលឃុំខ្លួននេះត្រូវបានរាប់បញ្ចូលក្នុងទោសពន្ធនាគាររបស់ពួកគេផងដែរ ។ សកម្មជនទាំង ៩ រូបត្រូវបានដោះលែងពីពន្ធនាគារវិញនៅដើមខែ វិច្ឆិកា ឆ្នាំ ២០២១ ប៉ុន្តែពួកគេត្រូវបានតុលាការព្យួរទោសសាកល្បងចំនួន ពីរឆ្នាំ និងស្ថិតនៅក្រោមការត្រួតពិនិត្យតាមផ្លូវតុលាការ រហូតដល់ខែវិច្ឆិកា ឆ្នាំ២០២៣ ។
សាលាដំបូងរាជធានីភ្នំពេញបានកាត់ទោសសកម្មជនទាំង ៩ រូបនេះ ជាមួយនឹងជនជាប់ចោទ ៥ រូបផ្សេងទៀត ដែលត្រូវបានចោទប្រកាន់ពីបទ ញុះញង់ឱ្យប្រព្រឹត្តបទឧក្រិដ្ឋជាអាទិ៍ យោងតាមមាត្រា ៤៩៤ និង មាត្រា ៤៩៥ នៃក្រមព្រហ្មទណ្ឌកាលពីថ្ងៃទី២៦ ខែ តុលា ឆ្នាំ ២០២១ ។ ជនជាប់ចោទចំនួន ៩នាក់ ក្នុងចំណោមអ្នកទាំង ១០ បានប្តឹងឧទ្ធរណ៍លើសេចក្តីសម្រេចនេះ តែត្រូវបានសាលាឧទ្ធរណ៍រាជធានីភ្នំពេញតម្កល់សេចក្តីសម្រេចនេះដដែល កាលពី ថ្ងៃទី ២២ ខែសីហា ឆ្នាំ ២០២២ ។ បទល្មើសព្រហ្មទណ្ឌទាំងនេះ ត្រូវបានយកមកប្រើប្រាស់មកលើសកម្មជនជាច្រើននាក់ ពាក់ព័ន្ធនឹងការធ្វើបាតុកម្មដោយអហិង្សា ក្រោយពេលអាជ្ញាធរចាប់ខ្លួនអតីតប្រធានសហជីព និងសកម្មជនសិទ្ធិការងារ លោក រ៉ុង ឈុន កាលពីខែកក្កដា ឆ្នាំ ២០២០ ។
- ឯកសារទាក់ទង