តុលាការផ្ដន្ទាទោសលោក រ៉ុង ឈុន កញ្ញា ស កន្និកា និងលោក តុន និមល ពីបទញុះញង់
ចេញផ្សាយ ថ្ងៃទី១៨ ខែសីហា ឆ្នាំ២០២១
នាព្រឹកនេះ សាលាដំបូងរាជធានីភ្នំពេញ បានសម្រេចផ្ដន្ទាទោស លោក រ៉ុង ឈុន ដាក់ពន្ធនាគាររយៈពេល ២៤ខែ និងផ្ដន្ទាទោសសកម្មជនពីរនាក់ទៀតគឺ កញ្ញា ស កន្និកា និងលោក តុន និមល ដាក់ពន្ធនាគាររយៈពេល ២០ខែ ពីបទញុះញង់ តាមបញ្ញត្តិមាត្រា ៤៩៤ និងមាត្រា ៤៩៥ នៃក្រមព្រហ្មទណ្ឌ ។ សកម្មជនទាំង៣នាក់ ត្រូវបានពិន័យជាប្រាក់ម្នាក់ៗចំនួន ២លានរៀល និងបង្គាប់ឱ្យអ្នកទាំង៣នាក់សងសំណងជំងឺចិត្តរួម ចំនួន ៤០០លានរៀល សម្រាប់ការខូចខាតផ្សេងៗ ។
លោក រ៉ុង ឈុន ដែលជាប្រធានសហជីព និងជាសកម្មជនការពារសិទ្ធិការងារ អស់រយៈពេលជាច្រើនឆ្នាំមកហើយនោះ ត្រូវបានចាប់ខ្លួនកាលពីខែកក្កដា ឆ្នាំ២០២០ ជុំវិញការអត្ថាធិប្បាយរបស់លោកទាក់ទងនឹងបញ្ហាព្រំដែនប្រទេសកម្ពុជា-វៀតណាម ។ មួយខែក្រោយមក កញ្ញា ស កន្និកា ត្រូវបានចាប់ខ្លួន អំឡុងពេលតវ៉ាដោយអហិង្សា ដើម្បីអំពាវនាវឱ្យមានការដោះលែងលោក រ៉ុង ឈុន ។ លោក តុន និមល អតីតបេក្ខជនឈរឈ្មោះបោះឆ្នោតក្រុមប្រឹក្សាឃុំ-សង្កាត់នៃគណបក្សសង្គ្រោះជាតិ ត្រូវបានចាប់ខ្លួនកាលពីខែតុលា ឆ្នាំដដែលនោះ អំឡុងពេលជួបជុំគ្នានៅខាងមុខស្ថានទូតចិន ។ អ្នកទាំងបី ត្រូវបានឃុំខ្លួនក្នុងពន្ធនាគារបណ្ដោះអាសន្នរង់ចាំសវនាការ ចាប់តាំងពីពេលចាប់ខ្លួននោះមក ។
សកម្មជន សិល្បករ និងអ្នកការពារសិទ្ធិមនុស្សចំនួន ១៩នាក់ ត្រូវបានចាប់ខ្លួននៅរយៈពេល១ខែកន្លះ បន្ទាប់ពីការចាប់ខ្លួនលោក រ៉ុង ឈុន ដោយអ្នកទាំងនោះភាគច្រើនក៏ប្រឈមមុខនឹងការចោទប្រកាន់ពីបទញុះញង់ផងដែរ ដែលមានទោសប្បញ្ញត្តិជាប់ពន្ធនាគាររហូតដល់ ២ឆ្នាំ ។ អ្នកការពារសិទ្ធិមនុស្សយ៉ាងតិចណាស់២៤នាក់ កំពុងជាប់ឃុំក្នុងពន្ធនាគារ ដោយសារការប្រើប្រាស់សិទ្ធិរបស់ពួកគេ ។
ក្រុមសង្គមស៊ីវិល សហគមន៍ និងសហជីព ជាង ១៤០ បានអំពាវនាវឱ្យតុលាការទម្លាក់ចោលបទចោទទាំងអស់ចំពោះលោក រ៉ុង ឈុន ។ ស្ថាប័នជាច្រើនទៀត ក៏បានអំពាវនាវក្នុងខែសីហា ឆ្នាំ២០២០ ឱ្យអាជ្ញាធរបញ្ឈប់ការប្រើប្រាស់អំពើហិង្សា និងការចាប់ខ្លួនសកម្មជនដែលតវ៉ាដោយសន្តិវិធី នៅក្រោយការចាប់ខ្លួនលោក រ៉ុង ឈុន ប៉ុន្មានសប្ដាហ៍ និងរយៈពេលប្រមាណមួយខែក្រោយពីបានអំពាវនាវឱ្យមានការដោះលែងសកម្មជនជាយុវជន និងអ្នកការពារបរិស្ថាន ដែលត្រូវបានចាប់ខ្លួន ក្នុងការធ្វើទុក្ខបុកម្នេញនេះ ៕
- ឯកសារទាក់ទង
- ចំណងជើង & មូលបទ
- តុលាការ និងនីតិរដ្ឋ សិទិ្ធបញ្ចេញមតិ និងចូលរួម បញ្ហាពន្ធនាគារ រ៉ុង ឈុន
